កម្ពុជាបន្តរងឥទ្ធិពលពីព្យុះទី៩ ដែលបានវិវត្តទៅជាព្យុះសង្ឃរា ដោយធ្វើឱ្យតំបន់វាលទំនាប តំបន់ខ្ពង់រាប និងតំបន់មាត់សមុទ្រ បន្តមានភ្លៀងធ្លាក់ លាយឡំជាមួយខ្យល់កន្ត្រាក់ និងផ្គររន្ទះ ចាប់ពីថ្ងៃទី០៧ ដល់ថ្ងៃទី០៩ ខែកក្កដា ឆ្នាំ២០២៦។
សេចក្តីជូនដំណឹងរបស់ក្រសួងធនធានទឹក និងឧតុនិយម ដែលចេញផ្សាយនៅថ្ងៃទី០៧ ខែកក្កដា ឆ្នាំ២០២៦ បានឱ្យដឹងថា ព្យុះទី៩ ឈ្មោះ បាវី នៅតែបន្តមានឥទ្ធិពលលើរបបខ្យល់មូសុងនិរតី ដែលបក់លើឈូងសមុទ្របេងហ្គោល សមុទ្រអាន់ដាម៉ាន់ សមុទ្រចិនខាងត្បូង អាងទន្លេមេគង្គ សមុទ្រកម្ពុជា និងព្រះរាជាណាចក្រកម្ពុជា។
ក្រសួងបានបញ្ជាក់ថា ទោះបីកម្ពុជាមិនស្ថិតនៅក្នុងគន្លងផ្លូវដើររបស់ព្យុះនេះក៏ដោយ ក៏ឥទ្ធិពលរបស់វានឹងបង្កឱ្យមានភ្លៀងធ្លាក់ជាមួយខ្យល់កន្ត្រាក់ និងផ្គររន្ទះនៅតាមតំបន់វាលទំនាប តំបន់ខ្ពស់រាប និងតំបន់មាត់សមុទ្រ ក្នុងអំឡុងថ្ងៃទី០៧ ដល់ថ្ងៃទី០៩ ខែកក្កដា ឆ្នាំ២០២៦ ខណៈសីតុណ្ហភាពអាចមានចន្លោះពី ២៤អង្សាសេ ដល់ ៣៦អង្សាសេ។
បើតាមក្រសួង សម្រាប់តំបន់វាលទំនាប រួមមាន រាជធានីភ្នំពេញ ខេត្តបន្ទាយមានជ័យ បាត់ដំបង ពោធិ៍សាត់ សៀមរាប កំពង់ឆ្នាំង កំពង់ធំ កំពង់ចាម ត្បូងឃ្មុំ ស្វាយរៀង ព្រៃវែង តាកែវ និងកណ្ដាល អាចមានភ្លៀងធ្លាក់ជាមួយខ្យល់កន្ត្រាក់ និងផ្គររន្ទះ គ្របដណ្តប់ប្រមាណ ៥០% នៃផ្ទៃដី ខណៈសីតុណ្ហភាពអាចមានចន្លោះពី ២៥អង្សាសេ ដល់ ៣៦អង្សាសេ។
ចំណែក តំបន់ខ្ពង់រាប រួមមាន ខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ជួរភ្នំដងរែក និងតំបន់ជួរភ្នំក្រវាញ រួមនឹងតំបន់មាត់សមុទ្រ រួមមាន ខេត្តកោះកុង ព្រះសីហនុ កំពត កែប និងជួរភ្នំបូកគោ ក៏អាចមានភ្លៀងធ្លាក់ជាមួយខ្យល់កន្ត្រាក់ និងផ្គររន្ទះ គ្របដណ្តប់ប្រមាណ ៦០% នៃផ្ទៃដីផងដែរ ហើយសីហតុណ្ហភាព អាចមានចន្លោះពី២៤អង្សាសេ ដល់ ៣៥អង្សាសេ។ រីឯ រលកសមុទ្រ មានកម្ពស់ចន្លោះពី ០,៥ម៉ែត្រ ដល់ ១,៥០ម៉ែត្រ។
គួរបញ្ជាក់ថា គិតចាប់តាំងពីដើមខែកក្កដានេះ កម្ពុជាបានទទួលរងឥទ្ធិពលខ្យល់ព្យុះចំនួន ២ រួមមាន ខ្យល់ព្យុះទី៩ ឈ្មោះ បាវី នេះនិងខ្យល់ព្យុះទី១០ ឈ្មោះ មៃសាក់។ នេះបើតាមសេចក្តីជូនដំណឹងរបស់ក្រសួងធនធានទឹក និងឧតុនិយម ចេញផ្សាយកាលពីថ្ងៃទី០៣ កក្កដា ឆ្នាំ២០២៦។ យ៉ាងណា ក្រសួងថា សម្រាប់ព្យុះទី១០ ឈ្មោះ មៃសាក់ បានចុះខ្សោយឥទ្ធិពល និងរលាយបាត់ទៅវិញ កាលពីថ្ងៃទី៦ ខែកក្កដា ឆ្នាំ២០២៦៕
អត្ថបទដោយ៖ គង់ ច័ន្ទពេជ្ររ៉ា