សហរដ្ឋអាមេរិកបានប្រកាសដាក់ទណ្ឌកម្មលើសមាជិកព្រឹទ្ធសភាកម្ពុជា លោក កុក អាន ជាអ្នកជំនួញដ៏មានឥទ្ធិពល ពាក់ព័ន្ធនឹងទីតាំងឆបោកតាមអនឡាញ ដែលធ្វើឱ្យពលរដ្ឋអាមេរិកបាត់បង់ប្រាក់រាប់លានដុល្លារ ខណៈអ្នកវិភាគបង្ហាញការព្រួយបារម្ភអំពីផលប៉ះពាល់ដល់មុខមាត់កម្ពុជានៅលើឆាកអន្តរជាតិ។
យោងតាមសេចក្តីប្រកាសព័ត៌មានរបស់ការិយាល័យគ្រប់គ្រងទ្រព្យសម្បត្តិបរទេស (OFAC) របស់ក្រ សួងរតនាគារអាមេរិក កាលពីថ្ងៃទី២៣ ខែមេសា ឆ្នាំ២០២៦ បានឱ្យដឹងថា លោក កុក អាន ព្រមទាំងបុគ្គល និងស្ថាប័នពាក់ព័ន្ធចំនួន២៨រូប បានដំណើរការ និងទទួលផលពីទីតាំងឆបោក ដែលផ្តោតគោលដៅលើពលរដ្ឋអាមេរិក។
សេចក្តីប្រកាសព័ត៌មាននេះសរសេរថា៖ “ឧក្រិដ្ឋជនឆបោកនៅអាស៊ីអាគ្នេយ៍នៅក្នុងបណ្តាញនេះ បានលួចប្រាក់រាប់លានដុល្លារពីជនរងគ្រោះដែលជាពលរដ្ឋអាមេរិក ខណៈប្រតិបត្តិការ ក្រោមការការពាររបស់លោក កុក អាន និងទំនាក់ទំនងនយោបាយរបស់លោក”។
“ដោយប្រើការទាក់ទាញជារបៀបមិត្តភាព ឬទំនាក់ទំនងស្នេហា អ្នកឆបោកទាំងនេះបានបញ្ចុះបញ្ចូលជនជាតិអាមេរិក ដែលងាយរងគ្រោះឱ្យផ្ទេរប្រាក់សន្សំរបស់ពួកគេតាមរបៀបជាទ្រព្យសកម្មឌីជីថល ដោយសន្យាថា នឹងមានឱកាសវិនិយោគនិងទទួលបានប្រាក់ចំណេញច្រើន ដើម្បីលួចប្រាក់ទាំងអស់ ”។
សេចក្តីប្រកាសព័ត៌មាននេះចោទប្រកាន់ថា លោក កុក អាន និងគូកនរបស់លោកបានដំណើរការមជ្ឈមណ្ឌលឆបោក ដែលប្រតិបត្តិការចេញពីកាស៊ីណូ និងអាគារការិយាល័យ ដែលត្រូវបានកែលម្អ សម្រាប់សកម្មភាពឆបោក ការលាងលុយរបស់ជនរងគ្រោះ និងផ្តល់ជាមូលដ្ឋាន ដើម្បីផ្តោតគោលដៅលើពលរដ្ឋអាមេរិក និងប្រព្រឹត្តការរំលោភសិទ្ធិមនុស្សដោយគ្មានទោសទណ្ឌ។
លោក កុក អាន ជាសមាជិកព្រឹទ្ធសភាមកពីគណបក្សកាន់អំណាចនិងមានងារជា “អ្នកឧកញ៉ា” ដែលគ្រប់គ្រងជំនួញច្រើនប្រភេទរួមទាំងកាស៊ីណូនិងសណ្ឋាគារផងដែរ។ កាលពីខែកក្កដា តុលាការប្រទេសថៃបានចេញដីកាចាប់ខ្លួនលោក កុក អាន ដោយចោទប្រកាន់ថា មានការជាប់ពាក់ព័ន្ធនឹងបណ្តាញឧក្រិដ្ឋកម្មឆ្លងដែន និងការលាងលុយកខ្វក់ បន្ទាប់ពីសមត្ថកិច្ចថៃចុះឆែកឆេរទីតាំងជាកម្មសិទ្ធិរបស់លោក និងរឹបអូសទ្រព្យសម្បត្តិសរុបជិត៣០លានដុល្លារនៅពេលនោះ។
ជុំវិញទណ្ឌកម្មនេះ លោកបណ្ឌិត មាស នី ជាអ្នកវិភាគនយោបាយនិងសង្គមយល់ឃើញថា ករណីនេះអាចប៉ះពាល់ដល់វិនិយោគិនដែលធ្វើពាណិជ្ជកម្មជាមួយលោក កុក អាន និងប៉ះពាល់ដល់កេរ្តិ៍ឈ្មោះរបស់រដ្ឋាភិបាលកម្ពុជា ប្រសិនបើមិនឆ្លើយតបដោយវិជ្ជមាន។ លោកបន្តថា ការខកខានមិនបានចាត់វិធានការច្បាស់លាស់អាចនាំឱ្យមានការរិះគន់ថា ឧក្រិដ្ឋកម្មបែបនេះ កើតមានជាប្រព័ន្ធ។
លោកមានប្រសាសន៍ថា៖ “គេអាចចោទថា អំពើទាំងឡាយដែលគេរកឃើញជាអំពើដែលរៀបចំជាប្រព័ន្ធ…ព្រោះអីមនុស្សនឹងនៅតែក្នុងប្រព័ន្ធគ្រប់គ្រងរបស់រដ្ឋដដែល”។
លោកបន្ថែមថា ប្រសិនបើការចោទប្រកាន់នេះ ជាការពិត អាជ្ញាធរគួរចាត់វិធានការ ដើម្បីបង្ហាញការទទួលខុសត្រូវ ដោយលោកបារម្ភថា ការបន្តការពារបុគ្គលដែលរងការចោទប្រកាន់ វានឹងប៉ះពាល់ដល់ប្រសិទ្ធភាពក្នុងការលុបបំបាត់ឧក្រិដ្ឋកម្មអនឡាញ។
លោកថា៖ “បើមានបុគ្គលទទួលរងការចោទប្រកាន់ជាអន្តរជាតិបែបនេះ ហើយយើងនៅរក្សាទុកវត្តមាននៅក្នុងជួររដ្ឋាភិបាលបន្តទៀត មានន័យថា ការបោសសម្អាតស្គេមអនឡាញនេះ គឺធ្វើបានតែសំបក ប៉ុន្តែខ្លឹមខាងក្នុងមិនមានការផ្លាស់ប្តូរអ្វីទេ”។
ស្រដៀងគ្នានេះដែរ លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា បានចាត់ទុកការចោទប្រកាន់លើលោក កុក អានថា ជាសញ្ញាមិនល្អសម្រាប់មុខមាត់ប្រទេសកម្ពុជានៅលើឆាកអន្តរជាតិនៅពេលដែលរឿងនេះ ត្រូវបានផ្សព្វផ្សាយជាទូទៅ ហើយថា រឿងនេះប្រហែលមិនទាន់ចប់ត្រឹមទណ្ឌកម្មនេះទេ ហើយអាចជាផ្នែកមួយ នៃយុទ្ធសាស្ត្រភូមិសាស្ត្រនយោបាយ។
លោកមានប្រសាសន៍ថា៖ “ស្របពេលដែលកម្ពុជាកំពុងពង្រីកក្របខណ្ឌទំនាក់ទំនង និងកិច្ចសហប្រតិបត្តិការបន្ថែមជាមួយប្រទេសចិន យើងឃើញសហរដ្ឋអាមេរិកបានបញ្ចេញនូវទណ្ឌកម្មមួយដែលមានលក្ខណៈប៉ះពាល់ធ្ងន់ធ្ងរដល់មុខមាត់កម្ពុជា”។
លោកបន្តថា ដើម្បីជម្រះការចោទប្រកាន់ លោក កុក អាន និងរដ្ឋាភិបាលត្រូវបង្ហាញភាពស្អាតស្អំនិងភស្តុតាង ដោយមិនអាចព្រងើយកន្តើយ ហើយត្រូវប្រឹងប្រែងរួមគ្នាទាំងកិច្ចសហប្រតិបត្តិការក្នុងតំបន់និងអន្តរជាតិ។ លោកមានប្រសាសន៍ថា៖ “ការជីកដល់ឫសគល់ ការចាប់អ្នកនៅពីក្រោយឱ្យបាន អ្នកដែលកាងពីក្រោយឱ្យបានមកផ្តន្ទាទោស គឺជារឿងមួយសំខាន់បំផុត។ សំខាន់ជាងការដែលដើរចាប់ប្រសេចប្រសាចតាមដងផ្លូវទៅទៀត”។
បើតាមការចោទប្រកាន់របស់ក្រសួងរតនាគារអាមេរិកថា លោក កុក អាន កាន់កាប់ក្រុមហ៊ុនជាច្រើនដូចជាក្រុមហ៊ុន Crown Resorts ដែលមានកាស៊ីណូ រម្មណីយដ្ឋាន និងអាគារពាណិជ្ជកម្មមួយចំនួននៅក្រុងប៉ោយប៉ែត ព្រះសីហនុ និងក្រុងបាវិត។ ក្រសួងរតនាគារអាមេរិកក៏បានបង្ហាញពីបណ្តាញពាក់ព័ន្ធឈ្មោះ រិទ្ធី រស្មី គ្រប់គ្រងក្រុមហ៊ុន K99 Group និងក្រុមហ៊ុនដែលពាក់ព័ន្ធនឹងទីតាំងឆបោក និងកាស៊ីណូនៅក្រុងព្រះសីហនុ ដូចជា Xing Tian Di Co Ltd និង Nan Tian International Hotel Co Ltd។ របាយការណ៍ដដែលក៏បានរំលេចអំពីអ្នកពាក់ព័ន្ធជនជាតិភូមាពីរនាក់ឈ្មោះ Aik Paung និង Sai Aung Linn រួមជាមួយនឹងក្រុមហ៊ុន Xihu Resort និង Heng Feng Group។
លោក ប៉ែន បូណា អ្នកនាំពាក្យរាជរដ្ឋាភិបាលអះអាងថា មកដល់ពេលនេះ រដ្ឋាភិបាលមិនទាន់មានការឆ្លើយតបនៅឡើយទេ ហើយថា បើមាន លោកនឹងផ្តល់ជូនពេលក្រោយ។
ទោះយ៉ាងណា ឆ្លើយតបនឹងការចោទប្រកាន់និងទណ្ឌកម្មនេះ លោក ជា ធីរិទ្ធ អ្នកនាំពាក្យព្រឹទ្ធសភា និងជាអ្នកនាំពាក្យគណបក្សប្រជាជនកម្ពុជា បានបញ្ជាក់យ៉ាងខ្លីថា លោក កុក អាន គឺជាសមាជិកព្រឹទ្ធសភាកម្ពុជា ដែលទទួលបានតួនាទីតាមរយៈការបោះឆ្នោត និងមានអភ័យឯកសិទ្ធិផងដែរ។
លោកមានប្រសាសន៍ថា៖ “ត្រង់អាមេរិកចោទប្រកាន់យ៉ាងណានោះ ចម្លើយដែលដឹងច្បាស់ គឺមានតែសួរអាមេរិក” ដោយលោកបន្ថែមថា រដ្ឋាភិបាលបាននិងកំពុងប្រឹងប្រែងប្រយុទ្ធប្រឆាំងឧក្រិដ្ឋកម្មឆបោកអនឡាញនិងធ្វើយ៉ាងណា ដើម្បីទាក់ទាញវិនិយោគិនមកវិនិយោគនៅកម្ពុជា។
ដោយឡែកនៅរសៀលថ្ងៃសុក្រនេះ អង្គភាពអ្នកនាំពាក្យរាជរដ្ឋាភិបាលបានចេញសេចក្តីប្រកាសព័ត៌មានមួយ ដោយបង្ហាញពីការប្តេជ្ញាចិត្តរបស់រដ្ឋាភិបាលក្នុងការលុបបំបាត់ឧក្រិដ្ឋកម្មឆបោកតាមអនឡាញជាមួយនឹងសកម្មភាពបង្ក្រាបដោយគ្មានការអត់ឱន និងការលើកលែង និងបានអំពាវនាវឱ្យមានការទទួលស្គាល់និងគាំទ្រកិច្ចខិតខំប្រឹងប្រែងរបស់ខ្លួន។
សេចក្តីប្រកាសព័ត៌មាននេះបន្តថា ចាប់ពីខែកក្កដា ឆ្នាំ២០២៥ ដល់ពាក់កណ្តាលខែមេសា ឆ្នាំ២០២៦ គឺក្នុងរយៈពេល៩ខែចុក្រោយនេះ អាជ្ញាធរបានបង្ក្រាបអំពើឆបោកតាមប្រព័ន្ធបច្ចេកវិទ្យាបានជាង២៥០ករណី ទីតាំងកាស៊ីណូ ៩១ទីតាំង និងកសាងសំណុំរឿងនិងបញ្ជូនទៅតុលាការចំនួន ១១២ករណី ពាក់ព័ន្ធនឹងជនសង្ស័យប្រមាណ ១០៨៩នាក់។
សេចក្តីប្រកាសព័ត៌មាននេះឱ្យដឹងទៀតថា ចាប់ពីដើមឆ្នាំ២០២៥ ដល់ថ្ងៃទី១៩ ខែមេសា ឆ្នាំ២០២៦ សមត្ថកិច្ចកម្ពុជាបានអនុវត្តនីតិវិធីបណ្តេញជនបរទេសពាក់ព័ន្ធនឹងការឆបោកតាមប្រព័ន្ធច្ចេកវិទ្យាសរុបចំនួន ១៣ ០៣៩នាក់ និងគិតចាប់ពីពាក់កណ្តាលខែមករា ដល់ថ្ងៃទី១៩ ខែមេសា ឆ្នាំ២០២៦ ជនបរទេសដែលស្ម័គ្រចិត្តចាកចេញពីកម្ពុជាមានសរុបចំនួន ២៤១ ៨៨៨នាក់។
សេចក្តីប្រកាសព័ត៌មានសរសេរថា៖ “រាជរដ្ឋាភិបាលកម្ពុជាសូមបញ្ជាក់ជាថ្មីថា ការប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា គឺជាការប្រយុទ្ធប្រឆាំងរយៈពេលវែង ដែលត្រូវការចូលរួមពីគ្រប់ភាគីទាំងក្នុងប្រទេសនិងអន្តរជាតិ។ រាជរដ្ឋាភិបាលកម្ពុជាសូមអំពាវនាវឱ្យសាធារណជន និងសហគមន៍អន្តរជាតិ មេត្តាទទួលស្គាល់ និងគាំទ្រដល់កិច្ចខិតខំប្រឹងប្រែងយ៉ាងសកម្ម និងជាក់ស្តែងរបស់កម្ពុជា ក្នុងការលុបបំបាត់ការឆបោកតាមប្រព័ន្ធបច្ចេកវិទ្យា”។
យោងតាមរបាយការណ៍អាមេរិក ត្រឹមឆ្នាំ២០២៤ ពលរដ្ឋរបស់ខ្លួនបានខាតបង់ប្រាក់ជាង ១០ ពាន់លានដុល្លារ ទៅលើបណ្តាញឆបោកនៅអាស៊ីអាគ្នេយ៍ ។ ការដាក់ទណ្ឌកម្មលើលោក កុក អាន នៅពេលនេះ គឺជាសកម្មភាពបន្តបន្ទាប់របស់ទីក្រុងវ៉ាស៊ីនតោន បន្ទាប់ពីការដាក់ទណ្ឌកម្មលើលោក លី យ៉ុងផាត់ កាលពីខែកញ្ញា ឆ្នាំ២០២៤ និងក្រុមហ៊ុន ព្រីនស៍ គ្រុប (Prince Group) កាលពីខែតុលា ឆ្នាំ២០២៥ ក្រោមការចោទប្រកាន់ស្រដៀងគ្នាពាក់ព័ន្ធនឹងការជួញដូរមនុស្ស និងមជ្ឈមណ្ឌលឆបោកនៅកម្ពុជា៕