សភាប្រើភាសាបារាំង (APF) អំពាវនាវឱ្យមានការគោរពយ៉ាងម៉ឹងម៉ាត់ចំពោះអធិបតេយ្យភាពរបស់កម្ពុជា ចៀសវាងរាល់សកម្មភាពឯកតោភាគី និងអនុវត្តឱ្យបានពេញលេញនូវសេចក្តីថ្លែងការណ៍រួម ដែលបានធ្វើឡើងនៅទីក្រុងគូឡាឡាំពួរ កាលពីថ្ងៃទី២៦ ខែតុលា ឆ្នាំ២០២៥។
សម័យប្រជុំប្រចាំឆ្នាំលើកទី៥១ នៃសភាប្រើភាសាបារាំងបានអនុម័តសេចក្តីសម្រេចចិត្តមួយកាលពីព្រឹកថ្ងៃទី១១ ខែកក្កដា ឆ្នាំ២០២៦ ដែលបញ្ជាក់ឡើងវិញអំពីការគាំទ្រចំពោះបូរណភាពទឹកដី នៃព្រះរាជណាចក្រកម្ពុជា និងការប្តេជ្ញាចិត្តរបស់សមាជិកប្រើភាសាបារាំងចំពោះគោលការណ៍ នៃសេចក្តីប្រកាសទីក្រុងបាម៉ាកូ និងទីក្រុងសាំង-បូនីហ្វាស ច្បាប់អន្តរជាតិ និងសាលក្រមរបស់តុលាការយុត្តិធម៌អន្តរជាតិ ចុះថ្ងៃទី១៥ ខែមិថុនា ឆ្នាំ១៩៦២ និងថ្ងៃទី១១ ខែវិច្ឆិកា ឆ្នាំ២០១៣។ នេះបើយោងតាមសេចក្តីប្រកាសព័ត៌មានរបស់ព្រឹទ្ធសភាកម្ពុជា ចុះថ្ងៃទី១២ ខែកក្កដា ឆ្នាំ២០២៦។
សេចក្តីប្រកាសព័ត៍មានដដែលនេះបានឱ្យដឹងថា សភាប្រើភាសាបារាំង (APF) បានសម្តែងការព្រួយបារម្ភអំពីការបាត់បង់ជីវិតមនុស្ស ការផ្លាស់ប្តូរទីលំនៅរបស់ប្រជាពលរដ្ឋ និងរបាយការណ៍នានាស្តីការរំលោភឈប់បទបាញ់ និងការប៉ះពាល់ដល់បូរណភាពទឹកដី នៃប្រទេសកម្ពុជា រួមទាំងការខូចខាតទីតាំងវប្បធម៌ និងសាសនា ស្របពេលដែលការប្រឈមមុខគ្នានៅបន្តកើតមាននៅតាមព្រំដែនរវាងកម្ពុជា-ថៃ ចាប់តាំងពីខែកក្កដា ឆ្នាំ២០២៥។
សេចក្តីសម្រេចរបស់សភាប្រើភាសាបារាំងក៏បានលើកឡើងអំពីការសាងសង់ហេដ្ឋារចនាសម្ព័ន្ធស៊ីវិល និងយោធា ការរៀបចំពិធីសាសនានៅក្នុងទីតាំងវប្បធម៍ និងជំនឿសាសនា ព្រមទាំងគំនិតផ្តួចផ្តើមក្នុងការបែងចែកដីធ្លីនៅក្នុងតំបន់ទាំងនោះ និងបានសម្តែងការសោកស្តាយចំពោះការបំផ្លិចបំផ្លាញបេតិកភណ្ឌវប្បធម៌។
តាមរយៈសេចក្តីសម្រេចដដែលនេះ សភាប្រើភាសាបារាំងក៏បានទាមទារឱ្យមានការបន្ធូរបន្ថយភាពតានតឹងជាបន្ទាន់ ការបន្តកិច្ចសន្យារវាងភាគីនានា និងការដកកងទ័ពប្រដាប់អាវុធទាំងអស់ចេញពីតំបន់ជម្លោះ និងគាំទ្រយន្តការទ្វេភាគី ដែលមានស្រាប់ ជាពិសេសគណៈកម្មការចម្រុះព្រំដែន (JBC) និងលើកទឹកចិត្តឱ្យមានការដោះស្រាយដោយសន្តិវិធីស្របតាមច្បាប់អន្តរជាតិ៕
អត្ថបទដោយ៖ តែម ស្រីណុច