អង្គការសមាគមជិត៣០បានសម្តែងការព្រួយបារម្ភចំពោះដំណើរការធ្វើសេចក្តីព្រាងវិសោធនកម្ម នៃច្បាប់ស្តីពីសញ្ជាតិ ព្រោះការចែងមិនច្បាស់លាស់ណាមួយនោះ អាចធ្វើឱ្យប៉ះពាល់ធ្ងន់ធ្ងរដល់សេរីភាពនៃការបញ្ចេញមតិរបស់ពលរដ្ឋខ្មែរគ្រប់រូប។
នៅក្នុងលិខិតចំហមួយចុះថ្ងៃទី២៤ ខែសីហា ឆ្នាំ២០២៥ អង្គការសមាគមទាំងនេះបានលើកឡើងថា សេចក្តីព្រាងវិសោធនកម្មនៃច្បាប់ស្តីពីសញ្ជាតិនេះ គឺផ្ទុយពីច្បាប់អន្តរជាតិ អនុសញ្ញាអន្តរជាតិនិងរដ្ឋធម្មនុញ្ញពាក់ព័ន្ធនឹងការគោរពសិទ្ធិមនុស្សជាមូលដ្ឋាន។
អង្គការទាំងនេះបន្តថា ពលរដ្ឋខ្មែរ គឺជាផ្នែកមួយនៃប្រទេសជាតិ ដែលមិនអាចកាត់ផ្តាច់បាន ហើយពួកគេមានគ្រប់និន្នាការនយោបាយ សុទ្ធតែធ្លាប់បានហែលឆ្លងនូវឧបសគ្គនិងការឈឺចាប់រាប់មិនអស់ ហើយពលរដ្ឋមួយចំនួនកំពុងប្រឈមមុខនឹងការជាប់ពន្ធនាគារ ដោយសារការអនុវត្តសិទ្ធិសេរីភាពជាមូលដ្ឋាន ការរិះគន់រាជរដ្ឋាភិបាល ការការពារបរិស្ថាននិងធនធានធម្មជាតិ។
លិខិតនេះសរសេរថា “ហានិភ័យខាងលើនេះ ក៏ត្រូវបានសាធារណជនដឹងឮជាទូទៅថា អាចនឹងកើតមានចំពោះសកម្មជនសិទ្ធិមនុស្ស អ្នកនយោបាយ យុវជន និងអ្នករិះគន់រាជរដ្ឋាភិបាលគ្រប់ពេលវេលា”។
អង្គការសមាគមទាំងនេះបានបញ្ជាក់បន្ថែមថា ពលរដ្ឋខ្មែរគ្រប់រូបទាំងអស់ អាចនឹងត្រូវបាត់បង់អត្តសញ្ញាណរបស់ខ្លួនជា “ខ្មែរ” ប្រសិនបើអ្នកទាំងនោះធ្វើសកម្មភាពណាមួយ ដែលរិះគន់រាជរដ្ឋាភិបាល ហើយប្រសិនបើត្រូវរដ្ឋាភិបាលដកហូតសញ្ជាតិ នោះពលរដ្ឋទាំងនោះ នឹងបាត់បង់សិទ្ធិសេរីភាពជាមូលដ្ឋានក្នុងប្រទេសកំណើត បាត់បង់សិទ្ធិជាម្ចាស់កម្មសិទ្ធិលើដីធ្លី សិទ្ធិទទួលបានសេវាសុខាភិបាល ការអប់រំ ការរៀបអាពាហ៍ពិពាហ៍ស្របច្បាប់ សិទ្ធិធ្វើការងារស្របច្បាប់ និងសិទ្ធិក្នុងការធ្វើនយោបាយ។
ក្រុមអង្គការសមាគមទាំងនេះក៏បានសំណូមពរដល់រដ្ឋសភានិងព្រឹទ្ថសភាឱ្យពិចារណាកុំអនុម័តលើសេចក្តីព្រាងវិសោធនកម្មច្បាប់ស្តីពីសញ្ជាតិនេះ ដើម្បីជៀសវាងការបន្តឱ្យមានភាពឈឺចាប់ក្នុងប្រទេស៕
ដោយអត្ថបទ ស៊ន សោភា