ពលរដ្ឋភៀសសឹកប្រមាណជាង ២ម៉ឺននាក់ ដែលមានរស់នៅក្នុងភូមិសាស្ត្រខេត្តជាប់ព្រំដែនកម្ពុជា-ថៃ នៅមិនទាន់អាចវិលត្រឡប់ទៅកាន់លំនៅឋានវិញបាននៅឡើយ បន្ទាប់ពី ផ្ទះសម្បែងរបស់ពួកគាត់ ត្រូវយោធាថៃចូលកាន់កាប់ និងបំផ្លិចបំផ្លាញដោយខុសច្បាប់ ក្រោយបទឈប់បាញ់ចូលជាធរមាន។
សេចក្តីប្រកាសព័ត៌មានរបស់ក្រសួងមហាផ្ទៃ ចេញផ្សាយនៅថ្ងៃទី០៧ ខែកក្កដា ឆ្នាំ២០២៦ បានលើកឡើងថា គិតមកដល់ព្រឹកថ្ងៃនេះ មានពលរដ្ឋភៀសសឹកចំនួន ២០.៩២៣នាក់ ក្នុងចំណោមជនភៀសសឹកសរុបជាង ៦សែន៤ម៉ឺននាក់ នៅមិនទាន់អាចវិលត្រឡប់ទៅលំនៅឋានវិញនៅឡើយ ដោយសារតែភូមិករ និងផ្ទះសម្បែងរបស់ពួកគេត្រូវយោធាថៃចូលកាន់កាប់ និងបំផ្លិចបំផ្លាញដោយខុសច្បាប់ ក្រោយបទឈប់បាញ់ចូលជាធរមាន។
ក្រសួងបន្តថា ក្នុងខេត្តឧត្តរមានជ័យ មានសាលារៀន៨កន្លែង និងមន្ទីរពេទ្យ/មណ្ឌលសុខភាព៥កន្លែង បន្តបិទទ្វារ ខណៈនៅខេត្តបន្ទាយមានជ័យ មានសាលារៀន៥កន្លែង និងមន្ទីរពេទ្យ/មណ្ឌលសុខភាព១កន្លែង បន្តបិទទ្វារ និងនៅខេត្តព្រះវិហារ មានសាលារៀន៧កន្លែង និងមន្ទីរពេទ្យ/មណ្ឌលសុខភាព២កន្លែងទៀត បន្តបិទទ្វារនៅឡើយ ដោយសារតែអំពើឈ្លានពានពីសំណាក់យោធាថៃ។
ដោយឡែក កាលពីថ្ងៃទី០២ ខែកក្កដា ឆ្នាំ២០២៦ ក្រសួងថា កម្លាំងកម្លាំងប្រដាប់អាវុធថៃ បានរាយបន្លាលួសនៅទីតាំងពីរដាច់ដោយឡែកពីគ្នា នៅតំបន់មុំបី ខេត្តព្រះវិហារ និងតំបន់ជប់រុន ស្រុកត្រពាំងប្រាសាទ ខេត្តឧត្តរមានជ័យ ដែលសកម្មភាពទាំងនេះ បានរំលោភបំពានយ៉ាងច្បាស់លើមាត្រា៥ នៃអនុស្សរណៈនៃការយោគយល់គ្នា (MOU) ឆ្នាំ២០០០ រវាងរាជរដ្ឋាភិបាលកម្ពុជា និងរាជរដ្ឋាភិបាលថៃ ស្តីពីការវាស់វែង និងបោះបង្គោលព្រំដែនគោក ព្រមទាំងសេចក្តីប្រកាសរួមនៃកិច្ចប្រជុំពិសេសលើកទី៣ គណៈកម្មាធិការព្រំដែនទូទៅ(GBC) ចុះថ្ងៃទី២៧ ខែធ្នូ ឆ្នាំ២០២៥ ដែលភាគីទាំងពីរបានឯកភាពគ្នាកាត់បន្ថយភាពតានតឹង និងប្រគល់ភារកិច្ចជូនគណៈកម្មការចម្រុះខណ្ឌសីមាព្រំដែនគោក (JBC) ដើម្បីបន្តការងារវាស់វែង និងបោះបង្គោលព្រំដែនឱ្យបានឆាប់បំផុត ស្របតាមកិច្ចព្រមព្រៀងដែលមានស្រាប់រវាងប្រទេសទាំងពីរ។
ក្រសួងមហាផ្ទៃ ក៏អំពាវនាវដល់ប្រជាពលរដ្ឋទាំងអស់ រួបរួមសាមគ្គី គាំទ្ររាជរដ្ឋាភិបាល ដែលកំពុងដឹកនាំបេសកកម្មដោះស្រាយបញ្ហាព្រំដែនជាមួយភាគីថៃដោយសន្តិវិធី តាមរយៈយន្តការការទូត និងច្បាប់អន្តរជាតិ សំដៅនាំមកវិញ នូវអធិបេយ្យភាព បូរណភាពទឹកដី សន្តិភាព និងស្ថិរភាពតាមខ្សែបន្ទាត់ព្រំដែន ជាពិសេសការវិលមកវិញនូវជីភាពជាប្រក្រតីនៃប្រជាជនទាំងសងខាង។
សូមរំលឹកថា អំឡុងពេលនៃការវាយប្រយុទ្ធគ្នាលើកទី២ នៅតាមខ្សែបន្ទាត់ព្រំដែនរវាងយោធាកម្ពុជានិងយោធាថៃ កាលពីអំឡុងខែធ្នូ ឆ្នាំ២០២៥ ពលរដ្ឋខ្មែររស់នៅខេត្តជាប់ព្រំដែនជាង ៦សែន៤ម៉ឺននាក់ បានភៀសខ្លួនទៅកាន់ជំរំសុវត្ថិភាព។ យ៉ាងណា ក្រោយបទឈប់បាញ់ចូលជាធរមាន ពលរដ្ឋទាំងនោះ បានវិលត្រឡប់ទៅផ្ទះវិញជាបណ្តើរៗ តែចំពោះពលរដ្ឋដែលមានផ្ទះនៅតំបន់ក្រហម នៅតែបន្តស្នាក់នៅក្នុងជំរំដដែល។
ជាមួយគ្នានេះដែរ បើតាមការស្រង់ប្រសាសន៍របស់អភិបាលខេត្តបន្ទាយមានជ័យ លោក អ៊ុំ រាត្រី មកផ្សាយក្នុងទំព័រហ្វេសប៊ុករបស់ប្រធានព្រឹទ្ធសភា លោក ហ៊ុន សែន ឱ្យដឹងថា គិតត្រឹមថ្ងៃទី០៩ ខែមិថុនា ឆ្នាំ២០២៦ រាជរដ្ឋាភិបាលកម្ពុជា បានសាង់សង់ផ្ទះជូនប្រជាពលរដ្ឋភៀសសឹកចំនួន ៣៣១៨គ្រួសារ ស្មើនឹង ១១ ២១៧នាក់ (តួលេខនេះគិតត្រឹមថ្ងៃទី០៩ ខែមិថុនា ឆ្នាំ២០២៦) នៅក្នុងមណ្ឌលសមាគមអតីតយុទ្ធជន នៅឃុំស្លក្រាម ស្រុកស្វាយចេក ខេត្តបន្ទាយមានជ័យ ដែលបច្ចុប្បន្នត្រូវបានរាជរដ្ឋាភិបាលបង្កើតភូមិថ្មី ឈ្មោះ«ភូមិរង់ចាំ»ចំនួន ៦ភូមិ ដែលបំបែកចេញពីភូមិស្លក្រាម៕
អត្ថបទដោយ៖ ស៊ន មេសា