អង្គភាពប្រឆាំងអំពើពុករលួយ (ACU) បានប្រកាសឱ្យដឹងកាលពីសប្តាហ៍មុនអំពីការឃាត់ខ្លួនមន្ត្រីនគរបាលមួយរូបនៅខេត្តបាត់ដំបងនិងអ្នកពាក់ព័ន្ធ ដែលតាមចោទថា បានទទួលសំណូកជិត៨០ម៉ឺនដុល្លារជាថ្នូរនឹងការរត់ការដោះលែងជនសង្ស័យជនជាតិថៃជាង៤០នាក់ ដែលពាក់ព័ន្ធនឹងសកម្មភាពឆបោកអនឡាញ។ ព័ត៌មាននេះបានធ្វើឱ្យមានការភ្ញាក់ផ្អើលនៅក្នុងចំណោមសាធារណជននិងអ្នកឃ្លាំមើលសង្គម។
ខណៈសង្គមស៊ីវិលនិងអ្នកឃ្លាំមើលសង្គមមួយចំនួនបានសាទរចំពោះចំណាត់ការរបស់អង្គភាពប្រឆាំងអំពើពុករលួយ ពួកគេបន្តជំរុញឱ្យវែកមុខអ្នកពាក់ព័ន្ធបន្ថែមទៀត ដោយអះអាងថា ករណីនេះអាចជាផ្នែកមួយនៃបណ្តាញអំពើពុករលួយធំជាងនេះ ដែលពាក់ព័ន្ធនឹងបទល្មើសបច្ចេកវិទ្យា ដែលកំពុងរីករាលដាល។
យោងតាមរបាយការណ៍ដែលចេញផ្សាយនៅថ្ងៃទី២៩ ខែកញ្ញា ឆ្នាំ២០២៥ អង្គភាពប្រឆាំងអំពើពុករលួយ(ACU) បានបញ្ជាក់ថា ឈ្មោះ វ៉ន វាសនា អធិការរងនគរបាលស្រុកបវេល ខេត្តបាត់ដំបង គឺជាអ្នករត់ការដោយទទួលសំណូកពីថៅកែជនជាតិថៃម្នាក់ឈ្មោះ OVARARINT RAWI តាមរយៈជនជាតិថៃមួយរូបទៀតឈ្មោះ SRIPHAN SUPARP ដើម្បីដោះលែងក្រុមកូនចៅរបស់ខ្លួនចំនួន៤៣នាក់ ដែលត្រូវបានឃាត់ខ្លួន។ តាមចោទថា លោក វាសនា ទទួលបានប្រាក់១៨.០០០ដុល្លារក្នុងមនុស្សម្នាក់ ដែលសរុបទាំងអស់៧៧៤.០០០ដុល្លារ ដើម្បីរត់ការដោះលែងជនសង្ស័យទាំងនេះ។
យោងតាម ACU បានឱ្យដឹងថា នៅយប់ថ្ងៃទី៦ ខែឧសភា ឆ្នាំ២០២៥ ឈ្មោះ វ៉ន វាសនា បានប្រគល់ប្រាក់ ២៨៤ ០០០ ដុល្លារ ឱ្យឈ្មោះ ហេង សុខណា នៅខេត្តកំពត ដើម្បីរត់ការសូកប៉ាន់ និងមានឈ្មោះ មុនី សុខដារ៉ូ ជាអ្នកឃុបឃិត និងជួយលាក់បាំងការផ្ទេរប្រាក់ ប៉ុន្តែការរត់ការនេះមិនបានសម្រេច។ នៅក្នុងករណីនេះ ACU រកឃើញអ្នកពាក់ព័ន្ធចំនួន៦រូប មានឈ្មោះ វ៉ន វាសនា ជាអធិការរងស្រុកបវេល ឈ្មោះ តាំង សំណាង ជាមន្ត្រីយោធា ឈ្មោះ ហេង សុខណា និងឈ្មោះ មុនី សុខដារ៉ូ ដែលអ្នកទាំងពីរត្រូវបាន ACU ឃាត់ខ្លួននៅថ្ងៃទិ១៨កញ្ញា ឆ្នាំ២០២៥ ដោយជាប់ចោទពីបទប៉ុនប៉ងសូកប៉ាន់ ខណៈជនសង្ស័យជនជាតិថៃពីរនាក់ទៀតគេចខ្លួន។
ជុំវិញករណីនេះ លោក មាស នី អ្នកស្រាវជ្រាវខាងការអភិវឌ្ឍសង្គម គាំទ្រចំណាត់ការរបស់អង្គភាពប្រឆាំងអំពើពុករលួយលើមន្ត្រីដែលសង្ស័យថា បានទទួលសំណូកជាថ្នូរនឹងការដោះលែងក្រុមឆបោកតាមអនឡាញជនជាតិថៃ ប៉ុន្តែលោកទទូចឱ្យមានការស៊ើបអង្កេតស៊ីជម្រៅបន្ថែមទៀត ព្រោះការរកឃើញនេះ គ្រាន់តែជាករណីមួយក្នុងចំណោមករណីច្រើនទៀត។
លោកមានប្រសាសន៍ថា៖ « ខ្ញុំចង់ឃើញ ACU បំពេញតួនាទីឱ្យកាន់តែសកម្ម ហើយរុកទៅរកសំបុកដើមនៃអំពើឧក្រិដ្ឋកម្ម Scam online ហ្នឹង»។
លោកបន្ថែមថា ករណីអំពើពុករលួយនេះត្រូវការការស៊ើបអង្កេតបន្ថែមទៀត ព្រោះថា អាចមានអ្នកពាក់ព័ន្ធច្រើននាក់ទៀតក្នុងរឿងនេះ។
លោកមានប្រសាសន៍ថា៖ «បើនិយាយអំពីអំពើពុករលួយវិញ អ្វីដែលយើងត្រូវការស៊ើបអង្កេតបន្តទៀត ព្រោះអីជាប្រពៃណីការអំពើពុករលួយបែបហ្នឹង គឺមិនសូវកើតសម្រាប់តែបុគ្គលម្នាក់ៗទេ ច្រើនតែយកមកចែកគ្នារស់។ បានន័យថា ខាងក្រោមចិញ្ចឹមថ្នាក់លើ ថ្នាក់លើចិញ្ចឹមថ្នាក់លើទៀត ខ្មែរយើងប្រពៃណីបែបហ្នឹងហើយ។ អ៊ីចឹងការស្រាវជ្រាវស៊ើបអង្កេតបន្តទៅលើអ្នកដែលឃុបខិតទៀត អាហ្នឹងសុទ្ធតែជារឿងដែលយើងអាចបង្ហាញទៅដល់មន្ត្រីដទៃទៀត»។
ការឃាត់ខ្លួននេះ ធ្វើឡើងចំពេលមានការព្រួយបារម្ភកាន់តែខ្លាំងឡើងអំពីការជាប់ពាក់ព័ន្ធរបស់មន្ត្រីនៅក្នុងប្រតិបត្តិការឆបោកអនឡាញដែលបានរីករាលដាលនៅក្នុងប្រទេសកម្ពុជា។ ចំណាត់ការនេះ មិនមែនជាលើកដំបូងទេ កាលពីថ្ងៃទី១៦ ខែកក្កដា ឆ្នាំ២០២៥ ក្រសួងយុត្តិធម៌បានសម្រេចផ្អាកមុខងារលោក គ្រី សីហា ព្រះរាជអាជ្ញារងនៃអយ្យការអមសាលាដំបូងខេត្តពោធិ៍សាត់ជាបណ្តោះអាសន្ន ជុំវិញការសម្រេចដោះលែងជនសង្ស័យពាក់ព័ន្ធក្នុងបទល្មើសឆបោកតាមប្រព័ន្ធបច្ចេកវិទ្យា។ ការសម្រេចផ្អាកមុខងារព្រះរាជអាជ្ញារងរូបនេះ គឺធ្វើតាមបញ្ជារបស់លោកនាយករដ្ឋមន្ត្រី ហ៊ុន ម៉ាណែត។
លោក រ៉ុង ឈុន ជាទីប្រឹក្សាគណបក្សកម្លាំងជាតិមានប្រសាសន៍ថា ទំហំទឹកប្រាក់នៃការប្រព្រឹត្តនេះ គឺច្រើន ហើយអាចមានខ្សែបណ្តាញនិងអ្នកពាក់ព័ន្ធច្រើន ដោយលោកស្នើសុំឱ្យមានការស្រាវជ្រាវនិងអនុវត្តច្បាប់លើមន្ត្រីទាំងនោះ ដោយគ្មានការលើកលែង ប្រសិនបើរកឃើញថា ពិតជាបានប្រព្រឹត្តអំពើពុករលួយមែន។
លោកមានប្រសាសន៍ថា៖ «ការបោសសម្អាតអំពើពុករលួយវាត្រូវបោសសម្អាតពីលើមកក្រោម។ បើយើងគ្រាន់តែបោសសម្អាតថ្នាក់ក្រោម ថ្នាក់លើដែលប្រព្រឹត្តយើងមិនមានវិធានការចាត់ការតាមផ្លូវច្បាប់ អាហ្នឹងក៏វានៅតែបោសបានបន្តិចទៅ វាអាចកើតមកវិញបន្តបន្ទាប់ទៀត»។
លោក រ៉ុង ឈុន សម្តែងការព្រួយបារម្ភថា កាលណាអំពើពុករលួយកើតឡើងក្នុងសង្គមនោះ វាអាចបង្កឱ្យមានអយុត្តិធម៌សង្គមកើតឡើង បញ្ហាភាពក្រីក្រ និងមិនអាចធ្វើឱ្យសង្គមរីកចម្រើនបានទេ។
ជុំវិញករណីនេះដែរ លោក អំ សំអាត នាយកទទួលបន្ទុកកិច្ចការទូទៅនៃអង្គការលីកាដូ ចាត់ទុកករណីអធិការរងនគរបាលស្រុកបវេល ខេត្តបាត់ដំបងទទួលសំណូកជាថ្នូរនឹងការដោះលែងក្រុមឆបោកតាមអនឡាញជនជាតិថៃនេះថា ជារឿងប៉ះពាល់មុខមាត់មន្ត្រីអនុវត្តច្បាប់។
លោកថា៖ «វាជារឿងគូរឱ្យអាម៉ាស់មួយដែលមន្ត្រីនគរបាលម្នាក់មានឋាន:ជាអធិការងស្រុកបវេល ខេត្តបាត់ដំបងប្រព្រឹត្តនូវអំពើពុករលួយក្នុងបទឧក្រិដ្ឋកម្មឆរបោកតាមប្រព័ន្ធអនឡាញ ដោយទទួលសំណូកក្នុងការដោះលែងឧក្រិដ្ឋជន»។
លោក អំ សំអាត បន្ថែមថា បញ្ហាឆបោកអនឡាញបានក្លាយជាបញ្ហាក្តៅគគុកក្នុងពិភពលោកជាពិសេសនៅក្នុងតំបន់អាស៊ីអាគ្នេយ៍ ដែលទាមទារឱ្យមានការអនុវត្តច្បាប់លើអ្នកពាក់ព័ន្ធ។ ដោយលោកសម្តែងការព្រួយបារម្ភថា បញ្ហាឆបោកតាមអនឡាញនេះប៉ះពាល់ធ្ងន់ធ្ងរដល់សង្គមជាតិដូចជាប៉ះពាល់ដល់វិស័យទេសចរណ៍អន្តរជាតិ ការវិនិយោគ និងប៉ះពាល់ដល់សន្តិសុខសណ្តាប់ធ្នាប់ និងសុវត្ថិភាពនៅក្នុងសង្គម។
ទោះបីជាយ៉ាងណាលោក សយ ច័ន្ទវិចិត្រ អ្នកនាំពាក្យអង្គភាពប្រឆាំងអំពើពុករលួយ(ACU) បានប្រាប់ Press Start Cambodia នៅថ្ងៃទី៣០ ខែកញ្ញា ឆ្នាំ២០២៥ ថា អង្គភាពប្រឆាំងអំពើពុករលួយប្ដេជ្ញាបន្តអនុវត្តតួនាទីរបស់ខ្លួនឱ្យបានហ្មត់ចត់ ដើម្បីធានាថា ប្រទេសមានភាពស្របច្បាប់ និងសុចរិត។ លោកក៏បានអំពាវនាវឱ្យសាធារណជនចូលរួមទាំងអស់គ្នាក្នុងការប្រយុទ្ធប្រឆាំងអំពើពុករលួយ ដើម្បីឱ្យស្ថាប័នរដ្ឋមានភាពស្អាតស្អំ និងប្រទេសជាតិរឹងមាំជាបន្ត។
លោកមានប្រសាសន៍ថា ៖ « អង្គភាព [ប្រឆាំងអំពើពុករលួយ] នៅតែធ្វើការបំពេញតួនាទីរបស់ខ្លួនក្នុងនាមជាសេនាធិការរបស់រដ្ឋាភិបាលក្នុងការដឹកនាំក្នុងការប្រឆាំងអំពើពុករលួយប្រកបដោយការទទួលខុសត្រូវ ចឹងបានន័យថា ការងាររបស់យើង យើងធ្វើការដោយទទួលខុសត្រូវ ហើយមានចំណាត់ការណាមួយដែលច្បាស់លាស់ ម៉តចត់”។
ការលាតត្រដាងករណីសូកប៉ាន់ដ៏ធំមួយនេះ ដែលពាក់ព័ន្ធនឹងបទល្មើសឆបោកអនឡាញ កើតមាន ស្របពេលក្រសួងការបរទេសអាមេរិកចេញរបាយការណ៍ស្តីពីការជួញដូរមនុស្សឆ្នាំ២០២៥ (TIP) នៅថ្ងៃទី២៩ ខែកញ្ញា ឆ្នាំ២០២៥ ដោយបន្តដាក់កម្ពុជានៅក្នុងចំណាត់ថ្នាក់កម្រិតទី៣ ដដែលជាប្រទេសមានបញ្ហាអំពើជួញដូរមនុស្សធ្ងន់ធ្ងរ។
របាយការណ៍បានបញ្ជាក់ថា៖ «រដ្ឋាភិបាលកម្ពុជាមិនបានបំពេញតាមស្តង់ដារអប្បបរមានៃការលុបបំបាត់អំពើជួញដូរមនុស្ស និងមិនបានខិតខំប្រឹងប្រែងគ្រប់គ្រាន់ ដើម្បីលុបបំបាត់បញ្ហានេះទេ»។
ការរិះគន់របស់សហរដ្ឋអាមេរិក ផ្តោតសំខាន់លើការដែលកម្ពុជាបានផ្តល់ជម្រកដល់ឧស្សាហកម្មឆបោកតាមអនឡាញ និងការប្រើប្រាស់កម្លាំងពលកម្មដោយបង្ខំ ដែលអ្នកស្រាវជ្រាវ និងអ្នកស៊ើបអង្កេតបានបានរាយការណ៍ថា មានការគប់គិតពីមន្ត្រីជាន់ខ្ពស់។
ក្រសួងការបរទេសអាមេរិកលើកឡើងក្នុងរបាយការណ៍ថា៖ «មន្ត្រីរដ្ឋាភិបាលជាន់ខ្ពស់ បានបំភិតបំភ័យជនរងគ្រោះ និងសាក្សីដែលបានដឹងពីការប្រើកម្លាំងពលកម្មដោយបង្ខំនៅក្នុងប្រតិបត្តិការឆបោកតាមអនឡាញ ក៏ដូចជាសកម្មជនសង្គមស៊ីវិល ដែលកំពុងធ្វើការ ដើម្បីលាតត្រដាងអំពើជួញដូរមនុស្ស ដែលទាក់ទងនឹងអំពើឆបោកអនឡាញ និងបានរារាំងដល់ការស៊ើបអង្កេត លើអំពើជួញដូរមនុស្សនៅតាមទីតាំងឆបោកតាមអនឡាញ»។
ក្រសួងការបរទេសអាមេរិកបានអំពាវនាវឱ្យកម្ពុជា ផ្តន្ទាទោសអ្នកជួញដូរមនុស្សរួមទាំងមន្ត្រី និងពង្រឹងការអនុវត្តច្បាប់ ព្រមទាំងពង្រីកការពារ និងសេវាកម្មសម្រាប់ជនរងគ្រោះ និងអនុញ្ញាតឱ្យសង្គមស៊ីវិលនិងអ្នកសារព័ត៌មានប្រតិបត្តិការដោយសេរី។
យោងតាមរបាយការណ៍ឆ្នាំ២០២៤ នៃគម្រោងប្រឆាំងការជួញដូរមនុស្សនៅកម្ពុជា (Cambodia Counter Trafficking in Persons Project – CTIP) របស់អង្គការ Winrock International បានប៉ាន់ប្រមាណថា មានកន្លែងឆបោកតាមអនឡាញយ៉ាងហោចណាស់៣៥០ ទីតាំងកំពុងដំណើរការនៅទូទាំងប្រទេសកម្ពុជា ដែលមានពលករបរទេសប្រមាណ ១៥ម៉ឺននាក់ ដោយគិតចាប់ពីពាក់កណ្តាលឆ្នាំ២០២១មក។ ពលករបរទេសទាំងនោះត្រូវបានបង្ខំឱ្យធ្វើសកម្មភាពឆបោកអនឡាញក្រោមការឃ្លាំមើលនិងគំរាមកំហែង។
ស្រដៀងគ្នានេះដែរ កាលថ្ងៃទី៨ ខែកញ្ញា ឆ្នាំ២០២៥ ក្រសួងសេដ្ឋកិច្ចសហរដ្ឋអាមេរិកចាត់វិធានការលើទីតាំងឆបោកអនឡាញនៅអាស៊ីអាគ្នេយ៍រួមទាំងទីតាំងឆបោកអនឡាញ ១០ កន្លែងនៅក្នុងប្រទេសកម្ពុជា ដែលភាគច្រើនស្ថិតនៅក្នុងកាស៊ីណូ ដែលកាន់កាប់ដោយជនជាតិចិន។ បើតាមក្រសួងសេដ្ឋកិច្ចសហរដ្ឋអាមេរិកថា ជនជាតិអាមេរិកបានបាត់បង់ប្រាក់ជាង ១០ ពាន់លានដុល្លារ ក្នុងឆ្នាំ២០២៤ ដោយសារបណ្តាញឆបោក ដែលមានមូលដ្ឋាននៅអាស៊ីអាគ្នេយ៍ ហើយទីតាំងកាស៊ីណូទាំងនេះ ត្រូវបានប្រើប្រាស់សម្រាប់ការឆបោកវិនិយោគរូបិយប័ណ្ណឌីជីថល។
ជាការឆ្លើយតប មន្ត្រីជាន់ខ្ពស់រដ្ឋាភិបាលកម្ពុជាតែងតែអះអាងថា កម្ពុជាមិនដែលព្រងើយកន្តើយចំពោះបទល្មើសជួញដូរមនុស្សនិងឧក្រិដ្ឋកម្មឆបោកតាមអនឡាញឡើយ។ តាមរយៈរបាយការណ៍ក្រសួងព័ត៌មាន បញ្ជាក់ថា ប្រតិបត្តិការបង្ក្រាបសកម្មភាពឆបោកតាមប្រព័ន្ធបច្ចេកវិទ្យា ចាប់ថ្ងៃទី២៧ ខែមិថុនា ដល់ថ្ងៃទី២២ ខែកក្កដា ឆ្នាំ២០២៥ សមត្ថកិច្ចបានឃាត់ខ្លួនជនសង្ស័យបានចំនួន ៣០៧៥ នាក់ ដែលមានស្ត្រីចំនួន ៦០៦ នាក់។ ក្នុងចំណោមជនសង្ស័យទាំងនោះ មានជនជាតិចិនចំនួន ១០២៨ នាក់ មានស្ត្រីចំនួន ៨៩នាក់។
ជុំវិញករណីមន្ត្រីនគរបាលស្រុកបវេលទទួលសំណូក ដើម្បីរត់ការដោះលែងជនសង្ស័យជនជាតិថៃជាង៤០នាក់ ក្នុងករណីឆបោកតាមអនឡាញនេះដែរ លោក ប៉ែន បូណា អ្នកនាំពាក្យរដ្ឋាភិបាលបានការពារចំណាត់ការរបស់អង្គភាពប្រឆាំងអំពើពុករលួយ ដោយអះអាងថា តាមរយៈការចាប់ខ្លួននេះបានបង្ហាញថា អាជ្ញាធរកំពុងតែស៊ើបអង្កេតយ៉ាងសកម្មនិងមានប្រសិទ្ធភាព ហើយថា គួរតែមានការលើកទឹកចិត្តជាជាងរង់ចាំតែរិះគន់។
លោកមានប្រសាសន៍ថា៖ «ដោយសារមានការស៊ើបអង្កេតយ៉ាងសកម្មបែបនេះហើយទើបអាចចាប់បានជនល្មើស។ គេខំធ្វើការគួរតែចេះលើកទឹកចិត្តគេខ្លះផង កុំចាំតែតិះគន់។ អ្នកណាប្រព្រឹត្តល្មើសច្បាប់ អ្នកនោះត្រូវតែទទួលទោសតាមផ្លូវច្បាប់ដោយគ្មានការលើកលែង និងអនុគ្រោះឡើយ”។
លោក ទូច សុខៈ អ្នកនាំពាក្យក្រសួងមហាផ្ទៃ បានបដិសេដមិនធ្វើអត្ថាធិប្បាយ ដោយបង្វែរសំណួរទៅអង្គភាពប្រឆាំងអំពើពុករលួយវិញ។ ចំណែកលោក ឆាយ គឹមឃឿន អ្នកនាំពាក្យអគ្គស្នងការនគបាលជាតិ មិនអាចសុំការអត្ថាធិប្បាយបានទេ។
ពាក់ព័ន្ធនឹងបទល្មើសឆបោកតាមអនឡាញនេះដែរ លោកនាយករដ្ឋមន្ត្រី ហ៊ុន ម៉ាណែត កាលថ្ងៃទី១៤ ខែកក្កដា ឆ្នាំ២០២៥ បានចេញបញ្ជាទៅកាន់ក្រសួង ស្ថាប័ន និងអាជ្ញាធរពាក់ព័ន្ធរួមមានមន្ត្រីយោធា នគរបាលជាតិ ឆ្មាំព្រំដែន និយ័តករល្បែងស៊ីសង និងភ្នាក់ងារផ្សេងៗទៀត ដាក់គោលដៅបង្ក្រាបទីតាំងប្រតិបត្តិការឆបោក និងឧក្រិដ្ឋកម្មពាក់ព័ន្ធ ដូចជាការជួញដូរមនុស្សជាដើម៕