យោធិនកម្ពុជា៤នាក់បានរងរបួស ដោយសារអំបែងគ្រាប់បែក ខណៈពេលកំពុងដើរល្បាត បន្ទាប់ពីជួបជាមួយនឹងក្រុមល្បាតរបស់យោធាថៃដែលកំពុងដើរល្បាតនៅម្ខាង ក្នុងភូមិសាស្ត្រស្រុកបន្ទាយអំពិល ខេត្តឧត្តរមានជ័យ។
កាលពីថ្ងៃអាទិត្យ ទី៥ ខែកក្កដា វេលាម៉ោង ១២:៣៥នាទី កងកម្លាំងយោធិនកម្ពុជាបានដើរល្បាតនៅតំបន់ចំការស្វាយចន្ទី ភូមិសាស្ត្រចូកគ្រួស ក្នុងភូមិថ្មដូន ឃុំគោកមន ស្រុកបន្ទាយអំពិល ខេត្តឧត្តរមានជ័យ ហើយក៏បានជួបជាមួយនឹងក្រុមល្បាតរបស់យោធាថៃ ដែលកំពុងដើរល្បាតនៅម្ខាងទៀតនៃបន្លាលួស។ នេះបើតាមសេចក្តីប្រកាសព័ត៌មានរបស់ក្រសួងការពារជាតិ ចេញផ្សាយកាលពីថ្ងៃទី៦ ខែកក្កដា ឆ្នាំ២០២៦។
សេចក្តីប្រកាសព័ត៍មាននេះលើកឡើងថា ក្រោយពីកងកម្លាំងយោធិនកម្ពុជាបានធ្វើដំណើរផុតបន្តិច ស្រាប់តែមានផ្ទុះគ្រាប់បែកមួយគ្រាប់នៅពីក្រោយកងល្បាតរបស់កម្ពុជា បណ្តាលឲ្យយោធិនកម្ពុជារងរបួសបួននាក់ ដោយសារអម្បែងគ្រាប់។ គណៈបញ្ជាការនៅជួរមុខនិងក្រុមអ្នកជំនាញកំពុងបន្តធ្វើការស៊ើបអង្កេតយ៉ាងយកចិត្តទុកដាក់បំផុត ដើម្បីស្វែងរកការពិត។
ជាមួយគ្នានេះដែរ ក្រសួងការពារជាតិ នៃព្រះរាជាណាចក្រកម្ពុជាបញ្ជាក់ជាថ្មីនូវការប្តេជ្ញារបស់ខ្លួនក្នុងការគោរព និងអនុវត្តយ៉ាងម៉ឺងម៉ាត់ ស្មោះត្រង់ ប្រកបដោយការទទួលខុសត្រូវខ្ពស់ក្នុងការគោរព និងអនុវត្តពេញលេញនូវសេចក្តីប្រកាសរួម នៃគណៈកម្មាធិការព្រំដែនទូទៅកម្ពុជា-ថៃ (GBC) ចុះថ្ងៃទី២៧ ខែធ្នូ ឆ្នាំ២០២៥ សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ ចុះថ្ងៃទី២៦ ខែតុលា ឆ្នាំ២០២៥ និងកិច្ចព្រមព្រៀងផ្សេងទៀត។
គួររំលឹកថា ជម្លោះប្រដាប់អាវុធរវាងកម្ពុជា និងថៃបានកើតមាននៅថ្ងៃទី២៤ ខែកក្កដា ឆ្នាំ២០២៥ និងលើកទី២ កាលពីថ្ងៃទី២ ខែធ្នូ ឆ្នាំ២០២៥។ ប្រទេសទាំងពីរបានសម្រេចបទឈប់បាញ់ជាថ្មីកាលពីថ្ងៃទី២៧ ខែធ្នូ ឆ្នាំ២០២៥ បន្ទាប់ពីកិច្ចប្រជុំពិសេស លើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC)៕
អត្ថបទដោយ៖ តែម ស្រីណុច