ក្រុមអ្នកសម្របសម្រួល(CLG)កម្ពុជា បានជូនក្រុមអ្នកសង្កេតការណ៍អាស៊ាន (AOT) ចុះទៅសង្កេតការណ៍ផ្ទាល់នូវស្ថានភាពជាក់ស្តែងនៅតាមបន្ទាត់ព្រំដែនកម្ពុជា-ថៃ នៅចន្លោះបង្គោលលេខ៥២ ដល់ ៥៩ ស្ថិតក្នុងភូមិសាស្ត្រស្រុកកំរៀង ខេត្តបាត់ដំបង ដោយក្រសួងការពារជាតិកម្ពុជា បានអះអាងថា ក្រុមអ្នកសង្កេតការណ៍បានឃើញការខូចខាតបង្គោលព្រំដែនបណ្តោះអាសន្ន ដែលបង្កឡើងដោយសកម្មភាពសាង់សង់របងព្រំដែនដោយឯកតោភាគីពីសំណាក់យោធាថៃ ព្រមទាំងទីតាំងដែលពលរដ្ឋថៃចូលធ្វើស្រែចម្ការចូលហួសក្នុងទឹកដីកម្ពុជា។
សេចក្តីប្រកាសព័ត៌មានរបស់អ្នកនាំពាក្យក្រសួងការពារជាតិ ចេញផ្សាយនៅលើទំព័រហ្វេសប៊ុកនៅថ្ងៃទី០៦ ខែកក្កដា ឆ្នាំ២០២៦ បានលើកឡើងថា តាមរយៈការចុះទៅសង្កេតការណ៍ ប្រមូល និងផ្ទៀងផ្ទាត់ព័ត៌មាននៅតំបន់ព្រំដែនកម្ពុជា-ថៃ នៅស្រុកកំរៀង ខេត្តបាត់បងនោះ ក្រុមអ្នកសង្កេតការណ៍ បានពិនិត្យឃើញជាក់ស្តែងនូវការបែកបាក់បង្គោលបណ្តោះអាសន្ន ដែលបង្កឡើងដោយសកម្មភាពសាងសង់របងព្រំដែនដោយឯកតោភាគីពីសំណាក់ភាគីថៃ នៅកៀកបង្គោលព្រំដែនលេខ ៥២-៥៤។
ប្រភពដដែលបន្តអះអាងថាទៀតថា ក្រុមអ្នកសង្កេតការណ៍អាស៊ានប្រចាំនៅកម្ពុជា ក៏បានចុះទៅពិនិត្យទីតាំងដែលប្រជាពលរដ្ឋថៃបានធ្វើស្រែចំការហួសចូលក្នុងដីកម្ពុជា នៅចន្លោះបង្គោលព្រំដែន ៥២-៥៩ ផងដែរ។
Press Start Cambodia មិនអាចស្វែងរកការអត្ថាធិប្បាយបន្ថែមជុំវិញករណីនេះ ពុំអភិបាលខេត្តបាត់ដំបង លោក សុខ លូ បានទេ នៅថ្ងៃទី០៧ ខែកក្កដា ឆ្នាំ២០២៦នេះ។
ចំណែក អ្នកនាំពាក្យរាជរដ្ឋាភិបាល លោក ប៉ែន បូណា ប្រាប់ថា មិនអាចផ្តល់ព័ត៌មានបន្ថែមបាន ដោយសាររឿងនេះមិនស្ថិតក្រោមការទទួលខុសត្រូវរបស់លោក។
លោកមានប្រសាសន៍ថា៖ «រឿងនេះមិនមែនជាការទទួលខុសត្រូវរបស់ខ្ញុំនោះទេ អញ្ចឹងខ្ញុំអត់ដឹងទេ»។
យ៉ាងណា បើតាមសេចក្តីប្រកាសព័ត៌មានរបស់ក្រសួងការពារជាតិដដែល បានគូសបញ្ជាក់ថា ភាគីកម្ពុជាបានតវ៉ាតាមរយៈកំណត់ទូតទៅភាគីថៃហើយ ដោយសារតែការងារនេះប៉ះពាល់ទៅដល់នីតិវិធីទ្វេភាគីដែលមានស្រាប់ ស្ថិតនៅក្រោមសមត្ថកិច្ចរបស់គណៈកម្មការចម្រុះខ័ណ្ឌសីមាព្រំដែនគោក JBC ភាគីទាំងពីរ។ ជាមួយគ្នានេះ ភាគីកម្ពុជា ក៏បានជំរុញការរៀបចំកិច្ចប្រជុំគណៈកម្មការចម្រុះខ័ណ្ឌសីមាព្រំដែនគោក JBC ឱ្យបានឆាប់បំផុត ដើម្បីដោះស្រាយបញ្ហានេះ៕
អត្ថបទដោយ៖ ធួន ស្រីពៅ