ក្រសួងធនធានទឹក និងឧតុនិយម អំពាវនាវឱ្យប្រជាពលរដ្ឋមានការប្រុងប្រយ័ត្នខ្ពស់ ចំពោះបាតុភូតភ្លៀងផ្គររន្ទះ និងខ្យល់កន្ត្រាក់ ក្រោមឥទ្ធិពលព្យុះចំនួន០២ ចាប់ពីថ្ងៃទី០៣ ដល់ថ្ងៃទី១២ ខែកក្កដា ឆ្នាំ២០២៦ ក្នុងសប្តាហ៍នេះ។
សេចក្តីជូនដំណឹងរបស់ក្រសួងធនធានទឹក និងឧតុនិយម ចេញផ្សាយនៅថ្ងៃទី៣ ខែកក្កដា ឆ្នាំ២០២៦នេះ បានឱ្យដឹងថា របបខ្យល់មូសុងនិរតីដែលកើតចេញពីឥទ្ធិពលព្យុះទី១០ ឈោ្មះ ម៉ៃស័ក (ម៉ៃសាក់) បាននិងកំពុងកើតមាននៅឈូងសមុទ្របេងហ្គាល សមុទ្រអាន់ដាម៉ាន់ សមុទ្រចិនខាងត្បូង អាងទន្លេមេគង្គ សមុទ្រកម្ពុជា និងលើប្រទេសកម្ពុជា ហើយវានឹងរលាយបាត់ទៅវិញនៅថ្ងៃទី០៦ ខែកក្កដា។
បើទោះជាក្រសួងថា គន្លងផ្លូវដើររបស់ព្យុះទី១០នេះ មិនគ្របដណ្តប់លើប្រទេសកម្ពុជា ប៉ុន្តែឥទ្ធិពលនៃព្យុះនេះ រួមនិងព្យុះទី០៩ ឈ្មោះ បាវី នឹងបង្កឱ្យកម្ពុជាអាចមានភ្លៀងធ្លាក់លាយឡំជាមួយនឹងខ្យល់កន្ត្រាក់ ចាប់ពីថ្ងៃទី០៣ ដល់ថ្ងៃទី១២ ខែកក្កដា នៅតំបន់មួយចំនួន។
ក្រសួងធនធានទឹក និងឧតុនិយម បានបញ្ជាក់ថា សម្រាប់តំបន់វាលទំនាប រួមមាន ខេត្តបន្ទាយមានជ័យ បាត់ដំបង ពោធិ៍សាត់ កំពង់ឆ្នាំង សៀមរាប កំពង់ធំ កំពង់ចាម ត្បូងឃ្មុំ ព្រៃវែង កណ្ដាល តាកែវ ស្វាយរៀង និងរាជធានីភ្នំពេញ អាចនឹងមានភ្លៀងធ្លាក់ជាមួយខ្យល់កន្ត្រាក់ និងផ្គររន្ទះគ្របដណ្តប់លើផ្ទៃដី ៥០ភាគរយ ខណៈតំបន់ខ្ពង់រាប ដូចជា ខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ជួរភ្នំដងរែក និងតំបន់ជួរភ្នំក្រវាញ អាចនឹងមានភ្លៀងធ្លាក់ជាមួយខ្យល់កន្ត្រាក់ និងផ្គររន្ទះគ្របដណ្តប់លើផ្ទៃដី ៦០ភាគរយ។
ចំណែក តំបន់មាត់សមុទ្រ រួមមានខេត្តកោះកុង ព្រះសីហនុ កំពត កែប និងជួរភ្នំបូកគោ ក្រសួងថា អាចនឹងមានភ្លៀងធ្លាក់ជាមួយខ្យល់កន្ត្រាក់ និងផ្គររន្ទះគ្របដណ្ដប់លើផ្ទៃដី ៧០ភាគរយ ហើយរលកសមុទ្របោកបក់ខ្លាំង ដែលមានកម្ពស់ចន្លោះពី ០,៥០ម៉ែត្រ ដល់ ១,៧៥ម៉ែត្រ។
ការណ៍នេះ ក្រសួងបានអំពាវនាវដល់សាធារណជន បង្កើនការប្រុងប្រយ័ត្នចំពោះបាតុភូតនេះ ជាពិសេសពេលធ្វើដំណើរតាមផ្លូវគោក និងផ្លូវទឹក៕
អត្ថបទដោយ៖ ផាត់ ស័ក្តស៊ីន