ប្រមុខរដ្ឋាភិបាលកម្ពុជា នៅថ្ងៃទី០៣ខែមេសានេះ បានចេញបទបញ្ជាដាច់ណាត់ឱ្យក្រសួង និងស្ថាប័នពាក់ព័ន្ធស្រាវជ្រាវជាបន្ទាន់ ជុំវិញករណីមានបណ្តាញលួចនាំប្រេងខុសច្បាប់ ពីប្រទេសថៃចូលមកកម្ពុជា ហើយត្រូវចាត់វិធានការច្បាប់ឱ្យតឹងរឹងចំពោះក្រុមហ៊ុន និងមន្ត្រីរាជការ ឬកងរាជអាវុធហត្ថ ដែលពាក់ព័ន្ធនឹងករណីនេះ។
លោកនាយករដ្ឋមន្ត្រី ហ៊ុន ម៉ាណែត បានលើកឡើងនៅក្នុងហ្វេសប៊ុករបស់លោក នាថ្ងៃទី០៣ ខែមេសា ឆ្នាំ២០២៦នេះថា លោកបានឃើញបណ្ដាញសារព័ត៌មានថៃ ចុះផ្សាយព័ត៌មានពាក់ព័ន្ធនឹងករណីដែលមានបណ្ដាញលួចនាំប្រេងខុសច្បាប់ ពីប្រទេសថៃចូលមកលក់នៅកម្ពុជានៅក្នុងពេលនេះ។
ការណ៍នេះ លោកបានបញ្ជាទៅរដ្ឋមន្ត្រីក្រសួងរ៉ែ និងថាមពល លោក កែវ រតនៈ អគ្គស្នងការនគរបាលជាតិ និងអគ្គនាយកដ្ឋានគយ ឱ្យស្រាវជ្រាវករណីនេះឱ្យបានច្បាស់លាស់ ហើយប្រសិនជាកើតមានពិតមែន ត្រូវស្រាវជ្រាវឲ្យឃើញមុខសញ្ញាពាក់ព័ន្ធទាំងអស់ និងត្រូវចាត់វិធានការច្បាប់ឲ្យបានតឹងរឹងបំផុត។
លោកបានគូសបញ្ជាក់ថា៖ «ប្រសិនជាមានពាក់ព័ន្ធជាមួយក្រុមហ៊ុនប្រេងណាមួយ ត្រូវដកអាជ្ញាប័ណ្ណ។ ប្រសិនជាមានពាក់ព័ន្ធជាមួយមន្ត្រីរាជការ ឬកងកម្លាំងប្រដាប់អាវុធកម្ពុជា ត្រូវបញ្ចប់តួនាទី និងបណ្ដេញចេញពីក្របខណ្ឌជាកំហិត មិនថាបុគ្គលនោះមានតួនាទី ឬឋានន្តរស័ក្តិប៉ុណ្ណាទេ»។
Press Start Cambodia មិនអាចសុំការអធិប្បាយពីរដ្ឋមន្ត្រីក្រសួងរ៉ែ និងថាមពល លោក កែវ រតនៈ និងអគ្គស្នងការនគរបាលជាតិ លោក ស ថេត ព្រមទាំងអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លោក គុណ ញឹម បានទេ ដោយទូរស័ព្ទចូលពុំមានអ្នកទទួល។
ចំណែក ប្រធានអង្គភាពរដ្ឋាភិបាលកម្ពុជា លោក ប៉ែន បូណា ប្រាប់ Press Start Cambodia ថា បទបញ្ជារបស់ប្រមុខរដ្ឋាភិបាល គឺធ្វើឡើងក្នុងគោលបំណងស្រាវជ្រាវរកការពិត ព្រមទាំងចាត់វិធានការចំពោះអ្នកដែលប្រព្រឹត្តខុស។
លោកថា៖ «ដើម្បីស្វែងរកការពិត តើពិតជាមានបទល្មើសនាំប្រេងចូលពីថៃដូចសារព័ត៌មានថៃបានផ្សាយមែនឬទេ? បើមានត្រូវចាត់វិធានការច្បាប់យ៉ាងតឹងរឹង ចំពោះបុគ្គលណាដែលប្រព្រឹត្តិល្មើលនបទបញ្ជារបស់រាជរដ្ឋាភិបាល»។
កាលពីថ្ងៃទី២ ខែមេសា ឆ្នាំ២០២៦ សារព័ត៌មានថៃ Thairath បានដកស្រង់សំដីលោកនាយករដ្ឋមន្ត្រីថៃ Anutin Charnvirakul មកចុះផ្សាយថា មានបណ្ដាញលួចនាំចេញប្រេងឥន្ធនៈដោយខុសច្បាប់ចេញពីប្រទេសថៃមកកម្ពុជា។
លោក អានុទីន ត្រូវបានស្រង់សម្តីបន្តថា៖ «យើងបានបង្កើតអង្គភាពមួយរួចហើយ ដើម្បីតាមដាន និងចាត់វិធានការលើអ្នកស្តុកទំនិញ ជាពិសេសអ្នកដែលកំពុងឆក់ឱកាសពីស្ថានការណ៍នេះ ដោយបង្កើនតម្លៃ និងលួចដឹកប្រេងទៅលក់នៅបរទេស»។
ជុំវិញបញ្ហានេះ អគ្គលេខាធិការនៃរាជបណ្ឌិត្យសភាកម្ពុជា លោកបណ្ឌិត យង់ ពៅ បានសាទរវិធានការរបស់លោកនាយករដ្ឋមន្ត្រី ដោយសង្ឃឹមថា វិធានការមួយនេះ នឹងជំរុញឱ្យអនុវត្តពិតប្រាកដ ដើម្បីវែកមុខជនពាក់ព័ន្ធ និងបញ្ចប់សកម្មភាពដែលប៉ះពាល់ដល់ផលប្រយោជន៍ជាតិ។ លោកយល់ថា ករណីនាំប្រេងខុសច្បាប់ពីប្រទេសថៃចូលកម្ពុជា ប្រសិនបើមានពិតប្រាកដ គឺជាអំពើធ្ងន់ធ្ងរ ហើយអាចចាត់ទុកថាជាការក្បត់ជាតិ។
លោកថ្លែងថា ៖ «ខ្ញុំយល់ឃើញថា មិនមែននាំមក១កានឬ២កាន់នោះទេ ច្បាស់ជានាំទាំងតោនៗមកហើយ។ អ៊ីចឹងការដែលអាចនាំមកបានមិនមែនជនសាមញ្ញ អ្នករត់ម៉ូតូឌុប ឬក៏អ្នកអាជីវកម្មសាំងការ៉ាស់សាំងមួយពីរ ឬក៏លក់សាំងដបទេ គឺជាអ្នកដែលមានឥទ្ធិពលក្នុងសង្គមទាំងអ្នករាជការ»។
រីឯ ប្រធានគណបក្សជំនាន់ថ្មី លោក មាជ សុវណ្ណរ៉ា យល់ថា ការចេញបទបញ្ជារបស់ប្រមុខរដ្ឋាភិបាល គឺជារឿងល្អ ប៉ុន្តែចំណុចសំខាន់ គឺការអនុវត្តច្បាប់ឱ្យបានតឹងរឹង។ លោកបន្តថាប្រសិនបើនៅតែមានបក្ខពួកនិយម និងការអត់ឱន នោះអំពើពុករលួយនឹងនៅតែបន្តកើតមាន ដែលធ្វើឱ្យប្រទេសជាតិ និងប្រជាពលរដ្ឋរងគ្រោះ។
លោកមានប្រសាសន៍ថា៖ «សញ្ញាវិជ្ជមាននៃការកំណែទម្រង់អភិបាលកិច្ចល្អ និងរដ្ឋបាលសាធារណៈ ដើម្បីបំបាត់អំពើពុករលួយ ទីមួយ។ មន្ត្រីខ្លួនឯងត្រូវតែគោរពច្បាប់ ហើយធ្វើខ្លួនឱ្យស្អាតស្អំ ស្រឡាញ់ជាតិ ជួយកសាងជាតិ»។
ចំណែក លោក អំ សំអាត នាយកទទួលបន្ទុកទូទៅនៃអង្គការលីកាដូ ក៏សាទរចំពោះការចេញបទបញ្ជាពីសំណាក់នាយករដ្ឋមន្ត្រីដែរ ដោយចាត់ទុកថានេះជាសញ្ញាណល្អក្នុងការលុបបំបាត់អំពើពុករលួយ។
លោកថា៖ «នេះជាសញ្ញាណលុបបំបាត់វប្បធម៌និទណ្ឌភាព និងជាការតម្រង់ទិសក្នុងការបំពេញតួនាទី និងភារកិច្ចរបស់មន្ត្រី ក៏ដូចជាការចូលរួមលុបបំបាត់អំពើពុករលួយ ឆ្ពោះទៅរកអភិបាលកិច្ចល្អ។ ប៉ុន្តែបន្ថែមពីលើការដកក្របខណ្ឌពីមន្រ្តី គឺត្រូវចាត់វិធានការផ្លូវច្បាប់ប្រសិនបើមន្ត្រីទាំងនោះជាប់ពាក់ព័ន្ធនឹងអំពើពុករលួយ និងភាពមិនប្រក្រតីក្នុងការបំពេញតួនាទី និងភារកិច្ចរបស់ខ្លួន ដោយយកតួនាទីរបស់ខ្លួនទៅកេងយកផលប្រយោជន៍ផ្ទាល់ខ្លួន»។
ជាមួយគ្នានេះ លោក អំ សំអាត ក៏បានជំរុញដល់រដ្ឋាភិបាល និងអាជ្ញាធរពាក់ព័ន្ធ បង្ហាញព័ត៌មានពីលទ្ធផលនៃការស៊ើបអង្កេតផងដែរ ព្រមទាំងចំណាត់ការផ្លូវច្បាប់ ឱ្យសាធារណជនដឹងលឺ ដើម្បីតម្លាភាព។
គួរបញ្ជាក់ថា ក្រោយពីមានបញ្ហាជម្លោះព្រំដែនរវាងកម្ពុជា និងថៃ លោកនាយករដ្ឋមន្ត្រី ហ៊ុន ម៉ាណែត កាលពីថ្ងៃទី២២ ខែមិថុនា ឆ្នាំ២០២៥ បានប្រកាសផ្អាកនាំចូលប្រេងឥន្ធនៈ និងឧស្ម័នគ្រប់ប្រភេទពីប្រទេសថៃ ដោយលោកបញ្ជាក់ថា មិនមានការចាំបាច់ ខណៈកម្ពុជាមានប្រភពប្រេងពីប្រទេសផ្សេងៗគ្រប់គ្រាន់ហើយ៕