ក្រសួងសុខាភិបាល បានណែនាំក្រើនរំលឹកដល់ប្រជាពលរដ្ឋ ពីការបង្ការជំងឺគ្រុនឈាមក្នុងរដូវវស្សា ខណៈឥទ្ធិពលនៃបាតុភូតកើនកម្ដៅ (EI Niño) អាចធ្វើឲ្យមានការកើនឡើងចំនួនមូសខ្លា និងជំងឺគ្រុនឈាម។
សេចក្តីណែនាំក្រើនរំលឹករបស់ក្រសួងសុខាភិបាល ចុះថ្ងៃទី០៨ ខែកក្កដា ឆ្នាំ២០២៦ បានលើកឡើងថា ក្នុងអំឡុងរដូវវស្សា ជាទូទៅមានការកើនឡើងវត្ថុដក់ទឹកដែលជាកន្លែងបង្កបង្កើតកូនចៅមូសខ្លា ហើយស្របពេលគ្នាដែរ ប្រទេសកម្ពុជា កំពុងទទួលឥទ្ធិពលនៃបាតុភូតកើនកម្ដៅ (EI Niño) ដែលស្ថានភាពនេះ អាចធ្វើឱ្យមានការកើនឡើងចំនួនមូសខ្លា និងជំងឺគ្រុនឈាម ដែលទាមទារឱ្យមានការចូលរួមយ៉ាងសកកម្មពីបុគ្គលម្នាក់ៗ គ្រួសារ និងសហគមន៍។
បើតាមការសិក្សាស្រាវជ្រាវរបស់ក្រសួង សត្វមូសខ្លាចូលចិត្តរស់នៅកន្លែងទឹកដក់ ដូចជា សំបកកង់ឡាន/កង់ម៉ូតូទុកចោលពាសវាលពាសកាល ត្រឡោកដូង កែវ ចានជ័រ/ស្នោរ ក្រឡដែលបោះបង់ចោល ពាង អាង ធុងដាក់ទឹក ទឹកថូផ្កា ចាទ្រជើងតុ និងពែងជាដើម។ សត្វមូសខ្លាចូលរួមសំងំលាក់ខ្លួននៅក្នុងទីកន្លែងងងឹតៗ ឬមិនសូវមានពន្លឺថ្ងៃចូលដល់។
ការណ៍នេះ ក្រសួងសុខាភិបាល ក្រើនរំលឹកដល់ប្រជាពលរដ្ឋ និងអាជ្ញាធរគ្រប់ជាន់ថ្នាក់ទាំងអស់ ចូលរួមចលនាកាត់បន្ថយ តាមដាន និងទប់ស្កាត់ការកកើតសត្វមូស ដោយអនុវត្តនូវវិធានការមួយចំនួន។ វិធានការទាំងនោះ មានដូចជា សម្អាតបរិវេណជុំវិញផ្ទះ ការដ្ឋានសំណង់ និងតាមបណ្តាទីផ្សារដោយលុបបំបាត់វត្ថុដក់ទឹក, ស្លៀកពាក់ខោជើងវែងអាវដៃវែង, ប្រើថ្នាំការពារមូស ដែលថ្នាំនេះស្ត្រីមានផ្ទៃពោះអាចប្រើបានដោយមានសុវត្ថិភាព និងសម្រាន្តក្នុងមុងទាំងថ្ងៃ និងយប់ ដើម្បីការពារការខាំពីមូសជាដើម។
ក្រសួងបន្តថា ប្រសិនបើប្រជាពលរដ្ឋដែលមានរោគសញ្ញាគ្រុនក្តៅខ្លួនខ្លាំងភ្លាមៗ ចាប់ពី ៣៩ ទៅ ៤០ អង្សាសេ ត្រូវប្រញាប់ទៅពិនិត្យនិងព្យាបាលជាបន្ទាន់នៅមណ្ឌលសុខភាព ក្នុងរយៈពេល ៤៨ ម៉ោងយ៉ាងតិច។
ជាមួយគ្នានេះ ក្រសួងសុខាភិបាល ក៏បានណែនាំដល់មន្ទីរសុខាភិបាលរាជធានី-ខេត្ត ត្រូវសហការជាមួយអាជ្ញាធរពាក់ព័ន្ធ ចុះត្រួតពិនិត្យការដ្ឋានសំណង់ ជំរុញការអនុវត្តការងារកាត់បន្ថយ និងទប់ស្កាត់ការកកើតមូសក្នុងមូលដ្ឋានរបស់ខ្លួនឱ្យមានប្រសិទ្ធភាព ដើម្បីចូលរួមកាត់បន្ថយអត្រាឈឺ និងស្លាប់ដោយសារជំងឺគ្រុនឈាម។ កាលពីពេលថ្មីៗនេះ ក្រសួងបានរកឃើញករណីឆ្លងជំងឺគ្រុនឈាមជិត ៦០០ នាក់ នៅស្រុកកោះធំ ខេត្តកណ្តាល គិតចាប់ពីថ្ងៃទី១៦ ខែមិថុនា ដល់ថ្ងៃទី០៤ ខែកក្កដា ឆ្នាំ២០២៦ ក្នុងនោះមានអ្នកជំងឺធ្ងន់ ៦នាក់ ត្រូវបានបញ្ជូនទៅមន្ទីរពេទ្យគន្ធបុប្ផា និងគ្មានករណីស្លាប់នោះទេ៕
អត្ថបទដោយ៖ ដោក សុវណ្ណវឌ្ឍនា