ពលរដ្ឋដែលអះអាងថាជាអ្នករងគ្រោះពីបទល្មើសឆបោកតាមប្រព័ន្ធបច្ចេកវិទ្យាអនឡាញ ឬOnline Scam ស្វះស្វែងរកកិច្ចគាំពារផ្នែកផ្លូវច្បាប់ និងស្នើសុំការអន្តរាគមន៍ផ្តល់លុយដែលបាត់បង់ដោយអំពើចាញ់បោកត្រឡប់មកវិញ ស្របពេលគ្រួសារពលរដ្ឋផ្សេងទៀត ដែលធ្វើការឲ្យឧក្រិដ្ឋជនអនឡាញដោយមិនដឹងខ្លួន ហើយកំពុងជាប់ឃុំទទូចឲ្យនគរបាលយុត្តិធម៌ដោះលែងពួកគេឲ្យមានសេរីភាពវិញ។
ការត្អូញត្អែររបស់ជនរងគ្រោះដោយសារបទល្មើសអនឡាញនេះ នៅចំពេលដែលរដ្ឋាភិបាលកំពុងអនុវត្ត យុទ្ធនាការ នៃការបោសសំអាតជនបរទេស ដែលលបលួចស្នាក់នៅ និងរកស៊ីដោយខុសច្បាប់នៅក្នុងប្រទេសកម្ពុជា។ត្រឹមដើមខែនៃខែឧសភា ឆ្នាំ២០២៦នេះ អគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ ឲ្យដឹងថាមានជនជាតិចិនជាង១០០នាក់ (១៦៥) ត្រូវបណ្តេញចេញពីកម្ពុជា។ជនសង្ស័យទាំងនោះ រកឃើញថា ជាអ្នកដែលមានជាប់ពាក់ព័ន្ធដោយផ្ទាល់ ក្នុងបទល្មើសឆបោកតាមប្រព័ន្ធបច្ចេកវិទ្យាអនឡាញនេះ។
កាលពីចុងខែធ្នូ ឆ្នាំ២០២៥ សារព័ត៌មានឥណ្ឌាឈ្មោះ The Indian Express ធ្លាប់បានចុះផ្សាយ ដោយចោទប្រកាន់ថាប្រទេសកម្ពុជា គឺជាជម្រកនៃបទល្មើសអនឡាញដ៏ធំ។កាលពីចុងខែ មីនា ឆ្នាំ២០២៤ ស្ថាប័នព័ត៌មានដដែលនេះ ក៏ធ្លាប់បានចេញរបាយការណ៍របស់ខ្លួនដែរ ដែលចាត់ទុកថានេះជាការប្រតិកម្មមុនគេ សម្រាប់ប្រទេសដែលស្ថិតនៅក្នុងតំបន់អាស៊ីខាងត្បូងមួយនេះ។ តាមរយៈរបាយការណ៍របស់ខ្លួន The Indian Express លើកឡើងថាមានពលរដ្ឋឥណ្ឌាប្រមាណ ៥ ០០០នាក់ ត្រូវក្រុមឧក្រិដ្ឋជនអនឡាញឃុំខ្លួននៅក្នុងប្រទេសកម្ពុជា។ពួកគេត្រូវចាប់បង្ខាំង ដែលបម្រើការឲ្យជនជនជាតិចិន សម្រាប់ការងារបោកប្រាស់ផ្នែកបច្ចេកវិទ្យាអនឡាញ។
ចំណែក ស្ថានទូតឥណ្ឌាប្រចាំទីក្រុងភ្នំពេញ ក៏បានចេញសេចក្តីប្រកាសដោយបង្ហាញនូវកង្វល់ និងការព្រួយបារម្ភរបស់ខ្លួន និងអះអាងថាកំពុងធ្វើកិច្ចការនេះដ៏សកម្មជាមួយរដ្ឋាភិបាលកម្ពុជា ដើម្បីជួយសង្រ្គោះពលរដ្ឋរបស់ខ្លួន ដែលធ្លាក់ចូលក្នុងបន្ទាក់ នៃការងារឆបោកតាមអនឡាញនេះដែរ។ភ្លាមៗ អ្នកនាំពាក្យរងក្រសួងមហាផ្ទៃ លោក ទូច សុឃៈ ធ្លាប់អះអាងថា ការព្យាយាមបញ្ចេញទិន្នន័យដោយបណ្តាញព័ត៌មានបែបនេះ វាដូចជាមិនទាន់គ្រប់គ្រាន់ ដែលអាចជឿទុកចិត្តបាន។ក្នុងន័យនេះ លោកទាមទារឲ្យស្ថានទូតឥណ្ឌាប្រចាំកម្ពុជា ត្រូវបង្កើតកិច្ចសហការជាមួយក្រសួងការបរទេស ដើម្បីប្រាកដថា អ្វីដែលបានកើតឡើងនេះ វាពិតកម្រិតណា។
តាមរយៈលំហូរជនបរទេស ជាពិសេសជនជាតិចិន ដែលចេះតែបន្តកើនឡើងនៅក្នុងប្រទេសកម្ពុជា គេសង្កេតឃើញថាបទល្មើសអនឡាញក៏កាន់តែរីកដុះដាល់ដែរ។ដើមឡើយ ជនរងគ្រោះភាគច្រើន គឺជាជនបរទេសតាមរយៈសន្យាផ្តល់ការងារឲ្យធ្វើក្នុងតម្លៃប្រាក់ឈ្នួលខ្ពស់ជាដើម។ដោយឥទ្ធិពល នៃជនបរទេសជាពិសេសជនជាតិចិន ដែលមានវត្តមាននៅលើទឹកដីកម្ពុជា ក្នុងដំណាក់កាលចុងក្រោយនេះ ពលរដ្ឋខ្មែរ ក៏ក្លាយជាគោលដៅ នៃអំពើឆបោក តាមរយៈប្រព័ន្ធបច្ចេកវិទ្យានេះដូចគ្នាដែរ។
អ្នកស្រី កែវ សុភា រស់នៅក្រុងប៉ោយប៉ែត ខេត្តបន្ទាយមានជ័យ បានប្រាប់គេហទំព័រ Press Start Cambodia ថាខ្លួនធ្លាប់ចាញ់បោកអនឡាញនេះចំនួន៣ដងមកហើយ។អ្នកស្រីបន្តថា មុននឹងចាញ់បោកទិញសត្វឆ្មាតាមអនឡាញនេះ ខ្លួនធ្លាប់ចាញ់បោកដោយទិញផ្លាកទីនក្នុងតម្លៃ៧៨ដុល្លារម្តងរួចមកហើយដែរ តាមរយៈការផ្សាយផ្ទាល់ ឬLive នៅលើហ្វេសប៊ុក។ហើយករណីមួយទៀត ក្រុមឧក្រិដ្ឋជនឆបោកបានចូលលួចលុយអ្នកស្រី នៅក្នុងគណនីវីងអស់ចំនួន៥០ដុល្លារ បន្ទាប់ពីខ្លួនបានបើកគណនីវីងនេះរួច។
ស្ថិតក្នុងវ័យ៤២ឆ្នាំ អ្នកស្រី កែវ សុភា ឲ្យដឹងថា ចំពោះការចាញ់បោករឿងទិញសត្វឆ្មានេះវិញ ក៏មានរូបភាព ហាក់មិនខុសគ្នាប៉ុន្មានពីអំពើឆបោក២ករណីផ្សេងទៀត ដែលអ្នកស្រីធ្លាប់ជួបនោះដែរ។ប្រភពបន្តថាដំបូងឡើយ អ្នកស្រីបានបញ្ជាទិញសត្វឆ្មាតាមអនឡាញក្នុងតម្លៃព្រមព្រៀងគ្នាចន្លោះពី១០០ ទៅ២០០ដុល្លារអាមេរិក កាលពីថ្ងៃទី២២ ខែមីនា ឆ្នាំ២០២៦។ប៉ុន្តែដោយការចរចាគ្នា តម្លៃសត្វឆ្មានេះ ក៏ធ្លាក់ចុះមកនូវ៥០ដុល្លារវិញ។យ៉ាងនេះក្តី អ្នកស្រីអះអាងថា ក្រុមឧក្រិដ្ឋជន តម្រូវឲ្យខ្លួនបង់ប្រាក់កក់ជាមុនចំនួន១៥ដុល្លារសិន ជាថ្នូរមុននឹងដឹកទំនិញមក ឲ្យដូចបានកំណត់នៅក្នុងការចរចាគ្នា។
អ្នកស្រីបន្តថា៖ «ការចាញ់បោកអនឡាញហ្នឹង អ៊ីទិញឥវ៉ាន់គេ។ ទិញឆ្មាទិញឆ្មាហើយវាឱ្យអ៊ីហ្នឹងកក់លុយឱ្យវាមុន ឆ្មាហ្នឹងតម្លៃប៉ុន្មាន១០០ ដុល្លារ] ឬក៏២០០[ដុល្លារ] អ៊ីចឹងយើងត្រូវកក់គេមុនហើយមែនអត់? កក់គេមុនហើយ ដល់ពេលគេដឹកឥវ៉ាន់ឱ្យយើង បានយើងឱ្យលុយបង្រ្គប់។ ដល់ពេលអ៊ីកក់លុយគេមុនទៅ បានប៉ុន្មាន មួយថ្ងៃឬក៏ពីរថ្ងៃ គេតេរ គេតេរមកគេថា «បងៗសុំកក់លុយថែមទៀតបានអត់?» ខ្ញុំថាអត់ទេអត់កក់ថែមទេ។ទាល់តែឥវ៉ាន់មកដល់ដៃខ្ញុំៗបាញ់លុយឱ្យទាំងអស់ហ្មង។វាតេរមកអ៊ីប្រហែលជាពីរបីដងឱ្យកក់លុយមុនអ៊ីចឹង តែអ៊ីកក់តែម្ដងទេ […]មួយថ្ងៃពីរថ្ងៃ គេ block [បិទទំនាក់ទំនង]អ៊ីចោលបាត់»។
ស្រដៀងគ្នានេះដែរ ស្រ្តីម្នាក់ទៀតដែលមានឈ្មោះនៅលើបណ្តាញសង្គមហ្វេសប៊ុកថា Oun Ly និងថ្លែងក្នុងលក្ខខណ្ឌសុំមិនបញ្ចេញ និយាយថាជាលើកទីមួយហើយដែលខ្លួនត្រូវជនឆបោក ដកលុយចេញពីគណនី ធនាគារ អេស៊ីលីដា អស់ចំនួន១០០០ដុល្លារ កាលពីថ្ងៃទី២៣ ខែមីនា ឆ្នាំ២០២៦។ជាអ្នកលក់ម្អូបអាហារ នៅសង្កាត់ព្រែកប្រា ខណ្ឌច្បារអំពៅ អ្នកស្រីប្រាប់ថា មូលហេតុដែលខ្លួនចាញ់បោកគេតាមអនឡាញនេះ គឺតាមរយៈការបញ្ជាទិញទឹកអប់តាមហ្វេសប៊ុក។មុននឹងឈានដល់បាត់បង់លុយពីក្នុងគណនីធនាគារនេះ គឺក្រុមឧក្រិដ្ឋជនបានក្លែងធ្វើជាអ្នកដឹកឥវ៉ាន់ និងទំនាក់ទំនងអ្នកស្រីតាមទូរស័ព្ទ ដោយណាត់ពេលដើម្បីដឹកទំនិញដែលបានកម្ម៉ង់មកឲ្យ។រំពេចនោះ ឧក្រិដ្ឋជនបានល្បួងអ្នកស្រីឲ្យជួយផ្ញើលេខកូដពីសា SMS ចំនួន២ដងដែលគេផ្ញើជូននៅក្នុងទូរស័ព្ទដៃ។អ្នកស្រីបន្តថា ការធ្វើយ៉ាងនេះ ជនសង្ស័យអះអាងថា គឺដើម្បីផ្ទៀងផ្ទាត់ឥវ៉ាន់ បន្ទាប់ពីបានផ្ញើកូដតាមការស្នើសុំ។ក្រោយពីអនុវត្តតាម មិនយូរប៉ុន្មានលុយដែលមានក្នុងនៅក្នុងគណនីធនាគាររបស់ខ្លួន អ្នកស្រីបញ្ជាក់ថា ត្រូវបាត់បង់ដោយមិនដឹងខ្លួន។
អ្នកស្រីបន្តថា៖«ពេលយើងហៅលេខកូដ៦ខ្ទង់ឱ្យគាត់រួចហើយ គាត់ក៏ផ្ញើរលេខកូដថ្មីមួយទៀត ហើយគាត់ក៏ថាបងអើយអាលេខកូដទី១ដែលបងនិយាយហ្នឹងវាអត់ច្បាស់អញ្ចឹងបងឃើញលេខកូដថ្មីខ្ញុំផ្ញើរទៅ បងជួយហៅលេខកូដថ្មីម្ដងទៀត ខ្ញុំក៏ហៅលេខកូដថ្មីម្ដងទៀតទៅ។ ហៅលេខកូដ៦ខ្ទង់ហើយគាត់ក៏បិទទូរស័ព្ទធម្មតា គាត់ក៏ថាបន្តិចទៀតខ្ញុំដឹកឥវ៉ាន់ជូនបង[…]ដល់ពេលខ្ញុំមានអារម្មណ៍ដូចអត់សូវស្រួលកន្លះម៉ោងជាងអ៊ីចឹង អត់សូវស្រួលខ្ញុំក៏ឆែកទូរស័ព្ទទៅក៏ចូលឃើញគេដកលុយខ្ញុំបាត់អស់ហើយ ៥០០ ដុល្លារពីរដង »។
កាលពីពាក់កណ្តាលខែមេសា ឆ្នាំ២០២៦ កន្លងទៅនេះ អង្គភាពអ្នកនាំពាក្យរដ្ឋាភិបាល បានចេញសេចក្តីប្រកាសដោយបញ្ជាក់ថា ការបង្រ្កាប់បទល្មើសអនឡាញប្រមាណ៩ខែកន្លងទៅនេះ ស្ថាប័នជំនាញ នៃក្រសួងមហាផ្ទៃបង្រ្កាប់បានបទល្មើសតាមប្រព័ន្ធបច្ចេកវិទ្យាអនឡាញបានជាង២៥០ករណី។ក្នុងចំណោមនោះ បោសសំអាតទីតាំងកាស៊ីណូបានជិត១០០កន្លែង។របាយការណ៍បន្តថាក្រុមនគរបាលយុត្តិធម៌ ចាប់ឧក្រិដ្ឋជនទាំងខ្មែរ និងបរទេសបានជាង១ ០០០ពាន់នាក់ដែលមានជាប់ពាក់ព័ន្ធដោយផ្ទាល់នឹងបទល្មើសឆបោកនេះអនឡាញនេះ។មិនតែប៉ុណ្ណោះ ជនបរទេសជាង១០ ០០០ នាក់ត្រូវបណ្តេញចេញ ខណៈជាង២៤ ០០០នាក់ផ្សេងទៀត ស្ម័គ្រចិត្តចាកចេញពីកម្ពុជា។
បើទោះជាពុំមានរបាយការណ៍បញ្ជាក់ពីចំនួនជនជាតិចិនដែលជាប់ទាក់ទិននឹងបទល្មើសអនឡាញនេះ មានចំនួនប៉ុណ្ណាក្តី គេសង្កេតឃើញថាតាមរយៈការបណ្តេញចេញពីកម្ពុជា តាមជើងហោះហើរភាគច្រើនគឺជាជនជាតិចិន។តំបន់សេដ្ឋកិច្ចសំខាន់ៗមានដូចជាក្រុងព្រះសីហនុ ប៉ោយប៉ែត សំពៅពូន បាវិត និងតំបន់ម៉ឺនជ័យ ក្នុងខេត្តព្រៃវែង និងនៅថ្មដាខេត្តពោធិ៍សាត់ ជាដើម គឺជនជាតិចិនបានតាំងទីលំនៅមានចំនួនច្រើនជាងគេ។តាមរយៈការបង្រ្កាប់បទល្មើសអនឡាញ ក្នុងជំហានចុងក្រោយនេះវិញ គេសង្កេតឃើញ ជនជនជាតិចិននៅក្នុងតំបន់ទាំងនោះ បានរត់គេចខ្លួនពីការតាមប្រមាញ់របស់សមត្ថកិច្ច ក្នុងបរិមាណមួយដ៏ច្រើនលើសពីការស្មាន។
នៅចំពេលដែលមានកំណើនជនបរទេស ជាពិសេសជនជាតិចិន និងបទល្មើសអនឡាញ កើនឡើងនៅក្នុងប្រទេសកម្ពុជានេះ មានពលរដ្ឋខ្មែរមិនតិចនាក់ដែរទេ បានក្លាយជាជនរងគ្រោះដោយអំពើឆបោកតាមរយៈប្រព័ន្ធបច្ចេកវិទ្យានេះ។រូបភាព នៃការឆបោកមានទម្រង់ផ្សេងៗគ្នាពីមួយថ្ងៃទៅមួយថ្ងៃ តាមរយៈកម្ចីអនឡាញ បង់រំលោះទូរស័ព្ទដៃ ទិញរថយន្ត និងទិញសម្ភារៈតាមអឡាញក្នុងតម្លៃថោកជាងតម្លៃនៅលើទីផ្សារជាដើម។
ថ្លែងប្រាប់គេហទំព័រ Press Start Cambodia ក្នុងលក្ខខណ្ឌមិនបញ្ចេញឈ្មោះ បុរសម្នាក់ដែលអះអាងថា បានចាញបោកទិញរថយន្តតាមអនឡាញ ឲ្យដឹងថា ដំបូងឡើយរូបគេបានឃើញគេផ្សព្វផ្សាយពាណិជ្ជកម្មទិញលក់រថយន្តតាមគណនីហ្វេសប៊ុកឈ្មោះ AutoMart Cambodia។ហើយប្រភពក្រុមហ៊ុននេះ ដាក់ថានៅក្នុងទីក្រុងព្រៃនគរ ប្រទេសវៀតណាម។ប្រភពបន្តថា ខ្លួនបានចាញ់បោកក្នុងទំហំទឹកប្រាក់ជិត៥ម៉ឺនដុល្លារអាមេរិក តាមរយៈការល្បួង និងបញ្ចុះបញ្ចូលពីជនឆបោកដែលអះអាងថាជាបុគ្គលិកផ្នែកទីផ្សារដែលជាជនជាតិខ្មែរបម្រើឲ្យក្រុមជនឆបោកតាមអនឡាញនេះ។
ប្រភពបន្តថា៖«ខ្ញុំវាយករូបគេមកបោកខ្ញុំដែរទេ។ហើយវាថាវាអ្នកកាន់ផេកកាន់អី។អ្នកទីផ្សារយករូបគេមកតាំងនៅលើប្រូហ្វាល់ដែរហ្នឹង។ដល់ពេលខ្ញុំមើលចុះមើលឡើងទៅ ទើបដឹងថាចាញ់បោក។ហើយខ្ញុំក៏ឆាតសួរស្រីម្នាក់ហ្នឹងទៅគេថាគេបន្លំរូបគាត់យកទៅដើរបោកអ្នកផ្សេងទៀត។ហើយគណនីដែលខ្ញុំបាញ់លុយទៅហ្នឹងគឺចូលទៅឈ្មោះ Foo Vun Yen តែទាំងអស់ហ្នឹង។ខ្ញុំវេរលុយទៅ ពី១២ ទៅ១៣ដងណោះ ខ្ញុំវេរចេញទៅហ្នឹង »។
ជុំវិញករណីនេះលោកបណ្ឌិត មាស នី អ្នកស្រាវជ្រាវការអភិវឌ្ឍសង្គម ឯកភាពថាករណីបទល្មើសឆបោកនេះ ឧក្រិដ្ឋជនបានបើប្រាស់រូបភាពផ្សេងៗ និងថ្មីរហូត។មិនតែប៉ុណ្ណោះ លោកសង្កេតឃើញថាការឆបោកអនឡាញ កំពុងរីករាលដាលនៅកម្ពុជា ក្រោមរូបភាពលក់ផលិតផលគ្មានគុណភាព បោកបញ្ឆោតឱ្យខ្ចីប្រាក់ និងឈានដល់ការជួញដូរមនុស្សជាដើម។
លោកបន្តថា៖«រឿងដែលខ្ញុំបារម្ភមួយរឿងជួញដូមនុស្ស Scam អនឡាញ គួរចែកជា២ ទី១ច្បាប់ស្តីពី Scam អនឡាញ ទី២ភ្ជាប់របរអនឡាញទៅជាការត់ពន្ធមនុស្ស ដើម្បីបោកប្រាស់មនុស្សយកមកធ្វើការ»។
ដោយឡែក របាយការណ៍របស់អគ្គនាយកដ្ឋានអន្តោប្រវេសន៍ នៃក្រសួងមហាផ្ទៃវិញដែលចេញកាលពីថ្ងៃទី១៩ ខែមេសា ឆ្នាំ២០២៦ បង្ហាញថាមានជនបរទេសជាង១ ០០០នាក់ ក្នុងចំណោម២៨សញ្ជាតិ ដែលត្រូវស្ថាប័នជំនាញបណ្តេញចេញពីកម្ពុជា ក្នុងនោះមានដូចជា មីយ៉ាន់ម៉ា នេប៉ាល់ វៀតណាម ឥណ្ឌា ក្រៅពីនេះ មានជនជាតិចិនខ្លះដែរ។
ជុំវិញបទល្មើសឧក្រិដ្ឋកម្មអនឡាញនេះ សហរដ្ឋអាមេរិក និងអង់គ្លេសបង្ហាញការមិនពេញចិត្តមុនគេ ក្រោយពលរដ្ឋរបស់ខ្លួន ត្រូវចាញ់បោកតាមរយៈបទល្មើសបច្ចេកវិទ្យានេះ អស់លុយក្នុងកម្រិតមួយដែលខ្ពស់ពុំធ្លាប់ ដោយរកឃើញថាមេឈ្មួញធំៗ ជាជនជាតិចិនមានខ្លះដែលទទួលបានសញ្ជាតិកម្ពុជា កំពុងសម្ងំលាក់ខ្លួនក្នុងបទល្មើសប្រព័ន្ធបច្ចេកវិទ្យាអនឡាញដ៏ធំជាងគេ នៅតំបន់អាស៊ីអាគ្នេយ៍នេះ។
តាមរយៈរបាយការណ៍របស់ខ្លួន សហរដ្ឋអាមេរិក និងចក្រភពអង់គ្លេស សហការគ្នារឹបអូសទឹកប្រាក់បានចំនួន ១៥ពាន់លានដុល្លារអាមេរិកជា bitcoin ពាក់ព័ន្ធនឹងរូបិយប័ណ្ណគ្រីបតូរបស់ប្រធានក្រុមហ៊ុន Prince Holding Group (Prince Group) របស់លោក ចេន ហ្ស៊ី (Chen Zhi) ដែលជាជនជាតិចិនសញ្ជាតិខ្មែរ។កាលពីថ្ងៃទី១៤ ខែតុលា ឆ្នាំ២០២៥ ក្រសួងយុត្តិធម៌អាមេរិក បាននិយាយថា ខ្លួនរឹបអូសបានក្នុងទំហំទឹកប្រាក់ដ៏ច្រើនពាន់លានដុល្លារនេះ គឺមានជាប់ពាក់ព័ន្ធនឹងគំរោងរូបិយប័ណ្ណគ្រីបតូ របស់ក្រហ៊ុនព្រីនស៍ ស្របពេលដែលក្រុមហ៊ុនជាង១ ០០ក្រុមហ៊ុនផ្សេងទៀត របស់លោក ចេន ហ្ស៊ី (Chen Zhi) ក៏រងការចោទប្រកាន់ពាក់ព័ន្ធនឹងឧក្រិដ្ឋកម្មនេះដូចគ្នាដែរ។
ភ្ជាប់ទៅនឹងសំណុំរឿង នៃបទល្មើសអនឡាញនេះ កាលពីថ្ងៃទី២៣ ខែមេសា ឆ្នាំ២០២៦ ក្រសួងរតនាគារសហរដ្ឋអាមេរិក បានដាក់ទណ្ឌកម្មលោក កុក អាន ជាសមាជិកព្រឹទ្ធសភា កូតាមកពីគណបក្សប្រជាជនកម្ពុជា និងជាអ្នកជំនួញដ៏មានឥទ្ធិពល រួមទាំងអង្គភាព២៨ផ្សេងទៀត ក៏ត្រូវជាប់ទណ្ឌកម្មនេះដូចគ្នាដែរ។
បើតាមការិយាល័យគ្រប់គ្រងទ្រព្យសម្បត្តិ នៃក្រសួងហិរញ្ញវត្ថុអាមេរិក អ្នកទាំងនេះត្រូវរងការចោទប្រកាន់ពីបទពាក់ព័ន្ធនឹងបណ្តាញឧក្រិដ្ឋកម្មឆបោកតាមអនឡាញ (Cyber Scam) ដែលធំជាងគេនៅក្នុងតំបន់អាស៊ីអាគ្នេយ៍នេះ។
ដោយសារតែបញ្ហានេះ នៅក្នុងជម្លោះព្រំដែនរវាងកម្ពុជាថៃនៅអំឡុងខែកក្កដា ឆ្នាំ២០២៥ រហូតបង្កើតឲ្យទៅជាសង្រ្គាមប្រដាប់អាវុធកើតឡើង នៅតាមខ្សែបន្ទាត់ព្រំដែននៃប្រទេសទាំងពីរ។ភាគីថៃបានរុញបញ្ហានៃបទល្មើសបច្ចេកវិទ្យាអនឡាញនេះ ធ្វើជាលេសក្រោមរូបភាពវាយចូលកាន់កាប់ដែនអធិបតេយ្យភាពកម្ពុជាបានជាច្រើនទីតាំងរហូតមកដល់ពេលបច្ចុប្បន្ន។
មេដឹកនាំទីក្រុងបាងកកទាំងយោធា និងស៊ីវិល បានបដិសេធម្តងហើយម្តងទៀតតាមរយៈកាសែតក្នុងស្រុករបស់ខ្លួនថា ការប៉ះទង្គិចគ្នាដោយកម្លាំងប្រដាប់អាវុធនេះ ដោយសារថៃបានព្យាយាមបំបែកសំបុកបទល្មើសអនឡាញ ដែលមាននៅក្នុងទឹកដីកម្ពុជាតាមកាស៊ីណូធំៗនៅតាមព្រំដែន។ហើយជារូបភាព ដើម្បីឲ្យអន្តរជាតិមើលឃើញថា ការឈ្លានពានកម្ពុជាដោយឯកតោភាគី ក្រោមរូបហេតុផលទប់ស្កាត់បទល្មើសអនឡាញនេះ ភាគីថៃបានព្យាយាមផ្តាច់ប្រព័ន្ធអ៊ីនធើណេត និងផ្អាកការផ្គត់ផ្គង់ទឹកភ្លើងនៅតាមជួរបន្ទាត់ព្រំដែន នៃច្រកប៉ោយប៉ែត និងអូរស្មាច់ជាដើម។
ឆ្លើយតបនឹងប្រតិកម្មពីសហគមន៍អន្តរជាតិ និងមានការទាមទារពីរដ្ឋាភិបាលទីក្រុងប៉េកាំងផង កម្ពុជាសម្រេចចិត្តចាប់លោក ចេន ហ្ស៊ី (Chen Zhi) ដែលជាជនជាតិចិនសញ្ជាតិខ្មែរ និងអង់គ្លេស រួមទាំងមនុស្ស២នាក់ទៀត បញ្ជូនទៅចិនវិញ។ការចាប់ខ្លួនដែលអនុវត្ត កាលពីខែមករា ឆ្នាំ២០២៦ ធ្វើឡើង៣ខែបន្ទាប់ពីសហរដ្ឋអាមេរិក និងអង់គ្លេសរួមគ្នា រឹបអូសទ្រពសម្បត្តិរបស់មហាសេដ្ឋីចិនរូបនេះ ក្នុងទំហំទឹកប្រាក់រាប់ពានលានដុល្លារ។ក្រៅពីនេះ ខ្សែបណ្តាញរបស់លោក ចេន ហ្ស៊ី ម្នាក់ទៀតឈ្មោះ លី ស្យុង (LI XIONG ) ក៏ត្រូវក្រសួងមហាផ្ទៃធ្វើបត្យាប័នទៅស្រុកចិនវិញដែរ។ការបញ្ជូនជនសង្ស័យដែលមានឥទ្ធិពលម្នាក់ទៀត ដែលមានជាប់ពាក់ព័ន្ធនឹងបទល្មើសឧក្រិដ្ឋកម្មអនឡាញ កាលពីថ្ងៃទី៣១ ខែមីនា ឆ្នាំ២០២៦ គឺជាអនុវត្តក្រោយពីរដ្ឋការទីក្រុងប៉េកាំង ស្នើឲ្យកម្ពុជាធ្វើបត្យាប័នបន្ថែម ក្នុងទិសដៅបោសសំអាតបទល្មើសអនឡាញ។
គេសង្កេតឃើញថានៅចំពេលដែលពិភពលោក និងតំបន់ កំពុងផ្តោតលើកម្ពុជាជុំវិញបទល្មើសអនឡាញនេះ។រដ្ឋាភិបាលបានតាក់តែងច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យាបន្ទាន់ភ្លាម។ច្បាប់ដែលមាន៥ជំពូក និង២៤មាត្រានេះ ត្រូវសមាជិកសភាដែលមកពីគណបក្សកាន់អំណាចលើសលប់អនុម័តកាលពីទី៣០ ខែមីនា ឆ្នាំ២០២៦ ក្នុងសំឡេង ១១២ លើ១១២គាំទ្រ។
ទាក់ទិនបទល្មើសអនឡាញនេះ មិនមែនមានតែជនរងគ្រោះដែលចាញ់បោកតាមរយៈរូបភាពទិញ-លក់ដែលមានតម្លៃថោកជាងទីផ្សារទេ។ក្នុងន័យនេះ នៅមានពលរដ្ឋកម្ពុជាផ្សេងទៀត ត្រូវធ្លាក់ចូលក្នុងអន្ទាក់នៃការបោកបញ្ចោត ស្វែងរកការងារធ្វើតាមប្រព័ន្ធបច្ចេកវិទ្យានេះដោយមិនដឹងខ្លួនក៏បានដែរ។
លោក អ៊ុយ អឿន ជាអ្នកខេត្តកំពង់ចាម និងធ្វើចំណាកស្រុកទៅខេត្តរតនគិរី ដែលអះអាងថាជាឱពុករបស់យុវតីម្នាក់ឈ្មោះ យឹម ស្រីឡែន វ័យ១៧ឆ្នាំ និយាយថាដំបូងឡើយកូនស្រីរបស់ខ្លួន បានស្វែងរកការងារធ្វើនៅទីក្រុងភ្នំពេញ ក្រោយពីរូបនាងទើបតែបញ្ចប់ថ្នាក់មធ្យមសិក្សាទុតិយភូមិថ្មីៗ។តែជាសំណាងមិនល្អ ថ្ងៃជិះឡានពីខេត្តរតនគិរីទៅភ្នំពេញ កូនស្រីលោក និងមិត្តភក្តិពីរនាក់ទៀតរបស់នាង បានជួបមនុស្សដែលពុំធ្លាប់ស្គាល់គ្នា និងធ្វើដំណើរក្នុងឡានឆ្ពោះមកភ្នំពេញជាមួយគ្នា។ក្នុងពេលធ្វើដំណើរជនសង្ស័យបានប្រាប់ថា មានការងារមួយកន្លែងឲ្យពួកគេធ្វើនៅខេត្តស្វាយរៀង ទទួលបន្ទុកផ្នែកវាយកំព្យូទ័រ។ហើយការងារនេះ ធ្វើជាមួយជនជាតិចិន និងទទួលបានប្រាក់ខែខ្ពស់ទៀតផង។
លោកបន្តថា៖ «ពុកអើយកន្លែងហ្នឹងតឹងណាស់ គេឱ្យវាយកុំព្យូទ័ររបៀបបោក ខ្ញុំចូលមកគេឃុំខ្លួនអត់ឱ្យចេញទេ ចេញអត់រួចទេ ទាល់តែរយៈពេលបីខែបានចេញបាន »។
បើតាមលោក អ៊ុយ អឿន លោកទទួលបានដំណឹងមកថា ក្រោយពេលកូនស្រីរបស់ខ្លួនចូលធ្វើការបានមិនបានប៉ុន្មានផង កម្លាំងសមត្ថកិច្ចបានចុះបង្ក្រាបទីតាំងនោះ ហើយកញ្ញា ស្រីឡែន រួមជាមួយមនុស្សជាច្រើនទៀតត្រូវកម្លាំងបង្រ្កាប់បទល្មើសបច្ចេកវិទ្យាចាប់ខ្លួន។លោក អឿន បានបញ្ជាក់ថា កូនស្រីលោកត្រូវបានឃុំខ្លួនអស់រយៈពេលជាង ៥ ខែមកហើយក្រោយចាប់ខ្លួន។ស្របពេលជាមួយនេះ ឱពុកជនរងគ្រោះ អំពាវនាវឲ្យស្ថាប័នជំនាញដោះលែងកូនស្រីរបស់ខ្លួន ឲ្យមានសេរីភាពវិញ ខណៈរូបគេ និងមនុស្សផ្សេងទៀត គឺជាជនរងគ្រោះដោយបទល្មើសអនឡាញនេះប៉ុណ្ណោះ។
លោកបន្តថា៖«អារម្មណ៍អ៊ំលែងនិយាយហើយ ព្រោះចង់ឆ្កួតហើយ មិនពឹងពាក់ពីណាអីពីណា តាមដំណើរទៅ។ អត់មានមេធាវីការពារអីទេក្មួយអើយ […]ខ្ញុំអ្នកជនបទខ្ញុំអត់ដឹងទេ តែពេលកូនខ្ញុំទៅ គេចាប់កូនខ្ញុំរួច បានគេប្រកាសថា Online ខុសច្បាប់អញ្ជេះអញ្ជុះ អ៊ីចឹងបានខ្ញុំដឹងថា អូកូនយើងគេចាប់មកពីអ៊ីចឹង ។ក្មេងៗមុនធ្វើការពិនិត្យឱ្យច្បាស់លាស់ ប្រយ័ត្នត្រូវគេពន្លួងដូចកូនខ្ញុំអញ្ជឹង ពិបាកវេទនាណាស់ ជំពាក់ធនាគារផង កូនជាប់ពន្ធនាគារទៀត សព្វថ្ងៃចង់ឆ្កួតហើយក្មួយអើយ ប្អូនកូនទាំងអស់ហ្នឹង មុនធ្វើអ្វីឱ្យច្បាស់លាស់ កុំជឿតាមគេ»។
ក្រៅពីនេះ អ្នកនាំពាក្យរងក្រសួងមហាផ្ទៃ លោក ទូច សុឃៈ លើកឡើងថា រដ្ឋាភិបាលកម្ពុជាមានឆន្ទៈ ក្នុងការប្រយុទ្ធប្រឆាំងនឹងបទល្មើសឆបោកតាមប្រប័ន្ធបច្ចេកវិទ្យានេះ តាមរយៈការបង្កើតឲ្យមានគណៈកម្មការចំពោះកិច្ចជាដើម។ហើយអ្នកដែលពាក់ព័ន្ធ ក្រោយសមត្ថកិច្ចចាប់ខ្លួនបានត្រូវចែកដាច់ដោយឡែកពីគ្នារវាងជនរងគ្រោះ និងជនល្មើស។ហើយប្រសិនបើរកឃើញថាអ្នកដែលត្រូវចាប់ខ្លួន ជាអ្នកដែលរងគ្រោះប្រាកដណាស់ ពួកគេនឹងត្រូវផ្តល់សេរីភាពឲ្យវិញ ក្រោយបញ្ចប់នីតិវិធី។
លោកបន្តថា៖ «បើសិនជាជនជាតិខ្មែរយើងទៅទៀត ពីមុនមកមិនសូវរកឃើញទេ។ មួយរយៈចុងក្រោយនេះយើងរកឃើញថាមានបងប្អូនជាជនជាតិខ្មែរយើងនៅក្នុងទីតាំងដែលយើងប្រតិបត្តិការបោសសម្អាតនឹងដែរ។ ដូចគ្នាគឺយើងបែងចែកចេញជាពីរ គឺរកឃើញថាជាជនល្មើសឬក៏ជាជនរងគ្រោះ។ មិនមែនយកមកទាញថាជាជនល្មើសទាំងអស់ទេ។ហើយក៏មិនមែនសន្មតិជារួមថាជាជនរងគ្រោះទាំងអស់ដែរ។ក៏ប៉ុន្ដែតាមការប្រតិបត្តិការជាក់ស្ដែងនេះ យើងឃើញថាសម្រាប់ពលរដ្ឋខ្មែរយើងគឺភាគតិចណាស់ដែលគាត់ជាអ្នកដែលទៅប្រព្រឹត្តបទល្មើសអញ្ចឹងភាគច្រើនបានន័យថាគាត់ចាញ់បោកគេដែរអូសទាញលួងលោមបញ្ឆោតដោយប្រការនេះប្រការនោះហើយមិនបានយល់ពីអំពើល្មើសហ្នឹង »។
ស្របពេលរដ្ឋាភិបាលបានបង្កើតច្បាប់ប្រយុទ្ធប្រឆាំងបទល្មើសបច្ចេកវិទ្យា និងការប្តេជ្ញាចិត្តរបស់លោកនាយករដ្ឋមន្រ្តី ហ៊ុន ម៉ាណែត ក្នុងការបោសសំអាតឲ្យអស់អ្នកដែលពាក់ព័ន្ធនឹងបទល្មើសអនឡាញនេះក្តី រីឯអង្គការលើកលែងទោសអន្តរជាតិ(Amnesty International ) បានចេញផ្សាយរបាយការណ៍ស៊ើបអង្កេតរបស់ខ្លួន ដែលចេញកាលពីថ្ងៃទី២ ខែមីនា ឆ្នាំ២០២៦ បង្ហាញថា កាស៊ីណូចំនួន១២ទីតាំងនៅកម្ពុជា នៅតែបន្តអនុញ្ញាតឱ្យដំណើរការ ទោះបីជារដ្ឋាភិបាលបានប្តេជ្ញាបង្ក្រាបទូទាំងប្រទេសលើឧស្សាហកម្មខុសច្បាប់នេះក៏ដោយ។មិនតែប៉ុណ្ណោះ ពាក់ព័ន្ធនឹងអំពើឆបោកតាមអនឡាញ ការជួញដូរមនុស្ស និងពលកម្មដោយបង្ខំ តាមរយៈការស៊ើបអង្កេត បង្ហាញថាករណីរំលោភបំពានមានចំនួន១២ករណីនៅតែបន្តកើតមាន។នេះបើផ្អែកលើទិន្នន័យពីរូបភាពផ្កាយរណប ការចុះពិនិត្យទីតាំង និងការផ្តល់សក្ខីកម្មពីអ្នករងគ្រោះ ដែលចេញដោយអង្គការលើកលែងទោសអន្តរជាតិ Amnesty International ។
បើទោះជាបែបណា ២ថ្ងៃបន្ទាប់ពីរបាយការណ៍ស៊ើបអង្កេតរបស់ អង្គការលើកលែងទោសអន្តរជាតិ(Amnesty International ) បានបង្ហាញពីសកម្មភាពបទល្មើសអនឡាញនៅតែបន្តកើតមាន លោកនាយករដ្ឋមន្រ្តី ហ៊ុន ម៉ាណែត បានប្តេជ្ញាជាថ្មីទៀតថា រដ្ឋាភិបាលកម្ពុជាបានផ្លាស់ប្ដូរដោយម៉ឺងម៉ាត់នូវគោលនយោបាយជាតិក្នុងការទប់ស្កាត់ និងលុបបំបាត់ទាំងស្រុងនូវមជ្ឈមណ្ឌលឆបោកតាមប្រព័ន្ធបច្ចេកវិទ្យាឱ្យអស់គិតត្រឹមខែមេសា ឆ្នាំ២០២៦ ក្នុងន័យដើម្បីផ្ដល់បរិយាកាសល្អសម្រាប់ការវិនិយោគទាំងក្នុងតំបន់ និងពិភពលោក។
ទាក់ទិនសំណុំរឿងនេះ នាយកផ្នែកតស៊ូមតិ និងសិទ្ធិមនុស្សប្រចាំតំបន់អាស៊ី លោក Phil Robertson បានលើកឡើងនៅលើទំព័រហ្វេសប៊ុករបស់ខ្លួន កាលពីថ្ងៃទី១៨ កក្កដា ដោយបង្ហាញទុទិដ្ឋិនិយមថា អ្វីដែលលោកនាយករដ្ឋមន្រ្តី ហ៊ុន ម៉ាណែត ធ្វើនេះវាគ្រាន់តែជាឆាកល្ខោនទេ។អ្នកជំនាញផ្នែកសិទ្ធិមនុស្សអន្តរជាតិរូបនេះ ពុំមានជំនឿថា ផែនការនេះអាចដោះបញ្ចប់បានលឿននោះឡើយ ព្រោះបទល្មើសបច្ចេកវិទ្យានេះ វាបានដុះស្លែជាយូរមកហើយនៅកម្ពុជា៕