អាជ្ញាធរមីន ណែនាំដល់អាជ្ញាធរពង្រឹងវិធានការបង្ការ និងទប់ស្កាត់គ្រោះថ្នាក់ដោយសារយុទ្ធភណ្ឌគ្រឿងផ្ទុះ អំឡុងពេល និងក្រោយពេលគ្រោះទឹកជំនន់ ព្រមទាំងអំពាវនាវឱ្យប្រជាពលរដ្ឋបង្កើនការប្រុងប្រយ័ត្ន ចំពោះគ្រាប់យុទ្ធភណ្ឌគ្រឿងផ្ទុះដែលអាចហូរមកជាមួយទឹកជំនន់ ខណៈកម្ពុជាកំពុងទទួលរងនូវឥទ្ធិពលព្យុះចំនួន២ ដែលអាចធ្វើឱ្យរាជធានី-ខេត្តមួយចំនួនអាចមានជំនន់ទឹកភ្លៀង។
សេចក្តីណែនាំរបស់អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន ហៅកាត់ថា អាជ្ញាធរមីន ចេញផ្សាយនៅថ្ងៃទី១៦ ខែកក្កដា ឆ្នាំ២០២៦ បានលើកឡើងថា ស្របពេលដែលកម្ពុជាកំពុងទទួលរងនូវឥទ្ធិពលព្យុះទី៩ ឈ្មោះបាវី (Bavi) និងព្យុះទី១១ ឈ្មោះហៃសិន (Haishen) ដែលអាចធ្វើឱ្យរាជធានី-ខេត្តមួយចំនួនរងឥទ្ធិពលទឹកភ្លៀងដែលអាចបង្កជាទឹកជំនន់។
ប្រភពដដែល បន្តថា ក្នុងអំឡុងពេល និងក្រោយពេលទឹកជំនន់ យុទ្ធភណ្ឌគ្រឿងផ្ទុះមួយចំនួន ត្រូវបានប្រទះឃើញ ដោយសារ ការហូរច្រោះដីរសាត់មកពីតំបន់ដែលមានមីនប្រឆាំងមនុស្ស មីនប្រឆាំងយានយន្ត គ្រាប់បែកចង្កោម និងសំណល់ជាតិផ្ទុះពីសង្គ្រាមជាច្រើនប្រភេទ ដែលអាចបង្កគ្រោះថ្នាក់ដល់អាយុជីវិត ជាពិសេសប្រជាពលរដ្ឋកំពុងរស់នៅតំបន់ដែលរងផលប៉ះពាល់ ដោយសារយុទ្ធភណ្ឌគ្រឿងផ្ទុះទាំងនោះ។
ដើម្បីបង្ការ និងទប់ស្កាត់បាននូវគ្រោះថ្នាក់ អាជ្ញាធរមីន បានណែនាំដល់អាជ្ញាធរពាក់ព័ន្ធក្នុងមូលដ្ឋាន ត្រូវផ្សព្វផ្សាយដល់ប្រជាពលរដ្ឋ ឱ្យបង្កើនការយល់ដឹងអំពីគ្រោះថ្នាក់ដែលអាចបង្កឡើង ដោយយុទ្ធភណ្ឌគ្រឿងផ្ទុះក្នុងពេល និងក្រោយពេលទឹកជំនន់ និងជាពិសេសក្រើនរំលឹកឲ្យមានការឆ្លើយតបទាន់ពេលវេលា ក្នុងការប្រមូលយុទ្ធភណ្ឌគ្រឿងផ្ទុះទៅកម្ទេចចោល និងការដាក់ស្លាកសញ្ញាសម្គាល់នៅតាមតំបន់សង្ស័យ ដែលប្រជាពលរដ្ឋបានរាយការណ៍។
ក្រៅពីនោះ អាជ្ញាធរមីន ក៏បានអំពាវនាវដល់ប្រជាពលរដ្ឋ ឱ្យមានការប្រុងប្រយ័ត្នខ្ពស់ចំពោះយុទ្ធភណ្ឌគ្រឿងផ្ទុះ និងត្រូវរាយការណ៍ជាបន្ទាន់ទៅអាជ្ញាធរមូលដ្ឋាន នៅពេលប្រទះឃើញយុទ្ធភណ្ឌគ្រឿងផ្ទុះ។
បើតាមមជ្ឈមណ្ឌលកម្ចាត់មីនកម្ពុជា (CMAC) ក្នុងរយៈពេល ៦ខែដើមឆ្នាំ២០២៦នេះ អង្គភាពបាន បោសសម្អាតរំដោះផ្ទៃដីតំបន់គ្រាប់មីន/គ្រាប់បានចំនួន ៧៥.១៣២ហិកតា ស្មើនឹង ៨២ភាគរយ នៃផែនការប្រចាំឆ្នាំ និងរុករកឃើញនិងបំផ្លាញចោលគ្រាប់យុទ្ធភណ្ឌមិនទាន់ផ្ទុះគ្រប់ប្រភេទបានចំនួន២០.៨៦១ គ្រាប់។
ដោយឡែក សម្រាប់ការងារស្រាវជ្រាវព័ត៌មាន និងបោសសម្អាតសំណល់យុទ្ធភណ្ឌសង្គ្រាមសៀមឈ្លានពានក្នុងឆ្នាំ២០២៥ កន្លងទៅ អង្គភាពCMAC បានផ្តោតការយកចិត្តទុកដាក់ខ្ពស់ ក្នុងការចុះប្រតិបត្តិការយ៉ាងសកម្មនៅតាមបណ្តាខេត្តជាប់ព្រំដែនដែលរងផលប៉ះពាល់ទាំង៦ រួមមាន ខេត្តព្រះវិហារ ឧត្តរមានជ័យ បន្ទាយមានជ័យ បាត់ដំបង ពោធិ៍សាត់ និងកោះកុង។
ជាលទ្ធផល បានធ្វើការស្រាវជ្រាវព័ត៌មានចំនួន ៣៣៥ភូមិ ក្នុងចំណោម ៣៤៩ភូមិ ដែលមានផ្ទៃដីរងផលប៉ះពាល់សរុបជិត ៣៨៧.២០៦ហិកតា និងបានរុករកឃេីញ និងកម្ទេចចោលគ្រាប់យុទ្ធភណ្ឌគ្រប់ប្រភេទបានចំនួនជាង ៨.៤០០ គ្រាប់ ក្នុងនោះមានគ្រាប់បែកចង្កោមចំនួន ៤.៤៣៦គ្រាប់៕
អត្ថបទដោយ៖ ដោក សុវណ្ណវឌ្ឍនា