ប្រជាពលរដ្ឋរួមមានយុវជន និងព្រះសង្ឃសរុបប្រមាណ ១០ អង្គ/នាក់ បាននាំគ្នាទៅស្ថានទូតបារាំង នៅព្រឹកថ្ងៃទី១៣ ខែវិច្ឆិកា ដើម្បីដាក់ញត្តិស្នើសុំប្រធានាធិបតីបារាំងជួយអន្តរាគមន៍បញ្ហាព្រំដែនកម្ពុជា-ថៃ ខណៈដែលលោកនឹងចូលរួមកិច្ចប្រជុំកំពូលហ្វ្រង់កូហ្វូនី (Francophonie) នៅរាជធានីភ្នំពេញ នាចុងសប្ដាហ៍នេះ។
ក្រុមប្រជាពលរដ្ឋបានទៅជួបជុំគ្នានៅបរិវេណស្ថានទូតបារាំងតាមបណ្ដោយផ្លូវព្រះមុនីវង្ស នៅវេលាម៉ោង ៩ ព្រឹក ដោយមានការឃ្លាំមើលពីមន្ត្រីសមត្ថកិច្ច ព្រមទាំងអ្នកសារព័ត៌មានជាច្រើននាក់។

ប្រជាពលរដ្ឋរួមមានយុវជន និងព្រះសង្ឃ សរុបប្រមាណ១០នាក់ កំពុងជុំគ្នានៅមុខស្ថានទូតបារាំង ដើម្បីដាក់ញត្តិស្នើសុំប្រធានាធិបតីបារាំងជួយអន្តរាគមន៍បញ្ហាព្រំដែនកម្ពុជា-ថៃ នៅព្រឹកថ្ងៃទី១៣ ខែវិច្ឆិកា ឆ្នាំ២០២៦។ (រូបភាព៖ ហុង សេរីហ្វុង)
ព្រះតេជព្រះគុណ អូន គង់ និមន្តមកពីខេត្តសៀមរាប មានសង្ឃដីកាទៅកាន់ក្រុមអ្នកសារព័ត៌មានថា គោលបំណងដែលព្រះអង្គនិមន្តមកស្ថានទូតបារាំងនៅថ្ងៃនេះ គឺដើម្បីដាក់ញត្តិទៅលោក អេម៉ានុយអែល ម៉ាក្រុង (Emmanuel Macron) ប្រធានាធិបតីបារាំង ឱ្យជួយអន្តរាគមន៍ចំពោះរឿងប្រទេសថៃឈ្លានពានកម្ពុជា។
ព្រះតេជព្រះគុណ អូន គង់ មានសង្ឃដីកាថា៖ «អាត្មារំពឹងថា សាររបស់អាត្មានេះ តំណាងឱ្យពលរដ្ឋទាំងអស់ដែលបានពាំនាំសារនេះ គឺសង្ឃឹមថាទទួលបានដឹងឮទៅដល់ប្រធានាធិបតី ម៉ាក្រុង ក៏ដូចជាសារដាស់តឿនដល់បណ្ដាពលរដ្ឋខ្មែរទាំងក្នុង និងក្រៅប្រទេស ពេលនេះជាពេលគួរនៅក្នុងការចូលរួមការពារថែរក្សាទឹកដីកម្ពុជា តាមរយៈការបញ្ចេញសំឡេងគាំទ្រខ្លឹមសារនៃច្បាប់ដែលបានធានា និងការពារ»។
ចំណែកយុវជនម្នាក់ទៀតមកពីខេត្តកណ្ដាល កញ្ញា លី ស្រីលៀប បានឱ្យដឹងថា កញ្ញាចូលរួមដាក់ញត្តិដើម្បីឱ្យប្រទេសមហាអំណាចជួយរកយុត្តិធម៌ដល់កម្ពុជា។ កញ្ញាបន្តថា ការឈ្លានពានរបស់ប្រទេសថៃកន្លងមក ធ្វើឱ្យកញ្ញាអាណិតដល់ពលរដ្ឋខ្មែររស់នៅជិតព្រំដែន ដែលត្រូវបានយោធាថៃបាញ់ប្រហារ និងកម្ទេចផ្ទះសម្បែង។
កញ្ញា លី ស្រីលៀប និយាយថា៖ «ខ្ញុំរំពឹងថាប្រទេសមហាអំណាចអាចជួយរកយុត្តិធម៌សម្រាប់ប្រទេសរបស់យើង ដែលពួកប្រទេសសៀមបានយកទឹកដីខ្មែរ និងបាញ់ប្រហារប្រជាពលរដ្ឋខ្មែរ […]។ ខ្ញុំមានអារម្មណ៍ថាអាណិតប្រជាជនកម្ពុជានៅជាប់ព្រំដែនថៃ ដោយសារតែពួកវាបានធ្វើបាបនូវប្រជាពលរដ្ឋរបស់យើង»។
នៅក្នុងខ្លឹមសារញត្តិដែលចុះហត្ថលេខាដោយពលរដ្ឋចំនួន ១០ នាក់ លើកឡើងថា បច្ចុប្បន្នយោធាថៃបានរំលោភបំពាន និងរុលចូលកាន់កាប់ទីតាំងមួយចំនួនរបស់កម្ពុជានៅតាមបណ្ដោយព្រំដែន ដែលទង្វើនេះត្រូវបានពលរដ្ឋចាត់ទុកជាការបង្កការព្រួយបារម្ភចំពោះសន្តិសុខក្នុងតំបន់ សន្តិភាព និងសុវត្ថិភាពរបស់ពលរដ្ឋខ្មែរនៅតាមព្រំដែន។
ខ្លឹមសារញត្តិបន្តថា៖ «យើងខ្ញុំយល់ថា បញ្ហានេះមិនគួរត្រូវបានដោះស្រាយត្រឹមតែតាមរយៈការអំពាវនាវឱ្យភាគីទាំងពីរអត់ធ្មត់ ឬបន្តចរចាដោយគ្មានលទ្ធផលជាក់ស្ដែងនោះទេ។ អ្វីដែលចាំបាច់ គឺត្រូវមានការគោរពច្បាប់អន្តរជាតិ ការគោរពព្រំដែនដែលមានមូលដ្ឋានលើសន្ធិសញ្ញា និងឯកសារផ្លូវច្បាប់ ព្រមទាំងការដោះស្រាយឱ្យមានភាពយុត្តិធម៌»។
ញត្តិដដែលបន្ថែមថា៖ «យើងខ្ញុំជឿជាក់ថា ឯកឧត្តមប្រធានាធិបតីនឹងយកឱកាសកិច្ចប្រជុំកំពូលហ្វ្រង់កូហ្វូនីលើកទី២០ បង្ហាញសារច្បាស់ៗថា នឹងគាំទ្រយន្តការអន្តរជាតិ ក្នុងការការពារបូរណភាពទឹកដី និងជំរុញកំណែទម្រង់ប្រជាធិបតេយ្យ សិទ្ធិមនុស្ស ដើម្បីលើកស្ទួយកម្ពុជាឱ្យមានសន្តិភាព យុត្តិធម៌ និងការអភិវឌ្ឍប្រកបដោយចីរភាព តាមស្មារតីកិច្ចព្រមព្រៀងសន្តិភាពទីក្រុងប៉ារីស ដែលជាមូលដ្ឋានគ្រឹះដ៏សំខាន់ក្នុងការធានាអធិបតេយ្យភាព ឯករាជ្យភាព ឯកភាពជាតិ បូរណភាពទឹកដី និងអព្យាក្រឹតភាពរបស់កម្ពុជា ព្រមទាំងការពារកម្ពុជាពីការគំរាមកំហែង និងការរំលោភបំពានពីប្រទេសជិតខាង»។
លោក អ៊ុង សេរីវុទ្ធ ជាពលរដ្ឋមួយរូបទៀតដែលបានដាក់ញត្តិ បានបង្ហាញក្ដីរំពឹងថា ប្រធានាធិបតីនៃប្រទេសសហប្រធានកិច្ចព្រមព្រៀងសន្តិភាពទីក្រុងប៉ារីសរូបនេះនឹងជួយអន្តរាគមន៍ តាមរយៈការលើកឡើងពីករណីនេះនៅក្នុងកិច្ចប្រជុំកំពូលហ្វ្រង់កូហ្វូនី។
លោកលើកឡើងថា៖ «យើងពិតជាឈឺចាប់ណាស់ ហើយយើងចង់ឱ្យសំឡេងរបស់ពួកយើងទៅដល់ ម៉ាក្រុង ធ្វើយ៉ាងណាលើកយកនូវរបៀបវារៈនៃបញ្ហាព្រំដែននេះ រវាងកម្ពុជា និងថៃ ទៅដាក់បញ្ចូលនៅក្នុងកិច្ចប្រជុំហ្វ្រង់កូហ្វូនី ហើយយើងសង្ឃឹមថាលោកនឹងជួយអន្តរាគមន៍ និងដាក់សម្ពាធឱ្យថៃគោរពបទឈប់បាញ់ មកចរចាពីបញ្ហាព្រំដែន ហើយអនុវត្តឱ្យបាននូវកិច្ចព្រមព្រៀងសន្តិភាព ក្នុងនាមថៃខ្លួនឯងក៏ជាម្ចាស់ហត្ថលេខីដែរ ដែលត្រូវគោរពបូរណភាពទឹកដីរបស់កម្ពុជា»។
ជុំវិញរឿងនេះ ប្រធានអង្គភាពអ្នកនាំពាក្យរាជរដ្ឋាភិបាល លោក ប៉ែន បូណា លើកឡើងថា ប្រជាពលរដ្ឋខ្មែរគ្រប់រូបមានសិទ្ធិឈឺឆ្អាលចំពោះការឈ្លានពានទឹកដី និងអាចចូលរួមចំណែកតាមលទ្ធភាព ក្នុងការការពារអធិបតេយ្យភាព និងបូរណភាពទឹកដីរបស់ខ្លួន ប៉ុន្តែសកម្មភាពនោះត្រូវធ្វើឡើងស្របតាមផ្លូវច្បាប់ និងសន្តិវិធី។ អ្នកនាំពាក្យរដ្ឋាភិបាលរូបនេះ ពុំបានបញ្ជាក់បន្ថែមឡើយថា កម្ពុជានឹងលើកយកនូវបញ្ហាព្រំដែនទៅក្នុងកិច្ចប្រជុំហ្វ្រង់កូហ្វូនីឬយ៉ាងណា ក៏ប៉ុន្តែលោកស្នើឱ្យពលរដ្ឋបន្តជឿជាក់លើរដ្ឋាភិបាល។
លោកថា៖ «សូមឱ្យបងប្អូនយើងជឿជាក់លើរដ្ឋាភិបាល រាជរដ្ឋាភិបាលបាននឹងកំពុងបន្តកិច្ចការងារការទូតយ៉ាងសកម្មដើម្បីការពារបូរណភាពទឹកដី សម្តេចធិបតីបានដាក់ចេញហើយនូវអភិក្រម កិច្ចការពារបូរណភាពទឹកដី អធិបតេយ្យភាពទឹកដី និងប្រជាជនគឺជាអាទិភាព អ៊ីចឹងសូមបងប្អូនយើងទាំងអស់គ្នាទុកចិត្តលើរដ្ឋាភិបាលក្នុងការដោះស្រាយបញ្ហាទឹកដីហ្នឹង»។
ក្រៅពីក្រុមពលរដ្ឋដែលដាក់ញត្តិសុំកិច្ចអន្តរាគមន៍រឿងព្រំដែនកម្ពុជា-ថៃ ក៏មានក្រុមសហជីព និងអង្គការសង្គមស៊ីវិលដាក់ញត្តិតាមស្ថានទូត រួមមានស្ថានទូតបារាំង និងស្ថានទូតកាណាដា ក្នុងគោលបំណងស្នើឱ្យមានការបើកលំហសេរីភាពនៃការបញ្ចេញមតិ និងកិច្ចសន្ទនាសង្គម។ ក្នុងនោះ គេក៏សង្កេតឃើញមានការរារាំងពីសំណាក់អាជ្ញាធរផងដែរ។
ទាក់ទិនរឿងនេះ លោក អំ សំអាត នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ យល់ឃើញថា ការដែលពលរដ្ឋទៅដាក់ញត្តិសុំកិច្ចអន្តរាគមន៍រឿងជម្លោះកម្ពុជា-ថៃនៅឯស្ថានទូត គឺជាការអនុវត្តសិទ្ធិសេរីភាពរបស់ពួកគេ។
លោកលើកឡើងថា៖ «យើងដឹងហើយថា ការជួបជុំ ការប្រមូលផ្ដុំ និងការដាក់ញត្តិដោយសន្តិវិធី កាលណាមានការរារាំង ការបំបែក ឬការប្រើប្រាស់ហិង្សាពីសំណាក់ភាគីណាមួយ ឬពីសំណាក់សន្តិសុខអីជាដើមហ្នឹង អាហ្នឹងវាប៉ះពាល់សិទ្ធិ និងសេរីភាពជាមូលដ្ឋានរបស់ពលរដ្ឋ»។
លោកបន្ថែមថា៖ «ការដែលជួបជុំដោយសន្តិវិធីក្នុងការដាក់ញត្តិ អាជ្ញាធរគួរតែរក្សា និងការពារសុវត្ថិភាពសម្រាប់ពួកគាត់»។
គួរបញ្ជាក់ថា ការដាក់ញត្តិរបស់ពលរដ្ឋខាងលើ ធ្វើឡើងក្រោយកម្ពុជាជាប់គាំងក្នុងជម្លោះព្រំដែនដែលបង្កឡើងដោយយោធាថៃ អស់រយៈពេលជាងមួយឆ្នាំមកនេះ។ ជម្លោះប្រដាប់អាវុធរវាងប្រទេសទាំងពីរ បានចាប់ផ្ដើមលើកទី១ នាថ្ងៃទី២៤ ខែកក្កដា ឆ្នាំ២០២៥ និងលើកទី២ ដែលមានរយៈពេលជាង ២១ ថ្ងៃ ត្រូវបានបញ្ចប់ដោយបទឈប់បាញ់នៅត្រឹមថ្ងៃទី២៧ ខែធ្នូ ឆ្នាំ២០២៥។
យោងតាមការផ្សាយរបស់ក្រសួងការបរទេស និងសហប្រតិបត្តិការអន្តរជាតិ កាលពីខែមករា ឆ្នាំ២០២៦ ឱ្យដឹងថា ភាគីថៃបានកាន់កាប់ទឹកដីខ្មែរនៅទីតាំងមួយចំនួន ក្នុងខេត្តចំនួន ៤ រួមមាន ខេត្តបន្ទាយមានជ័យ នៅភូមិព្រៃចាន់ ភូមិជោគជ័យ ភូមិបឹងត្រកួន ខេត្តពោធិ៍សាត់ នៅតំបន់ភ្លុកដំរី ច្រកអន្តរជាតិថ្មដា ខេត្តព្រះវិហារ នៅតំបន់អានសេះ តំបន់តាថាវ តំបន់ភ្នំទ្រព្យ និងខេត្តឧត្តរមានជ័យ នៅតំបន់អូរស្មាច់ ប្រាសាទខ្នារ ប្រាសាទតាក្របី ប្រាសាទតាមាន់ធំ តំបន់ជប់អង្គុញ និងតំបន់ចូកគ្រួស៕
(អត្ថបទដោយ៖ អ៊ួក ចាន់ធីដា)

