អ្នករាយការណ៍ពិសេសអង្គការសហប្រជាជាតិស្តីពីស្ថានភាពសិទ្ធិមនុស្សនៅកម្ពុជាចង់ឃើញបរិយាកាសនយោបាយកាន់តែបើកទូលាយ ស្របពេលកម្ពុជាគ្រោងរៀបចំការបោះឆ្នោតក្រុមប្រឹក្សាឃុំ-សង្កាត់នៅឆ្នាំក្រោយ និងការបោះឆ្នោតជ្រើសតាំងតំណាងរាស្ត្រនៅឆ្នាំបន្ទាប់។
នៅក្នុងសេចក្តីប្រកាសព័ត៌មានបិទបញ្ចប់បេសកកម្ម ចេញផ្សាយថ្ងៃទី៣១ ខែកក្កដា ឆ្នាំ២០២៦ លោក Thomas Andrews បានលើកឡើងថា រាជរដ្ឋាភិបាលកម្ពុជាមានឱកាសក្នុងការបង្កើតបរិយាកាសនយោបាយឱ្យកាន់តែបើកទូលាយ ហើយកត្តាសំខាន់ក្នុងការក្តោតក្តាប់ឱកាសនេះ គឺការគោរពសិទ្ធិសេរីភាពក្នុងការបញ្ចេញមតិ ការជួបជុំ និងការបង្កើតសមាគម។
លោកលោកបន្តថា លោកបានជួបពិភាក្សាជាមួយថ្នាក់ដឹកនាំគណបក្សនយោបាយមួយចំនួន ដែលបានលើកឡើងពីការប្រឈមក្នុងការចូលរួមសកម្មភាពនយោបាយ ការយាយី ការរារាំងផ្នែកនយោបាយដូចជាការចាប់ខ្លួនថ្នាក់ដឹកនាំគណបក្ស និងសមាជិកគណបក្ស និងការរឹតត្បិតសកម្មភាពនយោបាយ។
លោកបន្ថែមទៀតថា អ្នកគាំទ្រគណបក្សជំទាស់ប្រឈមការលំបាកក្នុងការទទួលបានសេវាសាធារណៈពីរដ្ឋបាលមូលដ្ឋាននិងការឧត្តមពីកម្មវិធីប័ណ្ណក្រីក្ររបស់រដ្ឋ ហើយអ្នកសារព័ត៌មានមួយចំនួនបានរឹតត្បិតការបញ្ចេញមតិរបស់ខ្លួន ជុំវិញបញ្ហារសើប ដើម្បីជៀសវាងការប្រឈមនឹងវិធានការផ្លូវច្បាប់។
លោកថា៖ ‘‘ខ្ញុំបានឮម្តងហើយម្តងទៀត ប្រជាពលរដ្ឋត្រូវបានបដិសេធក្នុងការទទួលបានការឧបត្ថម្ភពីកម្មវិធី ប័ណ្ណក្រីក្ររបស់រាជរដ្ឋាភិបាល ប្រសិនបើពួកគេគាំទ្រគណបក្សជំទាស់ […] អ្នកសារព័ត៌មានបានប្រាប់ខ្ញុំថា ពួកគេត្រូវកែសម្រួល ការរាយការណ៍ព័ត៌មានរបស់ខ្លួនលើបញ្ហានយោបាយ ដើម្បីជៀសវាងកុំឱ្យក្លាយជាជនមុខសញ្ញា”។
ក្រៅពីនេះ លោក Andrews ក៏បានលើកឡើងពីការចូលរួមរបស់ស្ត្រីក្នុងវិស័យនយោបាយ ដែលនៅមានកម្រិតទាប។ លោកបានកត់សម្គាល់ថា ស្ត្រីមានត្រឹមប្រមាណ ១៩% ប៉ុណ្ណោះក្នុងព្រឹទ្ធសភា និង ១៤% ក្នុងរដ្ឋសភា ហើយស្ត្រីក៏មានវត្តមានតិចតួចនៅក្នុងជំនួបដែលលោកបានធ្វើជាមួយមន្ត្រីរាជរដ្ឋាភិបាល និងគណបក្សនយោបាយ ដោយលោកអំពាវនាវឱ្យបង្កើនការចូលរួមរបស់ស្ត្រីក្នុងដំណើរការនយោបាយ ដើម្បីលើកកម្ពស់ការតំណាងប្រកបដោយបរិយាបន្ន និងពង្រឹងលទ្ធិប្រជាធិបតេយ្យនៅកម្ពុជា៕
អត្ថបទដោយ៖ ផាត់ ស័ក្កស៊ីន