ពលរដ្ឋ និងសង្គមស៊ីវិល បង្ហាញក្តីបារម្ភពីបញ្ហាសន្តិសុខ សុវត្ថិភាព ក្រោយមានការចែកចាយលើបណ្តាញសង្គមជាថ្មីទៀត ពាក់ព័ន្ធនឹងសកម្មភាពក្មេងទំនើងបង្ហោះម៉ូតូ និងវាយតប់គ្នានៅតាមដងផ្លូវ នៅបណ្តារាជធានី និងខេត្តមួយចំនួន ដែលការណ៍នេះ ពួកគាត់បានស្នើឱ្យអាជ្ញាធរពាក់ព័ន្ធបន្តចុះបង្រ្កាបឱ្យប្រសិទ្ធភាព និងពង្រឹងការអនុវត្តច្បាប់ឱ្យតឹងរឹង ដើម្បីភូមិឃុំមានសុវត្ថិភាព។
ការព្រួយបារម្ភនេះ ក្រោយពីមានការចែកចាយវីអូដេលើបណ្តាញសង្គម ពីសកម្មភាពក្រុមក្មេងទំនើងបន្តវាយដំ កាប់ចាក់គ្នា និងបង្ហោះម៉ូតូយ៉ាងអាណាធិបតេយ្យ នៅតាមដងផ្លូវមួយចំនួន។ ជាក់ស្តែង កាលពីយប់ថ្ងៃទី៦ ខែមេសា ឆ្នាំ២០២៦ មានករណីក្រុមក្មេងទំនើងមួយក្រុម បានបង្កភាពចលាចលវាយគ្នា និងបង្ហោះម៉ូតូឌឺដងគ្នា នៅសង្កាត់ផ្សារកណ្តាលទី១ ខណ្ឌដូនពេញ រាជធានីភ្នំពេញ។
លើសពីនេះ កាលពីថ្ងៃទី៥ ខែមេសានេះដែរ ក្រុមក្មេងទំនើងមួយក្រុមទៀត បានវាយដំ កាប់ចាក់គ្នា បង្កការអុកឡុងធ្វើឱ្យផ្អើលភ្ញៀវទេសចរជាតិនិងអន្តរជាតិ ក្នុងពិធីសង្រ្កាន្តឆ្នាំថ្មីមួយ នៅក្រុងព្រះសីហនុ។
កាលពីរសៀលថ្ងៃទី០៣ ខែមេសា ទំព័រហ្វេសប៊ុកសារព័ត៌មាន FNP News ក៏បានបង្ហាញនូវរូបភាពជាច្រើនសន្លឹក ជុំវិញករណីក្មេងទំនើងពីរក្រុមវាយគ្នានៅតាមដងផ្លូវ បន្ទាប់ពីចេញពីសង្ក្រាន្តស្រែតានង ស្ថិតក្នុងមូលដ្ឋានស្រុកមេមត់ ខេត្តត្បូងឃ្មុំ។
បន្ថែមពីនេះ កាលពីថ្ងៃទី៣០ ខែមីនា ឆ្នាំ២០២៦ កងរាជអាវុធហត្ថខេត្តកំពង់ចាម បានចុះស្រាវជ្រាវក្នុងករណីហិង្សាដោយចេតនា បង្កដោយក្មេងទំនើងមួយក្រុម មានគ្នាប្រហែល១០នាក់ បង្កហិង្សាវាយកាប់គ្នា នៅចំណុចភូមិទី១៥ សង្កាត់កំពង់ចាម ក្រុងកំពង់ចាម ខេត្តកំពង់ចាម។
ជុំវិញរឿងនេះ ពលរដ្ឋរស់នៅខេត្តកំពង់ចាម លោក ឃីម សុខុម បានប្រាប់ Press Start Cambodia នៅថ្ងៃទី០៧ ខែមេសាថា បច្ចុប្បន្ននេះ បញ្ហាក្មេងទំនើងបានបង្កជាហានិភ័យ និងភាពភ័យខ្លាចពីអសន្តិសុខ និងសុវត្ថិភាពក្នុងសង្គម ទាំងនៅទីក្រុង និងជនបទ។ ស្របពេលរដូវកាលចូលឆ្នាំខ្មែរមកដល់ ដែលតាមភូមិ និងវត្តអារាម មានរៀបចំកម្មវិធីលេងល្បែងប្រជាប្រិយខ្មែរ និងការរាំរែកតាមបែបប្រពៃណី លោកក៏សង្កេតឃើញករណីក្មេងទំនើងវាយតប់គ្នាហាក់កក្រើកឡើងវិញ ដែលការណ៍នេះ លោកស្នើដល់អាជ្ញាធរមានសមត្ថកិច្ចបង្កើនការទប់ស្កាត់ និងបង្ក្រាបបញ្ហានេះឱ្យមានប្រសិទ្ធភាព ដើម្បីភូមិឃុំមានសុវត្ថិភាព ក៏ដូចជាជៀសវាងផលប៉ះពាល់ដល់មុខមាត់ប្រទេសជាតិ។
លោកថា៖ «អូរ៍! បញ្ហាក្មេងទំនើងនេះ មិនមែនទើបតែកើតទេ ពីរបីឆ្នាំមកនេះ ខ្ញុំឃើញផ្ទាល់ផង ឃើញតាមបណ្តាញសង្គមផង ពាសពេញហ្នឹង ខ្លះកាប់គ្នាអាណាធិបតេយ្យ ខ្លះបង្ហោះម៉ូតូ វាយគ្នា បង្កការរំខានដល់ពលរដ្ឋ ប៉ះពាល់ទៅដល់សុវត្ថិភាពពលរដ្ឋ ជាពិសេសឱ្យតែមានបុណ្យទាន ចាក់ប៉ាស់ ពួកក្មេងទំនើងដឹងតែបង្កការរំខានវ៉ៃគ្នា»។
ចំណែក ពលរដ្ឋរស់នៅខេត្តបាត់ដំបងម្នាក់ទៀត គឺលោក ជុំ ឧទិត្យ បាននិយាយថា រឿងបញ្ហាក្មេងទំនើងនេះ មិនមែនទើបតែកើតឡើងនោះទេ គឺតាំងពីឆ្នាំមុនឆ្នាំ២០២៥ ទោះបីរដ្ឋាភិបាលព្យាយាមបង្រ្កាប និងទប់ស្កាត់ក៏ដោយ។
លោកបន្តថា ការកើនឡើងនៃក្មេងទំនើង អាចកើតឡើងមកពីកត្តាបីសំខាន់ៗ ទី១ ប្រព័ន្ធអប់រំនៅមានកម្រិត ទី២ ការអនុវត្តច្បាប់លើក្មេងទំនើងនៅមានភាពធូរលុង និងទី៣ ការប្រើប្រាស់គ្រឿងស្រវឹង និងគ្រឿងញៀនជាដើម។
លោកបារម្ភដែរថា បើបញ្ហាក្មេងទំនើងនេះ មិនត្រូវបានដោះស្រាយឱ្យមានប្រសិទ្ធភាព ឬអាចឈានដល់ការលុបបំបាត់ទេនោះ វានឹងបន្តបង្កអសន្តិសុខសង្គម បង្កការភ័យខ្លាចដល់សហគមន៍ និងប៉ះពាល់ទៅដល់ការអភិវឌ្ឍប្រទេសជាតិ។
លោកថា៖ «ខ្ញុំមានការព្រួយបារម្ភខ្លាំង អារឿងក្មេងទំនើងនេះ វាកើតឡើងជាហូរហែរ។ ខ្ញុំយល់ថា ករណីកើនឡើងនៃបញ្ហាក្មេងទំនើងមកពីកត្តាច្រើន អាចថាមកពីប្រព័ន្ធអប់រំដែរ ព្រោះប្រព័ន្ធអប់រំជាថ្នាល់បណ្តុះបណ្តាលមនុស្ស មួយទៀតបញ្ហាគ្រឿងស្រវឹងផ្សព្វផ្សាយច្រើននោះ ខ្លាចក្មេងមិនដឹង យើងដឹងហើយថា កាលណាស្រាចូលក្មេង វាគ្រប់គ្រងសតិមិនបាន វានាំគ្នាវ៉ៃគ្នាក៏បាន មួយទៀតបញ្ហាគ្រឿងញៀនដែលនាំឱ្យក្មេងវាទំនើង ខូចក្មេងអស់»។
ជាមួយគ្នានេះ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត ក៏សង្កេតឃើញមានការផ្សព្វផ្សាយច្រើននៅលើបណ្តាញសង្គម ពីបញ្ហាក្មេងទំនើងដែលបង្ហោះម៉ូតូ និងវាយដំគ្នាតាមដងផ្លូវកើតឡើងច្រើនផងដែរ បើទោះបីជារាជរដ្ឋាភិបាលបានព្យាយាមបង្រ្កាប និងដាក់ចេញនូវគោលការណ៍ច្បាប់ ឬវិធានការរឹតបន្តឹងយ៉ាងណាក៏ដោយ។
លោកថា៖ «ខ្ញុំសង្កេតឃើញមួយរយៈនេះ លើបណ្តាញសង្គម មានក្មេងទំនើងកាប់ចាក់គ្នាពេញណាពេញណី។ ពួកក្មេងទំនើងនេះ ដូចមិនចប់មិនចេះហើយ បង្រ្កាបមិនអស់សោះ បើទោះបីកន្លងទៅ រដ្ឋាភិបាលព្យាយាមដាក់ចេញនូវវិធានការតឹងរឹងយ៉ាងណាក៏ដោយ បញ្ហាក្មេងទំនើងនេះនៅមានដដែល។ យ៉ាងណា ខ្ញុំគិតថា បញ្ហានេះរដ្ឋាភិបាល និងអាជ្ញាធរពាក់ព័ន្ធត្រូវរឹតបន្តឹងបន្ថែមទៀត ជៀសវាងបង្កអសន្តិសុខសង្គម ប៉ះពាល់មុខមាត់ជាតិដែរ»។
យ៉ាងណា លោក អំ សំអាត នៅតែទទូចស្នើឱ្យរាជរដ្ឋាភិបាល បន្តអនុវត្តវិធានការបង្រ្កាប និង ចាប់ឃាត់ខ្លួនក្រុមក្មេងទំនើងទាំងនោះ យកទៅអប់រំ កែប្រែ ដើម្បីឱ្យពួកគេក្លាយខ្លួនជាពលរដ្ឋថ្មី យុវជនថ្មីសម្រាប់សង្គមជាតិ។
ជុំវិញបញ្ហានេះ គេហទំព័រ Press Start Cambodia មិនអាចសុំការបញ្ជាក់បន្ថែមពី អ្នកនាំពាក្យក្រសួងមហាផ្ទៃ លោក ទូច សុខៈ បាននៅឡើយទេ ដោយលោកឱ្យសំណួរតាមប្រព័ន្ធតេឡេក្រាម ប៉ុន្តែលោកក៏មិនទាន់ឆ្លើយតប។
ចំណែក ស្នងការងនៃស្នងការដ្ឋាននគរបាលខេត្តកំពង់ចាម លោក ចាន់ រស្មី មានប្រសាសន៍នៅថ្ងៃទី០៨ ខែមេសានេះថា ករណីក្មេងទំនើងនៅខេត្តកំពង់ចាម មានការថយចុះខ្លាំង។
លោកទទួលស្គាល់ដែរថា ករណីក្មេងទំនើងនេះ វាបន្តកើតមានដែរ ប៉ុន្តែតិចតួចទេ ហើយសមត្ថកិច្ចនរគបាលបានចាត់វិធានការភ្លាមៗ ដើម្បីការពារសុខសុវត្ថិភាពពលរដ្ឋតាមភូមិ។លោកសង្កត់ធ្ងន់ថា ក្នុងរដូវចូលឆ្នាំនេះ សមត្ថកិច្ចនរគបាលខេត្តកំពង់ចាម នឹងរឹតបណ្តឹង ចាត់វិធានការ បង្រ្កាប ទប់ស្កាត់ក្មេងទំនើងឱ្យមានប្រសិទ្ធភាព ដើម្បីការពារមុខមាត់រដ្ឋាភិបាល។
លោកថា៖ «វាមិនអត់ក្មេងទំនើង តែឥឡូវថយចុះ នៅតិចតួចទេក្មួយ ខាងសមត្ថកិច្ចយើងបន្តតាមដាន និងបង្រ្កាប ទប់ស្កាត់ ដើម្បីការពារសុវត្ថិភាពពលរដ្ឋ តបតាមបទបញ្ជារបស់រាជរដ្ឋាភិបាល។ ចូលឆ្នាំហ្នឹងអាជ្ញាធរនឹងរឹតបណ្តឹង ទប់ស្កាត់មិនឱ្យមានក្មេងទំនើងរំខានប្រពៃណីយើងទេ»។
កាលពីថ្ងៃទី២៤ ខែឧសភា ឆ្នាំ២០២៥ លោកនាយករដ្ឋមន្រ្តី ហ៊ុន ម៉ាណែត ធ្លាប់បញ្ជាឱ្យអភិបាលរាជធានី-ខេត្ត និងអាជ្ញាធរពាក់ព័ន្ធ ចុះបង្ក្រាប កំណត់មុខសញ្ញា និងចាត់វិធានការឱ្យបានម៉ឹងម៉ាត់ ដើម្បីបង្ក្រាបក្រុមក្មេងទំនើងដែលកំពុងបង្កអសន្តិសុខក្នុងសង្គម។
លោកថា៖ «ខ្ញុំដាក់បញ្ជាឱ្យមន្រ្តីថ្នាក់ក្រោមបន្តអនុវត្តវិធានការក្តៅលើក្មេងទំនើង ឬក្រុមប្រើប្រាស់ដាវសាំម៉ូរៃនេះ ត្រូវអនុវត្តឱ្យដូចភ្លៀងរលឹម ពោលគឺមានក្រុមណាមួយបង្កហិង្សា និងអសន្តិសុខក្នុងសង្គម ត្រូវតែបង្ក្រាប និងចាប់មកអនុវត្តច្បាប់ភ្លាមៗ ដោយប្រើវិធីបង្ក្រាប «ងើបមួយសង្កត់មួយ, ងើបមួយក្រុមសង្កត់មួយក្រុម».
លោកនាយករដ្ឋមន្ត្រី បន្ថែមថា៖ «ខ្ញុំមិនបានដាក់បញ្ជាទៅតុលាការទេ ព្រោះតុលាការឯករាជ្យ តែខ្ញុំសុំអំពាវនាវឱ្យតុលាការអនុវត្តឱ្យបានម៉ឹងម៉ាត់លើកិច្ចការងារនេះ។ ពិតណាស់មានក្មេងៗ អាយុ១៤ឆ្នាំ ១៣ឆ្នាំ ១៨ឆ្នាំ ដែលត្រូវមានទោសទណ្ឌក្នុងកម្រិតណាមួយ តែត្រូវសិក្សាឱ្យបានច្បាស់ថាតើត្រូវពង្រឹងយ៉ាងណាឱ្យបានល្អ»។
យោងតាមរបាយការណ៍ក្រសួងមហាផ្ទៃ ចុះថ្ងៃទី៦ ខែមីនា ឱ្យដឹងថា ក្នុងរយៈពេល១ខែ គិតចាប់ពីថ្ងៃទី១ រហូតដល់ថ្ងៃទី២៨ ខែកុម្ភៈ ឆ្នាំ២០២៦ កម្លាំងនគរបាលជាតិនៃអគ្គស្នងការដ្ឋាននគរបាលជាតិ បានបង្ក្រាបក្មេងទំនើងចំនួន១០៤ករណី និងឃាត់ខ្លួនជនបង្ក៣៧៦នាក់ បញ្ជូនទៅតុលាការ និងបញ្ជូនបន្តទៅពន្ធនាគារ។
របាយការណ៍ បន្តថា ប្រតិបត្តិការបង្ក្រាបក្មេងទំនើងក្នុងរយៈពេល១ខែកន្លងមកនេះ មាននៅក្នុងភូមិសាស្ត្រជាអាទិ៍ រាជធានីភ្នំពេញ ខេត្តកណ្តាល កំពត កំពង់ស្ពឺ ព្រះសីហនុ កោះកុង ពោធិ៍សាត់ បាត់ដំបង បន្ទាយមានជ័យ សៀមរាប ព្រះវិហារ រតនគិរី កំពង់ចាម ត្បូងឃ្មុំ ក្រចេះ ស្វាយរៀង និងខេត្តតាកែវ ជាដើម៕