មន្ត្រីស្នងការដ្ឋាននគរបាលរាជធានីភ្នំពេញ ឱ្យដឹងថា សមត្ថកិច្ចបានឃាត់ខ្លួនមនុស្សពីរនាក់ ទៅសួរនាំ ក្រោយអតិថិជនដាក់ប្រាក់នៅក្រុមហ៊ុន ហួយវ័ន ផេ បានប្រមូលផ្តុំតវ៉ា និងឈានដល់ការប៉ះទង្គិចជាមួយក្រុមសន្តិសុខខណ្ឌ។
នៅព្រឹកថ្ងៃទី២៧ ខែមេសា ឆ្នាំ២០២៦នេះ អតិថិនជនដាក់ប្រាក់នៅក្រុមហ៊ុន ហួយវ័ន ផេ ជាច្រើននាក់ ដែលមានទាំងជនជាតិខ្មែរ និងជនជាតិចិន បាននាំគ្នាទៅប្រមូលផ្តុំតវ៉ា នៅក្បែរធនាគារជាតិនៃកម្ពុជា ក្នុងសង្កាត់គោកឃ្លាំង ខណ្ឌសែនសុខ រាជធានីភ្នំពេញ ស្នើដល់ប្រធានព្រឹទ្ធសភា និងនាយករដ្ឋមន្ត្រី ជួយអន្តរាគមន៍ដើម្បីឱ្យពួកគេបានសាច់ប្រាក់ត្រឡប់មកវិញ ក្រោយធនាគារជាតិនៃកម្ពុជា ប្រកាសពីការមិនអាចជួយដោះស្រាយបាន និងស្នើឱ្យពួកគេស្វែងរកដំណោះស្រាយតាមយន្តការតុលាការ។
បើតាមការបង្ហោះវីដេអូផ្សាយផ្ទាល់របស់គេហទំព័រសារព័ត៌មានអនឡាញ BMK Hot News អំឡុងពេលអតិថិនជនដាក់ប្រាក់នៅក្រុមហ៊ុន ហួយវ័ន ផេ ប្រមូលផ្តុំតវ៉ានោះ ក៏មានការប៉ះទង្គិចគ្នាដោយហិង្សា បណ្តាលឱ្យមានអ្នករងរបួសផងដែរ។
អ្នកនាំពាក្យស្នងការដ្ឋាននរគបាលរាជធានីភ្នំពេញ លោក សំ វិច្ឆិកា មានប្រសាសន៍ប្រាប់ Press Start Cambodia ថា ការប្រមូលផ្តុំនោះ ពិតជាការរុញច្រានគ្នាទៅវិញទៅមក រវាងមន្រ្តីសន្តិសុខខណ្ឌ និងក្រុមអតិថិជនដែលដាក់ប្រាក់នៅក្រុមហ៊ុន ហួយវ័ន ផេ ពិតមែន ប៉ុន្តែលោកពុំបានបញ្ជាក់ពីចំនួនអ្នករងរបួសក្នុងហេតុការណ៍នោះទេ។ លោកបន្តថា សមត្ថកិច្ចក៏បានឃាត់ខ្លួនមនុស្ស ២នាក់ ដើម្បីសួរនាំផងដែរ។
លោកថា៖ «អូ! រឿងព្រឹកមិញនេះមែន បាទ! មានអំពើហិង្សាតិចតួចមែន ដោយសារពួកគាត់ អតិថិជន ហួយវ័ន ផេ ហ្នឹងចង់បិទផ្លូវសាធារណៈ ធ្វើឱ្យប៉ះពាល់ដល់សណ្តាប់ធ្នាប់ គឺបង្កការរំខានដល់អ្នកដំណើរផ្សេងទៀត ទើបមន្រ្តីសន្តិសុខ គាត់រុញច្រានគ្នា កើតហិង្សាតិចតួចទេ ឥឡូវលែងអីហើយ[…] យើងគ្រាន់តែសួរនាំគាត់ឱ្យបំភ្លឺទេណា ចំនួន ២នាក់»។
អតិថិជនរងគ្រោះដែលដាក់ប្រាក់នៅក្រុមហ៊ុន ហួយវ័ន ផេ លោក សួន សុវណ្ណថៃ បានឱ្យដឹងនៅមុនពេលប៉ះទង្គិចជាមួយក្រុមសន្តិសុខថា ការដែលពួកគាត់នាំគ្នាទៅប្រមូលផ្តុំនៅធនាគារជាតិនៃកម្ពុជា នៅថ្ងៃចន្ទនេះ គឺមានបំណងទៅសុំកិច្ចអន្តរាគមន៍ពីប្រមុខរដ្ឋាភិបាល និងប្រធានព្រឹទ្ធសភា ព្រោះតែចង់ទាមទារសាច់ប្រាក់ដែលបានដាក់នៅក្រុមហ៊ុន ហួយវ័ន ផេ ត្រឡប់មកវិញ ដើម្បីដោះស្រាយបញ្ហាជីវភាព។
លោកថា៖ «យើងខ្ញុំនៅតែបន្តទាមទាររកដំណោះស្រាយពីថ្នាក់ដឹកនាំ ដើម្បីឱ្យធនាគារជាតិជួយដល់ពួកខ្ញុំ ព្រោះពួកខ្ញុំចាញ់បោកក្រុមហ៊ុនមួយនេះច្រើនណាស់។ ណាមួយខាងធនាគារអត់ប្រាប់យើងមុនទេរឿងបិទ ដកអាជ្ញាបណ្ណក្រុមហ៊ុននេះ ទើបខ្ញុំដាក់លិខិតតវ៉ាឱ្យធនាគារចេញមុខដោះស្រាយ និងបំភ្លឺរឿងនេះឱ្យច្បាស់»។
Press Start Cambodia មិនអាចសុំការអត្ថាធិប្បាយជុំវិញរឿងនេះពី អគ្គទេសាភិបាលធនាគារជាតិកម្ពុជា លោកស្រី ជា សិរី បានទេនៅថ្ងៃចន្ទនេះ។
យ៉ាងណា កាលពីថ្ងៃទី២៤ ខែមេសា ឆ្នាំ២០២៦ ធនាគារជាតិនៃកម្ពុជា បានចេញសេចក្តីជូនដំណឹងមួយ ដោយបញ្ជាក់ថា អតីតគ្រឹះស្ថានផ្តល់សេវាទូទាត់សងប្រាក់ ហួយវ័ន ផេ ម.ក ត្រូវបានបញ្ចប់ការជម្រះបញ្ជី និងដោះស្រាយជូនម្ចាស់បំណុលរួចរាល់ហើយ ហើយគ្រឹះស្ថាននេះក៏ត្រូវបានលុបឈ្មោះចេញពីបញ្ជីពាណិជ្ជកម្ម តាមរយៈលិខិតចុះថ្ងៃទី១៩ ខែមិថុនា ឆ្នាំ២០២៥ របស់ក្រសួងពាណិជ្ជកម្មផងដែរ ដូច្នេះរាល់ការអះអាងថាជាម្ចាស់បំណុលរបស់អតីតគ្រឹះស្ថានផ្តល់សេវាទូទាត់សងប្រាក់ ហួយវ័ន ផេ ក្រោយពេលដែលត្រូវបានដកអាជ្ញាបណ្ណ និងរំលាយ មិនស្ថិតក្រោមសមត្ថកិច្ចរបស់ធនាគារជាតិនៃកម្ពុជាឡើយ។
ធនាគារជាតិ បានគូសបញ្ជាក់ទៀតថា បុគ្គលដែលអះអាងនៅមានសិទ្ធិស្របច្បាប់ អាចស្វែងរកដំណោះស្រាយ តាមយន្តការតុលាការ និងច្បាប់ជាធរមាន។
សម្រាប់ ម្ចាស់បំណុលក្រុមហ៊ុន អេច ផេ ធនាគារជាតិនៃកម្ពុជា បានស្នើឱ្យចូលរួមសហការជាមួយក្រុមហ៊ុនជម្រះបញ្ជី ដ្បិតថា ធនាគារជាតិបានតែងតាំងក្រុមហ៊ុនជម្រះបញ្ជីមួយ ដើម្បីដោះស្រាយជូនម្ចាស់បំណុលទាំងអស់។ តែរាល់ម្ចាស់បំណុលដែលអះអាងថា ជាជនរងគ្រោះត្រូវផ្តល់ព័ត៌មានពាក់ព័ន្ធក្នុងរយៈពេល៣០ថ្ងៃ។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត យល់ថា រាជរដ្ឋាភិបាល ឬធនាគារជាតិនៃកម្ពុជា គួរតែចេញមុខជួយអន្តរាគមន៍ដោះស្រាយបញ្ហានេះជូនអតិថិជនរងគ្រោះដោយសារក្រុមហ៊ុន ហួយវ័ន ផេ ដើម្បីបង្ហាញពីការផ្តល់ទំនុកចិត្តដល់អ្នកវិនិយោគដទៃទៀត។
លោកថា៖ «ខ្ញុំគិតថា ធនាគារជាតិ អាជ្ញាធរពាក់ព័ន្ធ ជាពិសេសរាជរដ្ឋាភិបាលគួរតែចេញមុខដោះស្រាយបញ្ហានេះ ដើម្បីជាទំនុកចិត្តដល់អតិថិជន និងអ្នកវិនិយោគដទៃទៀត ដែលពួកគេចង់បន្តរកស៊ីនៅកម្ពុជា និងដើម្បីបង្កើនជំនឿទុកចិត្តដល់អតិថិជនផងដែរ»។
ក្រុមហ៊ុន ហួយវ័ន ផេ ជាគ្រឹះស្ថានធនាគារអនឡាញ និងជាក្រុមហ៊ុនមួយរបស់ហួយវ័នគ្រុប។ ក្រុមហ៊ុននេះ បានជួបនូវបញ្ហាជាច្រើន ក្រោយពីឧកញ៉ាម្នាក់ដែលជាម្ចាស់ក្រុមហ៊ុនត្រូវបានសហរដ្ឋអាមេរិកចោទថា ជាប់ពាក់ព័ន្ធនឹងបទល្មើសលាងសម្អាតប្រាក់រាប់ពាន់លាន់ដុល្លារ ដោយមានជាប់ពាក់ព័ន្ធនឹងប្រាក់គ្រីបតូ។ ក្រុមហ៊ុនវិភាគប្រាក់គ្រីបតូមួយ បានវាយតម្លៃលើប្រតិបត្តិការរបស់ក្រុមហ៊ុន ហួយវ័ន កាលពីឆ្នាំមុន និងបានចាត់ទុកក្រុមហ៊ុននេះថាជា «ទីផ្សារដ៏ធំមួយក្នុងការប្រព្រឹត្តអំពើឆបោកតាមអនឡាញ»៕