ព្រះសង្ឃ និងយុវជនសង្គម ដែលធ្វើកិច្ចការលើកកម្ពស់សិទ្ធិមនុស្ស និងសេរីភាពសារព័ត៌មាន ស្នើឱ្យអាជ្ញាធរខេត្តបាត់ដំបង ជាពិសេសរដ្ឋាភិបាលដោះលែងព្រះតេជព្រះគុណ ជា វុទ្ធី ឱ្យមានសេរីភាពឡើងវិញ ដោយចាត់ទុកសកម្មភាពរបស់ព្រះអង្គ ជា វុទ្ធី ថាភាគច្រើន ជាការងារជួយសង្គម និងបូរណភាពទឹកដី។
ការទាមទារនេះ ក្រោយពីសមត្ថកិច្ចនគរបាល និងមន្រ្តីសង្ឃខេត្តបាត់ដំបង បានចាប់ផ្សឹក និងវាយខ្នោះ ព្រះតេជព្រះគុណ ជា វុទ្ធី ដោយបង្ខំ កាលពីព្រឹកថ្ងៃទី១ ខែមេសា ឆ្នាំ២០២៦ ស្ថិតនៅក្នុងវត្តពោធិ៍វាល ក្រុងបាត់ដំបង។
ជុំវិញរឿងនេះ ព្រះតេជព្រះគុណ ឡុង សុគា គង់នៅវត្តពោធិ៍វាល ក្រុងបាត់ដំបង មានថេរដីកាថា ព្រះអង្គផ្ទាល់ពិតជាសង្វេគ និងឈឺចាប់នៅពេលដែលឃើញសមត្ថកិច្ចចាប់ផ្សឹកព្រះអង្គ ជា វុទ្ធី ដោយគ្មានមូលហេតុបែបនេះ។
ព្រះអង្គអះអាងថា ព្រះតេជព្រះគុណ ជា វុទ្ធី ជាសកម្មជនសង្ឃដ៏ល្អ តែងតែជួយដល់សហគមន៍ ជនក្រីក្រ ជនភៀសសឹក និងសកម្មរឿងជួយសង្គម ជាពិសេសព្រះអង្គតែងឈឺឆ្អាលរឿងបូរណភាពទឹកដីតែម្តង។
បញ្ហានេះ ព្រះតេជព្រះគុណ ឡុង សុគា ស្នើឱ្យអាជ្ញាធរខេត្តបាត់ដំបង ជាពិសេស លោកនាយករដ្ឋមន្រ្តី ហ៊ុន ម៉ាណែត ដោះលែងព្រះតេជព្រះគុណ ជា វុទ្ធី ឱ្យមានសេរីភាពឡើងវិញ។
ព្រះអង្គបន្តថា៖«អាត្មា អារម្មណ៍សង្វេគ ឈឺចិត្ត នៅពេលឃើញសមត្ថកិច្ចចាប់ខ្លួន ព្រះអង្គ ជា វុទ្ធី កាលពីព្រឹកថ្ងៃទី១ ខែមេសា នេះ នៅវត្តអាត្មានេះឯង វត្តពោធិ៍វាល អាត្មាសួរសមត្ថកិច្ចគេទៅ គេថាមិនទាន់ដឹងមូលហេតុទេ គេសួរនាំសិន។ តែមិនទាន់សួរនាំអ្វីផង ចាប់ដាក់ឡាន រួចឮថាផ្សឹកបាត់។ សូមឱ្យអាជ្ញាធរដោះលែងលោកវិញមក»។
អ្នកសារព័ត៌មានពលរដ្ឋ(CJ)គឺ លោក សួន វុត្ថា និយាយថា លោកធ្លាប់ធ្វើការងារសង្គមជាមួយព្រះអង្គ ជា វុទ្ធី ព្រះអង្គជាព្រះសង្ឃមានព្រះទ័យទូលាយ ចេះជួយសង្គមជាតិ ស្រលាញ់ជាតិ និងជួយពលរដ្ឋភៀសសឹក ជាដើម។
លោកអះអាងថា ព្រះតេជព្រះគុណមិនដែលធ្វើអ្វីប៉ះពាល់ដល់សង្គមជាតិ និងបញ្ហាបូរណភាពទឹកដីនោះឡើយ គឺព្រះអង្គគ្មានអ្វីក្រៅពីបញ្ចេញមតិ កែលម្អធ្វើយ៉ាងណាឱ្យសង្គមជាតិរីកចម្រើន និងស្នើឲ្យរដ្ឋាភិបាលបន្តការពារទឹកដីឲ្យបានគង់វង្ស។បន្ថែមពីលើនេះ ក្នុងនាមជាអ្នកសារព័ត៌មានពលរដ្ឋ លោកទទូចឱ្យអាជ្ញាធរមានសមត្ថកិច្ច ជាពិសេសរដ្ឋាភិបាលដោះលែងព្រះតេជព្រះគុណ ជា វុទ្ធី ឱ្យមានសេរីភាពឡើងវិញ ដើម្បីព្រះអង្គអាចចូលរួមកិច្ចការសង្គមបន្តទៀត។
លោកបន្តថា៖«តាមខ្ញុំស្គាល់ព្រះអង្គ ព្រះអង្គជាព្រះសង្ឃល្អ ស្រលាញ់ជាតិ ទឹកដី ចេះជួយសហគមន៍ ពេលខ្លះរៃអង្គាសលុយខ្លះៗជួយជនភៀសសឹក ព្រោះអង្គមានព្រះទ័យទូលាយណាស់ មិនដែលទៅបំផ្លាញសង្គមជាតិទេ មានតែជួយសង្គមជាតិ គិតរឿងជាតិ មាតុភូមិណាស់។ សូមអំពាវនាវរាជរដ្ឋាភិបាលដោះលែងព្រះអង្គ ជា វុទ្ធី វិញមក»។
ជុំវិញបញ្ហានេះ គេហទំព័រ Press Start Cambodia បានព្យាយាមសុំការឆ្លើយតបពី អភិបាលខេត្តបាត់ដំបង លោក សុខ លូ ដែរ ប៉ុន្តែលោកមិនឆ្លើយតប មុននឹងផ្តាច់ទូរស័ព្ទចុះ។
ដោយឡែក នាយកប្រតិបត្តិ ទទួលបន្ទុកកិច្ចការទូទៅ នៃអង្គការការពារសិទ្ធិមនុស្ស លីកាដូ (Licadho) លោក អំ សំអាត យល់ឃើញថា ការបញ្ចេញមតិរបស់ពលរដ្ឋ រួមទាំងព្រះសង្ឃ គឺមានការធានា ការពារដោយរដ្ឋធម្មនុញ្ញ។លោកបញ្ជាក់ថា ករណីចាប់ផ្សឹកព្រះតេជព្រះគុណ ជា វុទ្ធី អង្គការ លីកាដូ កំពុងតាមដាន និងសិក្សាអំពីអង្គហេតុ ដើម្បីជួយជំរុញឱ្យតុលាការ ឬរដ្ឋាភិបាល ពិចារណាអង្គហេតុដោះលែងព្រះអង្គឡើងវិញ។
លោកបន្តថា៖«ករណីហ្នឹងមកដល់ពេលនេះ គឺយើងជាអង្គការសង្គមស៊ីវិលកំពុងតាមដានយ៉ាងយកចិត្តទុកដាក់ ហើយនឹងប្រមូលព័ត៌មានទៅលើករណីនេះឱ្យបានគ្រប់ជ្រុងជ្រោយ ហើយបើរកឃើញថាព្រះអង្គគ្រាន់តែបញ្ចេញមតិមិនប៉ះពាល់អ្វីទេ យើងក៏ស្នើឱ្យតុលាការ ឬរដ្ឋាភិបាលកម្ពុជាដោះលែងព្រះអង្គឱ្យមានសេរិភាពឡើងវិញទៅ»។
យ៉ាងណា ចំពោះករណីនេះ លោក អំ សំអាត ក៏ចូលរួមអំពាវនាវ ស្នើឱ្យអាជ្ញាធរខេត្តបាត់ដំបង និងរដ្ឋាភិបាល ផ្តល់ការយោគយល់ដោយដោះលែងព្រះអង្គ ជា វុទ្ធី ឱ្យមានសេរីភាពឡើងវិញ ដើម្បីឱ្យព្រះអង្គបន្តការងារសង្គមជាតិ។
រដ្ឋធម្មនុញ្ញបញ្ញត្តិមាត្រា៤១ ចែងថាប្រជាពលរដ្ឋខ្មែរ មានសេរីភាពខាងការបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងការបោះពុម្ពផ្សាយ សេរីភាពខាងការប្រជុំ។ ជនណាក៏ដោយមិនអាចឆ្លៀតប្រើសិទ្ធិនេះដោយរំលោភ នាំឱ្យប៉ះពាល់ដល់កិត្តិយសរបស់អ្នកដទៃ ដល់ទំនៀមទម្លាប់ល្អរបស់សង្គម ដល់សណ្ដាប់ធ្នាប់សាធារណៈ និង ដល់សន្តិសុខជាតិបានឡើយ។
លើសពីនេះ រដ្ឋធម្មនុញ្ញ មាត្រា៣៥ ក៏បានកំណត់ដែរថាប្រជាពលរដ្ឋខ្មែរទាំងពីរភេទ មានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និង វប្បធម៌របស់ប្រទេសជាតិ។សេចក្ដីស្នើទាំងឡាយរបស់ប្រជាពលរដ្ឋ ត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ៕