ការប្រឡងសញ្ញបត្រមធ្យមសិក្សាទុតិយភូមិ ដែលចាប់ផ្តើមនៅថ្ងៃចន្ទនេះ បានដំណើរការទៅដោយរលូន និងរបៀបរៀបរយល្អ ដោយមានបេក្ខជនចូលរួមការប្រឡងជាង ១៥០ ០០០នាក់ ក្នុងនោះមានបេក្ខជនជាង ១៣០០នាក់ បានអវត្តមាន ខណៈក្រសួងអប់រំ ក៏បានដកហូតគ្រឿងអេឡិចត្រូនិកហាមឃាត់បានមួយចំនួនពីបេក្ខជន និងគណៈកម្មការផងដែរ។
យោងតាមការសរុបដំណើរការសំណេរនាថ្ងៃទី១ នៃការប្រឡងសញ្ញាបត្រមធ្យមសិក្សាទុតិយភូមិ នៅលើទំព័រហ្វេសប៊ុករបស់ក្រសួងអប់រំ នាល្ងាចថ្ងៃទី១០ ខែសីហានេះ បានឱ្យដឹងថា ក្នុងឆ្នាំសិក្សា២០២៥-២០២៦ បេក្ខជនដែលបានចុះឈ្មោះប្រឡងសរុបមានចំនួន ១៥១ ២៣៨នាក់ និងមានមណ្ឌលប្រឡងចំនួន ២៤៤មណ្ឌលនៅទូទាំងប្រទេស ក្នុងនោះ បេក្ខជនថ្នាក់វិទ្យាសាស្រ្ត មានចំនួន ៣៧ ៤៤៥ នាក់ ស្មើនឹង ២៤,៧៦% និងបេក្ខជនថ្នាក់វិទ្យាសាស្រ្តសង្គមមានចំនួន ១១៣ ៧៩៣នាក់ ស្មើនឹង ៧៥,២៤%។
ក្រសួងបន្តថា នៅថ្ងៃទី១នេះ មានបេក្ខជនអវត្តមានចំនួន ១ ៣១៤នាក់ ស្មើនឹង០,៨៦ភាគរយ ខណៈបេក្ខជនដែលមានបញ្ហាសុខភាពមាន ១២១នាក់ ក្នុងនោះបោះបង់ការប្រឡងចំនួន ១២នាក់ បេក្ខជនប្រឡងដាច់ដោយឡែក ៥៤នាក់ បេក្ខជនមានជំងឺគ្រុនឈាមមានចំនួន ៤១នាក់ និងគ្រោះថ្នាក់ចរាចរណ៍ ៧នាក់។
ក្រសួងអប់រំ បានគូសបញ្ជាក់ថា៖ «ដំណើរការសំណេរនាថ្ងៃទី១នេះ បានប្រព្រឹត្តទៅដោយរលូនល្អ មិនមានបាតុភាពមិនប្រក្រតីណាមួយគួរឲ្យកត់សម្គាល់ឡើយ។ ដំណើរការសំណេរមានសភាពស្ងប់ស្ងាត់ និងរបៀបរៀបរយល្អ[…] បេក្ខជនបានគោរពបទប្បញ្ញត្តិនៃការប្រឡង ព្រមទាំងបានប្រឹងប្រែងក្នុងការធ្វើកិច្ចការតាមសមត្ថភាពរៀងៗខ្លួន»។
ទោះយ៉ាងណា នៅក្នុងដំណើរការសំណេរថ្ងៃទី១ ក្រសួងក៏មានការដកហូតគ្រឿងអេឡិចត្រូនិកហាមឃាត់ចំនួន ៨ករណី ដែលក្នុងនោះមានវ៉ែនតាឆ្លាតវៃភ្ជាប់ទូរសព្ទដៃមួយករណី និងនាឡិកាឆ្លាតវៃ ៣ករណី ពីបេក្ខជន ព្រមទាំងនាឡិកាឆ្លាតវៃ ៤ករណីពីគណៈកម្មការ។
ក្រសួងអប់រំ នឹងចាត់វិធានការណ៍ចំពោះករណីទាំងនេះ តាមគោលការណ៍ជាធរមាន។ ក្រសួងក៏បានក្រើនរំលឹកដល់បេក្ខជនប្រឡងគ្រប់រូប ត្រូវគោរពតាមការណែនាំផ្សេងៗទាក់ទងនឹងការហាមឃាត់មិនឱ្យនាំចូលឧបករណ៍អេឡិកត្រូនិកចូលក្នុងមណ្ឌល និងបន្ទប់ប្រឡង ឱ្យបានខ្ជាប់ខ្ជួន។
រដ្ឋមន្ដ្រីក្រសួងអប់រំ យុវជន និងកីឡា លោក ហង់ ជួនណារ៉ុន បានប្រសាសន៍ក្នុងសន្និសីទសារព័ត៌មាននៅព្រឹកថ្ងៃចន្ទនេះដែរថា បរិយាកាសនៃការប្រឡងមធ្យមសិក្សាទុតិយភូមិ ឬបាក់ឌុបឆ្នាំនេះ មានភាពល្អប្រសើរជាងឆ្នាំមុន ដោយសារឆ្នាំមុនមានការឈ្លានពានពីយោធាថៃ ប៉ះពាល់ដល់ការសិក្សារបស់សិស្សនៅតាមខេត្តជាប់ព្រំដែន ហើយនិងមានការបង្ហោះសារជាច្រើននៅលើបណ្តាញសង្គមដែលបានធ្វើឲ្យប៉ះពាល់ដល់ទឹកចិត្តរបស់បេក្ខជន។
លោកថា៖ «ការប្រឡងឆ្នាំនេះ គឺល្អប្រសើរជាងឆ្នាំមុន ដោយសារឆ្នាំមុន គឺទាំងសិស្សក៏ប៉ះពាល់ដោយសារការឈ្លានពានរបស់យោធាថៃ មកលើបូរណភាពទឹកដី និងអធិបតេយ្យភាពកម្ពុជា»។
លោករដ្ឋមន្ត្រី ក៏បានបញ្ជាក់ដែរថា ឆ្នាំនេះ ក្រសួងក៏បានអញ្ជើញអង្គភាពប្រឆាំងអំពើពុករលួយចូលរួមគ្រប់នីតិវិធី និងសហការជាមួយក្រសួងស្ថាប័នពាក់ព័ន្ធ ចាត់វិធានការតឹងរឹងចំពោះការរំលោភច្បាប់ និងគោលការណ៍ផ្សេងៗនៃការប្រឡង ដើម្បីធានានូវសុក្រឹត្យភាព។
បេក្ខជនប្រឡងសញ្ញាបត្រធម្យមសិក្សាទុតិយភូមិ លោក ផន សុវណ្ណរស្មី មានវ័យ ២០ឆ្នាំ ជាសិស្សវិទ្យាសាស្ដ្រសង្គមមកពីវិទ្យាល័យហ៊ុនសែន ប៊ុនរ៉ានី ច្បារអំពៅ និងមានមណ្ឌលប្រឡងនៅវិទ្យាល័យជាស៊ីម បឹងកេងកង បាននិយាយថា គាត់មិនមានការភិតភ័យនោះទេនៅថ្ងៃទី១នៃការប្រឡងនេះ ដោយសារមានការផ្តល់កម្លាំងចិត្តពីឪពុកម្តាយ និងធ្វើកិច្ចការបានច្រើន។
បើទោះជាកំពុងប្រឡងបាក់ឌុប ប៉ុន្តែយុវជនរូបនេះ បានគិតរួចជាស្រេចហើយពីមុខវិជ្ជាដែលត្រូវរៀន បន្ទាប់ពីការប្រឡងចប់។
យុវជនរូបនេះនិយាយថា៖ «ខ្ញុំចង់រៀនគ្រប់គ្រងផង Businessផង ព្រោះខ្ញុំមានគំនិតចង់ចេះរកស៊ី ស្រុកខ្មែរUpdate អ្វីថ្មីៗ» ។
ស្រដៀងគ្នានេះដែរ យុវតី មុត ស្រីពេជ្រ មកពីវិទ្យាល័យព្រែកថ្មី បាននិយាយថា កញ្ញាបានត្រៀម និងខិតខំរៀនចាប់តាំងពីពាក់កណ្តាលឆ្នាំសិក្សាមក ដោយសង្ឃឹមថា នឹងបានប្រឡងជាប់ ហើយមានគម្រោងបន្តសិក្សាផ្នែកទេសចរណ៍។
យុវតីរូបនេះ និយាយថា៖ «មានអារម្មណ៍ថារំភើប ព្រោះបានបញ្ចប់ទី១២ ហើយបើបានលទ្ធផលល្អ គ្រួសារគាត់នឹងរំភើបហើយសប្បាយចិត្តជាមួយយើង»។
សម្រាប់ឆ្នាំនេះ ហាក់មិនខុសពីឆ្នាំមុនៗនោះទេ នាព្រឹកព្រលឹមស្រាងៗ គេសង្កេតឃើញអាណាព្យាបាលសិស្សរាប់រយនាក់ បានមកឈរត្រៀបត្រានៅតាមរបងនៃមណ្ឌលប្រឡងនានា ដើម្បីរងចាំ និងលើកទឹកចិត្តកូនៗរបស់ពួកគាត់។
អ្នកស្រី ស៊ុន រ៉ាម៉ាលី អាយុ ៤៩ឆ្នាំ រស់នៅខណ្ឌច្បារអំពៅ រាជធានីភ្នំពេញ បានប្រាប់ Press Start Cambodia ថា នេះជាលើកទី១ហើយ ដែលអ្នកស្រីមកលើកទឹកចិត្តកូនៗចំនួន ២នាក់ ដល់កន្លែងប្រឡងបែបនេះ។ អ្នកស្រីរំពឹងថា កូនៗរបស់គាត់នឹងទទួលបានបាននិទ្ទេសល្អ ដោយសារតែកូនៗបានខិតខំរៀនសូត្រតាំងពីដើមឆ្នាំមក។
អ្នកស្រីនិយាយថា៖ «សង្ឃឹមថា កូនៗទាំងពីរធ្វើបានល្អ ហើយក្នុងនាមជាម្ដាយក៏សូមជូនពរឲ្យកូនប្រុសខ្ញុំទាំងពីរនាក់ ឲ្យគាត់ប្រឡងបានល្អ ទោះបីនិទ្ទេសអីក៏ដោយ ឲ្យតែគាត់ប្រឡងបានល្អ ជូនពរគាត់ឲ្យគាត់រៀនបានល្អ»។
អណាព្យាបាលបេក្ខជនប្រឡងបាក់ឌុបមួយរូបទៀត លោក ពេជ្រ សុវណ្ណ អាយុ ៤៦ឆ្នាំ មកពីសង្កាត់ព្រែកថ្មី រាជធានីភ្នំពេញ បានបង្ហាញអារម្មណ៍ភ័យអរនៅអំឡុងពេលឈររងចាំកូន នៅរបងមណ្ឌលប្រឡង វិទ្យាល័យជាស៊ីម បឹងកេងកង ដោយលោកថា នេះលើកទី១ដែលមកនៅលើកទឹកចិត្តកូនបែបនេះ។ លោកបន្តថា នៅពេលប្រឡងចប់ ទោះជាបានលទ្ធផលបែបណា ក៏លោកនៅតែគាំទ្រ និងលើកទឹកចិត្តកូន ហើយក្រោយពីប្រឡងចប់ បើទោះជាកូនចង់រៀនជំនាញអ្វី ក៏លោកតាមចិត្តរបស់កូនដែរ។
លោកនិយាយថា៖ «ស៊ីសងលើគាត់ បើយើងបង្ខំក៏មិនកើត បើគាត់ចង់ទៅលិច យើងឲ្យទៅកើតក៏មិនល្អដែរ គាត់ចង់ទៅណាក៏តាមគាត់ទៅ»។
សូមជម្រាបថា ក្រសួងអប់រំ យុវជន និងកីឡា គ្រោងនឹងប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិឆ្នាំ២០២៦ នៅថ្ងៃទី២ ខែកញ្ញា ឆ្នាំ២០២៦ តាមមណ្ឌលសំណេរនៃរាជធានី-ខេត្តទាំង២៥ នៅទូទាំងប្រទេស៕
អត្ថបទដោយ ធួន ស្រីពៅ និង ផាត់ ស័ក្កស៊ីន