កម្ពុជាចាត់ទុកដំណើរទស្សនកិច្ចរបស់នាយករដ្ឋមន្ត្រីថៃទៅកាន់តំបន់អានសេះក្នុងខេត្តព្រះវិហារនាពេលថ្មីៗនេះថា ជាការរំលោភបំពានធ្ងន់ធ្ងរ និងប៉ុនប៉ងដោយចេតនា ដើម្បីអះអាងសិទ្ធិកាន់កាប់ខុសច្បាប់លើអធិបតេយ្យរបស់កម្ពុជា។
តាមសេចក្តីប្រកាសព័ត៌មាន ថ្ងៃទី២៥ ខែសីហា ឆ្នាំ២០២៦នេះ ក្រសួងការបរទេសកម្ពុជាបានអះអាងថា ដំណើរទស្សនកិច្ចរបស់នាយករដ្ឋមន្ត្រីថៃលោក អនុធិន ឆាវីរៈគូន ទៅតំបន់អានសេះ ក្នុងស្រុកជាំក្សាន្ត ខេត្តព្រះវិហារកាលពីថ្ងៃទី២៣ ខែសីហា ឆ្នាំ២០២៦ គឺធ្វើឡើងដោយគ្មានការអនុញ្ញាត ហើយដំណើរទស្សនកិច្ចនៅតំបន់ ដែលត្រូវបានកម្លាំងប្រដាប់អាវុធថៃកាន់កាប់ដោយខុសច្បាប់តាំងពីឆ្នាំមុននេះ មិនអាចផ្តល់សិទ្ធិស្របច្បាប់ណាមួយលើអធិបតេយ្យរបស់កម្ពុជានោះឡើយ។
សេចក្តីប្រកាសព័ត៌មានសរសេរថា៖ “ការកាន់កាប់ដោយខុសច្បាប់លើដែនដីអធិបតេយ្យរបស់កម្ពុជា មិនអាចធ្វើឱ្យមានភាពស្របច្បាប់ តាមរយៈការធ្វើទស្សនកិច្ចរបស់នាយករដ្ឋមន្ត្រីថៃនេះបានឡើយ ”។
ក្រសួងការបរទេសកម្ពុជាបញ្ជាក់ទៀតថា ដំណើរទស្សនកិច្ចរបស់នាយករដ្ឋមន្ត្រីថៃនេះ គឺជាការរំលោភបំពានធ្ងន់ធ្ងរលើអធិបតេយ្យរបស់កម្ពុជាដែលបានកំណត់ដោយផែនទីខ្នាត ១:២០០.០០០ រំលោភលើចំណុចទី១ នៃសេចក្តីប្រកាសរួមរបស់គណៈកម្មាធិការព្រំដែនទូទៅ (GBC) ឆ្នាំ២០២៥ ហើយថា ផែនទីដែលគូសដោយឯកតោភាគី ឬដំណើរទស្សនកិច្ចណាមួយផ្អែកលើផែនទីបែបនេះ មិនអាចផ្លាស់ប្តូរខ្សែព្រំដែនដែលបានទទួលស្គាល់ជាអន្តរជាតិបានឡើយ។
កម្ពុជាបញ្ជាក់ជាថ្មីថា នឹងមិនទទួលស្គាល់ជាដាច់ខាតនូវខ្សែបន្ទាត់ព្រំដែនឬការទាមទារទឹកដីជាឯកតោភាគីរបស់ប្រទេសថៃ ហើយដំណើរទស្សនកិច្ចនេះ មិនប៉ពាល់ដល់សិទ្ធិស្របច្បាប់ឬជំហររបស់ព្រះរាជាណាចក្រកម្ពុជាទាក់ទងនឹងព្រំដែនអន្តរជាតិរបស់ខ្លួនឡើយ។
ជាមួយគ្នានេះដែរ កម្ពុជាទាមទារឱ្យថៃបញ្ឈប់សកម្មភាពនៅក្នុងតំបន់ខាងលើនិងតំបន់ផ្សេងទៀតដែលកំពុងកាន់កាប់ដោយខុសច្បាប់ដោយកងកម្លាំងប្រដាប់អាវុធថៃតាំងពីឆ្នាំមុន ដើម្បីបន្ធូរបន្ថយស្ថានការណ៍និងសម្រួលដល់ការដោះស្រាយដោយសន្តិវិធី៕
អត្ថបទដោយ៖ ធី វណ្ណា