មេធាវីការពារក្តីឱ្យ លោក កើត សារ៉ាយ ប្រធានសមាគមសម្ពន្ធនិសិ្សតបញ្ញវន្តខ្មែរ (KSILA) បានស្នើ តុលាការកំពូល បដិសេធសេចក្តីសម្រេចរបស់សាលាឧទ្ធរណ៍ ដែលផ្តន្ទាទោសកូនក្តីឱ្យជាប់ពន្ធនាគារ ៤ឆ្នាំ ពាក់ព័ន្ធនឹងបទ ញុះញង់ និងបទ មិនរាងចាល ខណៈតុលាការជាន់ខ្ពស់មួយនេះ បានបើកសវនាការលើបណ្តឹងសារទុក្ខរបស់សកម្មជនការពារសិទ្ធិមនុស្សរូបនេះ។
លោក កើត សារ៉ាយ ត្រូវបានមន្ត្រីនគរបាលរាជធានីភ្នំពេញ ចាប់ខ្លួនកាលពីថ្ងៃទី០៥ ខែមេសា ឆ្នាំ២០២៤ តាមដីកាបញ្ជាឱ្យចូលខ្លួនរបស់លោក សេង ហៀង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ដែលក្នុងដីកានោះ បានត្រឹមបញ្ជាក់ថា ពាក់ព័ន្ធករណីញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម។ ការចាប់ខ្លួននេះ បន្ទាប់ពីលោកបានបញ្ចេញមតិទាក់ទងនឹងបញ្ហាជម្លោះដីធ្លីមួយក្នុងខេត្តព្រះវិហារ ។
សកម្មជនការពារសិទ្ធិមនុស្ស លោក សារ៉ាយ ត្រូវបានសាលាដំបូងរាជធានីភ្នំពេញ កាត់ទោសកាលពីខែវិច្ឆិកា ឆ្នាំ២០២៤ ឱ្យជាប់ពន្ធនាគាររយៈពេល ៤ឆ្នាំ និងពិន័យជាប្រាក់ ២លានរៀល បទចោទ «ញុះញង់» និង «ការមិនរាងចាលក្នុងបទមជ្ឈិមបន្ទាប់ពីការផ្ដន្ទាទោសបទមជ្ឈិម»។
លោក អែម ចន្ថា មេធាវីការពារក្តីឱ្យលោក កើត សារ៉ាយ មានប្រសាសន៍នៅមុខតុលាការកំពូលថា ក្នុងសវនាការ លោកបានស្នើដល់តុលាការកំពូល បដិសេធចោលនូវសាលដីការបស់សាលាឧទ្ធរណ៍ភ្នំពេញ ហើយឱ្យកូនក្តីរួចផុតពីបទចោទ និងដោះលែងឱ្យមានសេរីភាពចាប់ពីពេលនេះតទៅ។
ការស្នើបែបនេះ ដោយលោកលើកហេតុផលថា ក្នុងសំណុំរឿងនេះ មានការភាន់ច្រលំទៅលើអង្គហេតុ ព្រោះសកម្មភាពចុះជួបប្រជាពលរដ្ឋដែលមានបញ្ហា និងអ្វីដែលកូនក្តីរបស់លោក បានបញ្ចេញមតិបង្ហោះនៅលើបណ្តាញសង្គម ជាបេសកកម្មការងារក្នុងនាមជាអង្គការសង្គមស៊ីវិល។
លោកថា៖ «មាត្រាដែលយើងប្តឹងសារទុក្ខមកនេះ គឺមាត្រា ៤១៩ យើងឃើញថា វាមានការភាន់ច្រលំទៅលើអង្គហេតុ ហើយចឹងហើយ គឺយើងត្រូវលើកអំពីមាត្រាគាំទ្រមួយចំនួន[…] ដូចមាត្រា៣ មាត្រា៤ នៃក្រមព្រហ្មទណ្ឌ ហើយនិងមាត្រា៣៨ នៃរដ្ឋធម្មនុញ្ញ សិទ្ធសេរីភាពនិងកក្តិសញ្ញាអន្តជាតិ ការបញ្ចេញមតិ។ ហើយអ្វីដែលកូនក្តីធ្វើ គឺក្នុងនាមជាការផ្សាយអំពីសកម្មភាពរបស់គាត់ ក្នុងនាមជាអង្គការដែលទៅជួបប្រជាពលរដ្ឋដែលមានបញ្ហាតែប៉ុណ្ណោះ»។
ចំណែក លោក អំ សំអាត នាយកទទួលបន្ទុកចាត់ការទូទៅនៃអង្គការសិទ្ធិមនុស្ស លីកាដូ ដែលបានចូលរួមសវនាការ បានប្រាប់អ្នកសារព័ត៌មាននៅខាងក្រៅតុលាការថា សមាគមរបស់លោក កើត សារ៉ាយ បានចុះបញ្ជីត្រឹមត្រូវនៅក្រសួងមហាផ្ទៃ ហើយអ្វីដែលលោកធ្វើ គឺទៅតាមក្នុងលក្ខនិ្តកៈ និងបេសកកម្មរបស់សមាគម ដែលមិនមែនជាសកម្មភាពខុសច្បាប់។
លោកថា៖ «យើងឃើញហើយថា លោក កើត សារ៉ាយ ជាប្រធានសមាគមសម្ព័ន្ធនិស្សិតបញ្ញវន្តខ្មែរ ដែលមានការចុះបញ្ជីត្រឹមត្រូវនៅក្រសួងមហាផ្ទៃ ហើយនៅក្នុងលក្ខន្តិកៈ និងបេសកម្មរបស់លោក ក៏មានការការពារសិទ្ធមនុស្ស ចឹងការចុះទៅយកព័ត៌មានករណីដីធ្លី ដែលប្រជាពលរដ្ឋរងគ្រោះ ដោយសាររឿងដីធ្លី វាជាបេសកកម្មរបស់សមាគម ហើយក៏វាមិនមែនជារឿងហេតុដែលខុសច្បាប់ ព្រោះអង្គការសមាគមផ្សេងៗដែលគេមានគោលការណ៍ ដែលគេបេសកម្ម ហើយនិងលក្ខន្តិកៈដូចគ្នា គេធ្វើដូចគ្នា»។
ករណីនេះ លោក អំ សំអាត យល់ថា សកម្មភាព និងការងាររបស់លោក កើត សារ៉ាយ មិនមែនជាបទល្មើសនៃការញុះញង់ឱ្យមានភាពវឹកវរ ឬបទមិនរាងចាល ដែលតុលាការកំពូល គួរពិចារណាក្នុងការដោះលែងសកម្មជនការពារសិទ្ធិមនុស្សរូបនេះ ឱ្យមានសេរីភាពឡើងវិញ។
យ៉ាងណា ក្នុងសវនាការនាព្រឹកមិញនេះ ប្រធានក្រុមប្រឹក្សាជំនុំជម្រះនៃតុលាការកំពូល លោក សេង នាង មានប្រសាសន៍ថា កាលបរិច្ឆេទប្រកាសសាលក្រម នឹងជូនដំណឹងនៅថ្ងៃទី០៣ ខែកក្កដា ឆ្នាំ២០២៦ ខាងមុខ។
កាលពីឆ្នាំ២០២១ លោក កើត សារ៉ាយ ធ្លាប់ត្រូវបានសាលាដំបូងរាជធានីភ្នំពេញ កាត់ទោសឱ្យជាប់ពន្ធនាគារ ២០ខែម្ដងរួចមកហើយ ពីបទ «ញុះញង់» ចំពោះការចូលរួមក្នុងបាតុកម្មដោយសន្តិវិធីរបស់លោក ទាមទារឱ្យដោះលែង លោក រ៉ុង ឈុន អតីតមេដឹកនាំសហជីព។ បើតាមអត្ថបទខ្លីរបស់អង្គការលីកាដូ នាពេលកន្លងមក ការចោទប្រកាន់លោក កើត សារ៉ាយ ជាថ្មីនៅឆ្នាំ២០២៤ លើបទចោទ «ញុះញង់» និង «ការមិនរាងចាលក្នុងបទមជ្ឈិមបន្ទាប់ពីការផ្ដន្ទាទោសបទមជ្ឈិម» បានធ្វើឱ្យលោកត្រូវជាប់ទោសទ្វេដង តាមមាត្រា៨៨ នៃក្រមព្រហ្មទណ្ឌ។