ក្រសួងទេសចរណ៍សហការជាមួយរដ្ឋបាលខេត្តតាកែវនឹងរៀបចំព្រឹត្តិការណ៍ជិះកង់ភ្នំពេញ-តាកែវ ចម្ងាយ៧៨គីឡូម៉ែត្រនៅថ្ងៃអាទិត្យនេះ ដើម្បីអបអរទិវានារីអន្តរជាតិ ៨មីនា ក្រោមប្រធានបទ “ទេសចរណ៍រីកលូតលាស់ក្នុងសន្តិភាព”។
យោងតាមសេចក្តីជូនដំណឹងរបស់ក្រសួងទេសចរណ៍ចុះថ្ងៃទី២៦ ខែកុម្ភៈ ឆ្នាំ២០២៦ បានឱ្យដឹងថា ព្រឹត្តិការណ៍នេះនឹងចាប់ផ្ដើមចេញដំណើរពីទីស្តីការក្រសួងទេសចរណ៍វេលាម៉ោង ៥:០០ នាទីព្រឹក ឆ្ពោះទៅទីរួមខេត្តតាកែវក្នុងគោលបំណងអបអរទិវានារីអន្តរជាតិ ៨មីនា ជំរុញការផ្សព្វផ្សាយតំបន់គោលដៅទេសចរណ៏ប្រាសាទភ្នំជីសូរ្យ និងបង្ហាញពីការឯកភាពជាតិ សាមគ្គីភាពផ្ទៃក្នុងរឹងមាំ ព្រមទាំងឧបត្ថម្ភសម្ភារសិក្សាដល់សិស្សានុសិស្សខ្វះខាត។
តាមសេចក្តីជូនដំណឹងដដែល ក្រសួងក៏បានលើកទឹកចិត្តឱ្យសាធារណជនមកចុះឈ្មោះឱ្យបានទាន់ពេលរហូតដល់ថ្ងៃទី៥ ខែមីនា ដោយបញ្ជាក់ថា អ្នកចុះឈ្មោះចំនួន ៧០០នាក់ដំបូងអាចទទួលបានអាវយឺត ១ ដែលនឹងត្រូវប្រគល់ជូននៅថ្ងៃទី៦ ខែមីនា ចាប់ពីម៉ោង ៩:០០ នាទី ដល់ម៉ោង ១៧:០០ នាទី នៅទីស្តីការក្រសួងទេសចរណ៍។
ក្រសួងបន្តថា អ្នកចូលរួមចាប់ពីលេខរៀង ៧០១ មិនទទួលបានអាវយឺតទេ ប៉ុន្តែអាចចូលរួមបាន ហើយចំពោះអ្នកចូលរួមនឹងទទួលបានអាហារសម្រន់ពេលព្រឹក ភេសជ្ជៈ និងអាហារថ្ងៃត្រង់ផងដែរ។
ព្រឹត្តិការណ៍ជិះកង់នេះ មិនជាលើកទីមួយសម្រាប់កម្ពុជាទេ កាលពីថ្ងៃទី២៨ ធ្នូ ឆ្នាំ២០២៥ ក្រសួងទេសចរណ៍សហការជាមួយរដ្ឋបាលខេត្តសៀមរាប បានរៀបចំព្រឹត្តិការណ៍ជិះកង់ផ្សារភ្ជាប់នឹងសកម្មភាពមនុស្សធម៌ ក្រោមប្រធានបទ “រួមគ្នាដើម្បីកម្ពុជាក្នុងរដូវកាលសាមគ្គី”៕
អត្ថបទដោយ៖ ហ៊ាង ឧត្តម