នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈបានចេញសេចក្តីបំភ្លឺមួយ អំពីការបែងចែកចំណូល ដែលទទួលបានពីការពិន័យអន្តរការណ៍ និងចំណាត់ការលើមន្ត្រីអសកម្ម បន្ទាប់ពីមានមតិរិះគន់មួយចំនួនតាមបណ្តាញទំនាក់ទំនងសង្គម ជុំវិញប្រតិបត្តិការរឹតបន្តឹងការអនុវត្តច្បាប់របស់មន្ត្រីនគរបាលចរាចរណ៍ផ្លូវគោកនាពេលថ្មីៗនេះ។
តាមរយៈសេចក្តីបំភ្លឺកាលពីថ្ងៃទី៧ ខែមេសា ឆ្នាំ២០២៦ នេះ នាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ បានបញ្ជាក់ថា ចំណូលប្រមាណ ៧០% ដែលទទួលបានពីការពិន័យអន្តរការណ៍លើអំពើល្មើសច្បាប់ចរាចរណ៍ផ្លូវគោក ត្រូវបានយកទៅប្រើប្រាស់សម្រាប់គាំទ្រការងារជំនាញរបស់មន្ត្រី ដូចជា ការជួសជុល និងថែទាំឧបករណ៍សម្ភារ ព្រមទាំងមធ្យោបាយដឹកជញ្ជូន ដើម្បីធានាប្រសិទ្ធភាព និងនិរន្តរភាពការងារ។
នាយកដ្ឋាននគរបាលចរាចរណ៍ ក៏បានបញ្ជាក់ផងដែរថា ការអនុវត្តច្បាប់របស់សមត្ថកិច្ចនគរបាលចរាចរណ៍ផ្លូវគោក គឺអនុលោមទៅតាមច្បាប់ និងលិខិតបទដ្ឋានគតិយុត្តិពាក់ព័ន្ធ រួមទាំងច្បាប់ស្តីពីចរាចរណ៍ផ្លូវគោក។
សេចក្តីបំភ្លឺរបស់នាយកដ្ឋានចរាចរណ៍បានបន្ថែមទៀតថា កន្លងមក មានការចាត់វិធានការយ៉ាងតឹងរឹងចំពោះមន្ត្រីអសកម្ម ឬមិនគោរពវិន័យ ដូចជាការព្រមាន បន្ថយឋានន្តរស័ក្តិ ប្តូរតួនាទី ឬបណ្តេញចេញពីក្របខណ្ឌ ក្នុងករណីធ្ងន់ធ្ងរក៏ដូចជាការណែនាំ និងក្រើនរំលឹកជាប្រចាំដល់មន្ត្រីនគរបាលចរាចរណ៍ផ្លូវគោកក្នុងក្របខណ្ឌទូទាំងប្រទេសអំពីវិន័យ ក្រមសីលធម៌វិជ្ជាជីវៈ និងឥរិយាបថទំនាក់ទំនងជាមួយប្រជាពលរដ្ឋ។
សេចក្តីបំភ្លឺនេះសរសេរថា “ជាថ្មីម្តងទៀត នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ សូមបដិសេធនូវមតិរិះគន់ទាំងឡាយណា ដែលមិនមានមូលដ្ឋានច្បាស់លាស់ មកលើមន្ត្រីនគរបាលចរាចរណ៍ផ្លូវគោក ដែលបាននិងកំពុងបំពេញភារកិច្ច ដោយមិនគិតពេលវេលាយប់ ឬថ្ងៃក្នុងគោលបំណងរួមចំណែកថែរក្សាសណ្តាប់ធ្នាប់សុវត្ថិភាពចរាចរណ៍ជូនប្រជាពលរដ្ឋ”។
បើតាមរបាយការណ៍របស់ក្រសួងមហាផ្ទៃនាពេលថ្មីៗនេះបានឱ្យដឹងថា គិតចាប់ពីថ្ងៃទី១ ខែមីនា ដល់ថ្ងៃទី៣១ ខែមីនា ឆ្នាំ២០២៦នេះ មានករណីគ្រោះថ្នាក់ចរាចរណ៍ផ្លូវគោកសរុបចំនួន ១៨៤ករណី ដែលក្នុងនោះ បណ្តាលឱ្យមានអ្នកស្លាប់ចំនួន ១០៧នាក់ និងរបួសធ្ងន់ស្រាល២៥៧នាក់។ ក្រសួងមហាផ្ទៃបញ្ជាក់ទៀតថា តួលេខនេះ បើធៀបនឹងខែកុម្ភៈបានថយចុះចំនួន១៨ករណី អ្នកស្លាប់ថយចុះ៦៣នាក់ និងអ្នករបួសថយចុះ ១៦០នាក់៕