ប្រមុខរដ្ឋស្ដីទីចេញព្រះរាជក្រឹត្យត្រាស់បង្គាប់បញ្ចប់គោរមងារឧកញ៉ា អ៊ឹម សុផាន់ណារិទ្ធ ក្រោយសមត្ថកិច្ចរកឃើញសាច់ក្លាសេនាំចូលពីប្រទេសថៃនៅឃ្លាំងស្ដុកទំនិញរបស់ក្រុមហ៊ុន អ៊ឹម សុផាន់ណារិទ្ធ អ៊ឹមផត អ៊ិចផត របស់ឧញ៉ារូបនេះ។
ព្រះរាជក្រឹត្យដែលចុះថ្ងៃទី១០ ខែតុលា ឆ្នាំ២០២៥ នេះ មិនបានបញ្ជាក់អំពីមូលហេតុនៃការបញ្ចប់គោរមងារនេះឡើយ ខណៈការបញ្ចប់គោរមងារនេះបានធ្វើឡើងតាមសំណើររបស់លោកនាយករដ្ឋមន្ត្រី ហ៊ុន ម៉ាណែត រយៈពេលត្រឹម៥ថ្ងៃ បន្ទាប់ពីសមត្ថកិច្ចចម្រុះចុះត្រួតពិនិត្យ និងឆែកឆេរទីតាំងឃ្លាំងស្ដុកទំនិញរបស់ក្រុមហ៊ុន អ៊ឹម សុផាន់ណារិទ្ធ អ៊ឹមផត អ៊ិចផត របស់លោកស្រី អ៊ឹម សុផាន់ណារិទ្ធ ហៅ “ចែទូច” ស្ថិតនៅសង្កាត់ច្រាំងចំរេះ១ ខណ្ឌឬស្សីកែវ រាជធានីភ្នំពេញ កាលពីព្រឹកថ្ងៃទី៥ ខែតុលា ឆ្នាំ២០២៥។
ក្នុងប្រតិបត្តិការឆែកឆេរនេះដែរ មន្ត្រីជំនាញរកឃើញសាច់ក្លាសេសរុបចំនួន៣មុខ សាច់មាន់ សាច់ទា សាច់ជ្រូកសរុបចំនួនជាង២៤៤តោន។ ក្នុងនោះ មន្ត្រីជំនាញក៏បានរកឃើញសាច់ក្លាសេដូចជា ជង្គង់មាន់ ស្លាបមាន់ ជើងមាន់ ក្បាលទា និងគ្រឿងក្នុងជ្រូក រាប់សិបតោន ដែលភាគច្រើន គឺនាំចូលពីប្រទេសថៃ។
លោក ហ៊ុន សែន ប្រមុខរដ្ឋស្ដីទី និងជាប្រធានព្រឹទ្ធសភាកម្ពុជា កាលពីល្ងាចថ្ងៃទី៨ ខែតុលា ឆ្នាំ២០២៥ បានបង្ហោះសំណេរមួយនៅលើគេហទំព័រ Facebook Page របស់លោកស្នើឱ្យរាជរដ្ឋាភិបាល និងអាជ្ញាធរគ្រប់លំដាប់ថ្នាក់កំចាត់ចោលមន្ត្រី និងឈ្មួញដែលនៅបន្តលួចនាំទំនិញថៃចូលក្នុងពេលព្រំដែនបន្តបិទនៅឡើយ។ លោកមានប្រសាសន៍ថា៖ “ប្រសិនបើខ្ញុំនៅធ្វើនាយករដ្ឋមន្ត្រីដូចពេលមុនខ្ញុំមិនបាច់និយាយភាសានេះទេ គឺចេញបញ្ជាចាប់ខ្លួន ឬដកចេញពីមន្ត្រីតែម្តង ប៉ុន្តែសូមកុំគិតថា “ឆ្មាមិននៅកណ្តុរឡើងរាជ្យឱ្យសោះ”។
គួរបញ្ជាក់ថា លោកស្រី អ៊ឹម សុផាន់ណារិទ្ធ ទទួលបានគោរមងារ ឧកញ៉ា កាលពីថ្ងៃទី១៩ ខែសីហា ឆ្នាំ២០២២៕