ក្រសួងបរិស្ថាន គ្រោងចែកកូនឈើប្រណិត ឈើហូបផ្លែ និងកូនត្នោតចំនួន ៥លានដើម ដល់ប្រជាពលរដ្ឋយកទៅដាំ ដោយឥតគិតថ្លៃ ក្នុងយុទ្ធនាការ «ពន្លកបៃតង» ចាប់ពីថ្ងៃទី១០ ស្អែកនេះ ដល់ថ្ងៃទី១៣ ខែកក្កដា ឆ្នាំ២០២៦នេះ នៅមុខទីស្តីការក្រសួងបរិស្ថាន រាជធានីភ្នំពេញ ខណៈការចែកកូនឈើនេះ ក៏ធ្វើឡើងដើម្បីពង្រីកគម្របបៃតង ឆ្លើយតបទៅនឹងការប្រែប្រួលអាកាសធាតុជាសកល និងជាខែលការពារបរិស្ថានប្រកបដោយចីរភាពសម្រាប់មនុស្សជំនាន់ក្រោយ។
នៅក្នុងការផ្សព្វផ្សាយលើទំព័រហ្វេសប៊ុករបស់ក្រសួងបរិស្ថាន នៅថ្ងៃទី០៨ខែកក្កដា បានឱ្យដឹងថា ក្នុងឆ្នាំ២០២៦នេះ ក្រសួងបានបណ្តុះកូនឈើបានជាង ៥លាន៣សែនដើម នៅតាមថ្នាលបណ្តុះកូនឈើរបស់មន្ទីរបរិស្ថានរាជធានី-ខេត្ត ទូទាំងប្រទេស និងថ្នាលបណ្តុះកូនឈើថ្នាក់តំបន់ទាំង៥ រួមមាន នៅខេត្តត្បូងឃ្មុំ សៀមរាប កំពង់ស្ពឺ មណ្ឌលគិរី និងកោះកុង។
ប្រភពដដែលបន្តថា កូនឈើទាំងនោះ ដែលរួមមាន កូនឈើប្រណិត ឈើហូបផ្លែ និងកូនត្នោត ត្រូវបានដឹកជញ្ជូនមកពីតាមបណ្តាខេត្ត និងថ្នាលបណ្តុះកូនឈើថ្នាក់តំបន់ទាំង៥ មកកាន់ រាជធានីភ្នំពេញ ដើម្បីត្រៀមរៀបចំក្នុងពិព័រណ៍ និងចែកជូនប្រជាពលរដ្ឋដោយឥតគិតថ្លៃ ក្នុងយុទ្ធនាការ «ពន្លកបៃតង» ឆ្នាំ២០២៦ នៅមុខទីស្តីការក្រសួងបរិស្ថាន ចាប់ពីថ្ងៃទី១០ ស្អែកនេះ ដល់ថ្ងៃទី១៣ ខែកក្កដា ឆ្នាំ២០២៦។
បើតាមផែនការដែលបានគ្រោងទុក ក្រសួងបរិស្ថានថា នឹងចែកកូនឈើចំនួន ៥លានដើម ជូនប្រជាពលរដ្ឋយកទៅដាំតាមគេហដ្ឋាន សាលារៀន វត្តអារាម និងទីសាធារណៈក្នុងប្រទេសកម្ពុជា ដើម្បីពង្រីកគម្របបៃតង ឆ្លើយតបទៅនឹងការប្រែប្រួលអាកាសធាតុជាសកល បង្កើតទ្រព្យសម្បត្តិធម្មជាតិ និងខែលការពារបរិស្ថានដ៏មានតម្លៃបំផុតសម្រាប់ម្លប់នៃការរស់នៅប្រកបដោយចីរភាពរបស់កូនចៅជំនាន់ក្រោយ។
កាលពីឆ្នាំ២០២៥ ក្នុងយុទ្ធនាការ«ពន្លកបៃតង» ក្រសួងបរិស្ថានបានចែកកូនឈើប្រភេទឈើប្រណិត ឈើហូបផ្លែ ឈើលម្អ និងកូនត្នោតចំនួន ៣លាន៤សែនដើម ជូនដល់ប្រជាពលរដ្ឋយកទៅដាំ ដោយឥតគិតថ្លៃ ដែលចំនួននេះតិចជាងការចែកក្នុងយុទ្ធនាការនៅឆ្នាំ២០២៦នេះជាង ១លានដើម៕
អត្ថបទដោយ៖ ជា ចិន