ក្រសួងមហាផ្ទៃ ដែលជាសេនាធិការរបស់រាជរដ្ឋាភិបាល បានសម្រេចបង្កើតភូមិថ្មីចំនួន៦ ដែលផ្តើមដោយឈ្មោះ ភូមិរង់ចាំ១ ដល់ភូមិរង់ចាំ៦ ដោយបំបែកចេញពីភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ ក្រោយមានការស្នើពីប្រមុខរដ្ឋស្តីទី លោក ហ៊ុន សែន។
យោងតាមប្រកាសស្តីពី ការបង្កើតភូមិនៃខេត្តបន្ទាយមានជ័យ ចុះថ្ងៃទី០១ ខែកក្កដា ឆ្នាំ២០២៦ បានសម្រេចបង្កើត ភូមិរង់ចាំ១ ភូមិរង់ចាំ២ ភូមិរង់ចាំ៣ ភូមិរង់ចាំ៤ ភូមិរង់ចាំ៥ និងភូមិរង់ចាំ៦ ដោយបំបែកចេញពីភូមិស្លក្រាម នៃឃុំស្លក្រាម ស្រុកស្វាយចេក ខេត្តបន្ទាយមានជ័យ។
ប្រកាសរបស់ក្រសួងដដែល បន្តថា ការរៀបចំរចនាសម្ព័ន្ធគ្រប់គ្រងភូមិថ្មីទាំងនេះ នឹងអនុលោមទៅតាមសេចក្តីណែនាំរបស់ក្រសួងមហាផ្ទៃ ស្តីពី បែបបទនីតិវិធីនៃការជ្រើសមេភូមិ ការចូលកាន់តំណែង ការផ្លាស់ប្តូរមេភូមិ ការតែងតាំងជំនួយការមេភូមិ និងតួនាទីភារកិច្ច របៀបរបបការងាររបស់ភូមិ។
ការសម្រេចបង្កើតភូមិរង់ចាំទាំង៦ភូមិនេះ ធ្វើឡើងបន្ទាប់ពីប្រមុខរដ្ឋស្តីទី និងជាប្រធានព្រឹទ្ធសភា លោក ហ៊ុន សែន បានចុះទៅពិនិត្យស្ថានភាពជនភៀសសឹក នៅតាមបណ្តោយព្រំដែន ដែលក្នុងនោះលោកបានស្នើឱ្យដាក់ឈ្មោះតំបន់ដែលពលរដ្ឋភៀសសឹក កំពុងស្នាក់នៅ នៅភូមិស្លក្រាម ខេត្តបន្ទាយមានជ័យ ថាជា «ភូមិរង់ចាំ»។
អំឡុងពេលជួបសំណេះសំណាលជាមួយប្រជាពលរដ្ឋភៀសសឹក នៅភូមិស្លក្រាម ស្រុកស្វាយចេក ខេត្តបន្ទាយមានជ័យ កាលពីថ្ងៃទី០៩ ខែមិថុនា ឆ្នាំ២០២៦ លោក ហ៊ុន សែន បានថ្លែងថា៖ «យើងមិនមែនធ្វើភូមិនេះហើយ បោះបង់ចោលការទាមទារដីរបស់យើងនោះទេ ភូមិនេះខ្ញុំសូមស្នើដាក់ថា ភូមិរង់ចាំ […] បើទោះបីជាផ្ទះរបស់បងប្អូនបានផ្ទះត្រឡប់មកវិញក៏ដោយ ផ្ទះនេះច្បាស់ណាស់ គឺទៅជារបស់បងប្អូនអស់មួយជីវិតទៅហើយ»។
បើតាមការស្រង់សម្តីរបស់អភិបាលខេត្តបន្ទាយមានជ័យ លោក អ៊ុំ រាត្រី មកផ្សព្វផ្សាយក្នុងទំព័រហ្វេសប៊ុកផ្លូវការរបស់ប្រធានព្រឹទ្ធសភា លោក ហ៊ុន សែន ឱ្យដឹងថា ក្រុមការងារចំពោះកិច្ច បានរៀបចំដីដើម្បីសាងសង់ផ្ទះជូនប្រជាពលរដ្ឋភៀសសឹក ក្នុងមណ្ឌលសមាគមអតីតយុទ្ធជនភូមិឃុំស្លក្រាម ស្រុកស្វាយចេក ដែលគិតមកដល់ថ្ងៃទី០៩ ខែមិថុនា មានប្រជាពលរដ្ឋកំពុងស្នាក់នៅទីនោះ ចំនួន ៣៣១៨គ្រួសារ ស្មើនឹងចំនួន ១១ ២១៧នាក់ ដោយក្នុងមួយគ្រួសារទទួលបានដីទំហំ ២០ម៉ែត្រគុណ៣០ម៉ែត្រ និងផ្ទះទំហំ ៥ម៉ែត្រគុណ៧ម៉ែត្រ ព្រមទាំងមានដីសម្រាប់បង្កបង្កើនផលផងដែរ។
ការផ្តល់ដី និងផ្ទះសម្រាប់ប្រជាពលរដ្ឋភៀសសឹកទាំងនេះ ដោយសារតែពួកគេមិនទាន់អាចត្រឡប់ទៅផ្ទះវិញបាន ដោយសារតែមានការឈ្លានពានពីសំណាក់យោធាថៃ មកលើដែនអធិបតេយ្យកម្ពុជា នៅតាមបណ្តោយព្រំដែនកម្ពុជា-ថៃ ដូចជា នៅភូមិព្រៃចាន់ ភូមិជោគជ័យ និងតំបន់បឹងត្រកួន ក្នុងខេត្តបន្ទាយមានជ័យ ចាប់តាំងពីថ្ងៃទី២៧ ខែធ្នូ ឆ្នាំ២០២៥មក៕
អត្ថបទដោយ៖ សុខ សារ៉េត