តុលាការកំពូល នៅព្រឹកថ្ងៃទី២៤ ខែតុលា ឆ្នាំ២០២៥នេះ បានបដិសេធសំណើរសុំស្រូបទោសក្នុងសំណុំរឿងរបស់អនុប្រធានគណបក្សភ្លើងទៀន លោក ថាច់ សេដ្ឋា ដែលការណ៍នេះ មន្ត្រីបក្សប្រឆាំង និងសង្គមស៊ីវិល បង្ហាញការសោកស្តាយ និងយល់ថាជារឿងមិនយុត្តិធម៌។
កាលពីថ្ងៃទី១០ ខែតុលានេះ តុលាការកំពូល បានបើកសវនាការលើសំណុំរឿងស្នើសុំស្រូបទោសរបស់លោក ថាច់ សេដ្ឋា ហើយសាលដីកាត្រូវប្រកាសនៅថ្ងៃទី២៤ ខែតុលា ឆ្នាំ២០២៥នេះ។
សហមេធាវីការពារក្ដីរបស់លោក ថាច់ សេដ្ឋា គឺលោក ឯម ចន្ថា បានឱ្យដឹងថា ការប្រកាសសាលដីកា នាព្រឹកមិញនេះ តុលាការកំពូល បានបដិសេធសំណើរសុំស្រូបទោសរបស់កូនក្ដីលោក ហើយហេតុផលយ៉ាងណានោះ លោកនៅពុំទាន់ដឹងនៅឡើយ ដោយសារតុលាការមិនបានផ្តល់សំអាងហេតុផ្ទាល់មាត់។
លោកថា៖ «ឥឡូវត្រូវបានតុលាការគាត់សម្រេចបដិសេធថា មិនអនុញ្ញាតឱ្យស្រូបទេ ហើយពាក់ព័ន្ធនឹងអ្វីដែលយើងប្ដឹងហ្នឹង គឺដោយសារយើងមានមូលដ្ឋានច្បាប់មាត្រា៥០១ នៃក្រមនីតិវិធីព្រហ្មទណ្ឌថាសមត្ថកិច្ចថា ថាបានសម្រេចអំពី ការស្រូបទោស គឺចុងក្រោយតុលាការកំពូល ហើយយើងមានមាត្រា១៣៧ ១៣៨ នៃក្រមព្រហ្មទណ្ឌហ្នឹង និយាយអំពីបែបបទនៃការស្រូបទោស យើងសំអាងលើច្បាប់អនុញ្ញាតហ្នឹងបានយើងប្ដឹងចូលទៅតុលាការ»។
លោកមេធាវីថា លោក ថាច់ សេដ្ឋា មានសំណុំរឿងទាំងពីរ ដែលមេធាវីបានស្នើសុំស្រូបទោស ដើម្បីអនុវត្តទោសតាមច្បាប់។ សំណុំរឿងទីមួយទាក់ទងនឹងបទ «មិនបំពេញកាតព្វកិច្ចចំពោះឧបករណ៍អាចជួញដូរ» តុលាការកាត់ទោស ១ឆ្នាំកន្លះ និងបានអនុវត្តទោសរួច។ រីឯសំណុំរឿងទីពីរទាក់ទងនឹងបទ «ញុះញង់បង្កឲ្យមានភាពវឹកវរដល់សន្តិសុខសង្គម និងរើសអើង» តុលាការកាត់ទោស ៣ឆ្នាំ ហើយមេធាវីបានស្នើសុំស្រូបទោសសម្រាប់សំណុំរឿងទាំងពីរ។
លោកថាបន្តថា៖ «អ្វីដែលយើងបារម្ភ ដែលយើងមិនចង់ឃើញគឺការបូក បន្តការគិតរាប់ពីថ្ងៃអនុវត្តទោសលើកទីមួយហើយបូកបន្តទៅសម្រាប់ទោសទីពីរទៀត ទោសទីមួយហ្នឹងគឺចប់នៅថ្ងៃទី១៩ កក្កដា ម្ភៃបួន(ឆ្នាំ២០២៤) អ៊ីចឹងបើយើងបូករាប់បន្តបន្ទាប់ពីថ្ងៃ១៧ ខែកក្កដា ឆ្នាំ២០២៤ ត្រូវអនុវត្តទោស ទោសទី២បន្តទៅទៀត អីចឹងរហូតដល់ថ្ងៃទី១៧ ខែកក្កដា ឆ្នាំ២០២៧ បីឆ្នាំ ដែលចំណុចនេះ គឺជាចំណុចដែលប៉ះពាល់ដល់កូនក្ដីខ្លាំងណាស់ ព្រោះការបូកគឺយូរ ទៅជាបួនឆ្នាំកន្លះហើយ បានយើងព្យាយាមស្វះស្វែងមើលផ្លូវច្បាប់ដើម្បីផលប្រយោជន៍របស់កូនក្ដី»។
អគ្គលេខាធិការគណបក្សភ្លើងទៀន លោក លី សុធារ៉ាយុត្តិ យល់ថា ការសម្រេចរបស់តុលាការ ជារឿងអយុត្តិធម៌សម្រាប់លោក ថាច់ សេដ្ឋា ព្រោះច្បាប់អនុញ្ញាតឲ្យស្នើសុំស្រូបទោសបាន។
លោកថា៖ «ការបដិសេធរបស់តុលាការនេះ គឺវាអយុត្តិធម៌សម្រាប់លោកថាច់ សេដ្ឋា ព្រោះថាច្បាប់បានអនុញ្ញាតឲ្យស្នើទទួលការស្រូបទោស។ យើងនឹងជជែកគ្នាបន្ថែមទៀតជាមួយនឹងលោកមេធាវីការពារលោក សេដ្ឋា ដើម្បីពិនិត្យលើការឃុំខ្លួនក្នុងសំណុំរឿងទី២នេះឡើងវិញ ដើម្បីស្នើដល់តុលាការដោះលែងលោក ថាច់ សេដ្ឋា។ យើងទុកឲ្យមេធាវីទាំង២រូបពិនិត្យ និងធ្វើការនេះ»។
អ្នកនាំពាក្យតុលាការកំពូល លោកស្រី ម៉ៅ ធីតា ពុំទាន់អាចសុំការបញ្ជាក់បានទេ ជុំវិញករណីនេះ។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា ការសម្រេចរបស់តុលាការកំពូល លើសំណើរសុំស្រូបទោសរបស់លោក ថាច់ សេដ្ឋា នេះជាឆន្ទានុសិទ្ធិរបស់តុលាការ។
យ៉ាងណា លោកថា ជុំវិញសំណុំរឿងរបស់អនុប្រធានគណបក្សប្រឆាំងរូបនេះ កន្លងមក មានការរិះគន់ពីអង្គការសិទ្ធិមនុស្ស និងសហគមន៍អន្តរជាតិជាច្រើន ថាជារឿងនយោបាយ ច្រើនជាងការអនុវត្តច្បាប់ និងថាជាការរឹតត្បិតលំហរសេរីភាពនយោបាយ ដោយសារតែលោក ថាច់ សេដ្ឋា ជាអ្នកនយោបាយដែលមានភាពសកម្ម និងមានប្រជាប្រិយភាព។
លោកបន្ថែមថា៖ «ស្ថានភាពបច្ចុប្បន្ន កម្ពុជាគួរតែមានសាមគ្គីភាព ឯកភាពជាតិ ពីគ្រប់គណបក្សនយោបាយ អ្នកនយោបាយ និងប្រជាពលរដ្ឋ ដូច្នេះគួរមានការដោះលែងសកម្មជនគណបក្សនយោបាយ សកម្មជនសហជីព សកម្មជនសិទ្ធិមនុស្ស និងសកម្មជនបរិស្ថានឱ្យមានសេរីភាពឡើងវិញ»។
លោក ថាច់ សេដ្ឋា អនុប្រធានគណបក្សភ្លើងទៀន និងជាប្រធានសហគមន៍ខ្មែរកម្ពុជាក្រោមផងនោះ ត្រូវបានសមត្ថកិច្ចចាប់ខ្លួនកាលពីថ្ងៃទី១៦ ខែមករា ឆ្នាំ២០២៣ ក្រោយរងបណ្តឹងពីម្ចាស់ហាងបញ្ចាំមួយ ដែលប្តឹងរូបលោក ថាបានចេញមូលប្បទានប័ត្រចំនួន ៥សន្លឹក ដែលមិនមានទឹកប្រាក់ ដែលរឿងនេះបានកើតឡើងកាលពីឆ្នាំ២០១៩។ សំណុំរឿងនេះ សាលាដំបូងរាជធានីភ្នំពេញ បានសម្រេចផ្តន្ទាទោស លោក ថាច់ សេដ្ឋា ដាក់ពន្ធនាគារ ១៨ខែ (១ឆ្នាំកន្លះ) ពីបទ «មិនបំពេញកាតព្វកិច្ចចំពោះឧបករណ៍ដែលអាចជួញដូរបាន» កាលពីថ្ងៃទី២១ ខែកញ្ញា ឆ្នាំ២០២៣។
ក្រៅពីសំណុំរឿងនេះ លោក ថាច់ សេដ្ឋា ក៏ត្រូវបានសាលាដំបូងរាជធានីភ្នំពេញ ផ្តន្ទាទោសពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និងបទ «ញុះញង់ឱ្យមានការរើសអើង» ដោយដាក់ពន្ធនាគារ ៣ឆ្នាំ ក្រោមបណ្តឹងរបស់គណបក្សកាន់អំណាច ពាក់ព័ន្ធនឹងការថ្លែងរបស់លោកនៅប្រទេសកូរ៉េខាងត្បូង អំពីប្រវត្តិនៃការកកើតគណបក្សប្រជាជនកម្ពុជា និងថ្ងៃ៧មករា៕