រដ្ឋាភិបាលកម្ពុជា ច្រានចោលការលើកឡើងរបស់យោធាថៃដែលថា កន្លែងដែលទាហានថៃបានជាន់គឺជាទឹកដីរបស់ថៃ ក្រោមហេតុផលថា យោធាគ្មានសមត្ថកិច្ចក្នុងការសម្រេចអំពីខណ្ឌសីម៉ារបស់ប្រទេស ហើយការប្រកាសបែបនេះក៏គ្មានតម្លៃគតិយុត្តផងដែរ។
យោងតាមសេចក្ដីថ្លែងការណ៍របស់អ្នកនាំពាក្យរាជរដ្ឋាភិបាលកម្ពុជា ចុះថ្ងៃទី១៧ ខែតុលា ឱ្យដឹងថា បណ្តាញសារព័ត៌មានថៃមួយចំនួន កាលពីថ្ងៃទី១៥ ខែតុលា បានចុះផ្សាយដោយស្រង់សម្ដីរបស់មន្រ្តីយោធាថៃថា «កន្លែងដែលទាហានថៃបានជាន់ គឺជាទឹកដីរបស់ថៃ» ដែលសំដៅលើទីតាំងដែលយោធាថៃបានឈូសឆាយ និងរាវមីន កាលពីថ្ងៃទី១៣ ខែសីហា នៅភូមិព្រៃចាន់ និងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
ប្រភពដដែល បន្តថា រដ្ឋាភិបាលកម្ពុជា ប្រកាន់ខ្ជាប់នូវគោលជំហរយ៉ាងម៉ឺងម៉ាត់ ចំពោះអធិបតេយ្យភាព និងបូរណភាពទឹកដីរបស់ខ្លួន ដោយមិនទទួលយកដាច់ខាតនូវការប្រកាសជាឯកតោភាគីរបស់យោធាថៃ ក្រោមហេតុផលថា យោធាមិនមានសិទ្ធិក្នុងការសម្រេចអំពីខណ្ឌសីមារបស់ប្រទេសនោះឡើយ ហើយការប្រកាសបែបនេះក៏គ្មានតម្លៃជាគតិយុត្តផងដែរ។
បន្ថែមពីលើនេះ អ្នកនាំពាក្យរាជរដ្ឋាភិបាលកម្ពុជា លោក ប៉ែន បូណា បានថ្លែងក្នុងសន្នីសិទសារព័ត៌មានថ្ងៃនេះថា៖ «បើទោះបីជារាជរដ្ឋាភិបាលកម្ពុជា សម្ដែងការអត់ធ្មត់ក្នុងអំឡុងពេលអនុវត្តកិច្ចព្រមព្រៀងបទឈប់បាញ់ ដើម្បីចៀសវាងការផ្ទុះអាវុធដែលអាចបង្កមហន្តរាយធំធេងដល់ប្រទេសជាតិ និងប្រជាជនទាំងសងខាង ប៉ុន្តែរាជរដ្ឋាភិបាលកម្ពុជាមិនបោះបង់សិទ្ធិក្នុងការទាមទារដែនអធិបតេយ្យភាពជាតិ និងបូរណភាពទឹកដីរបស់ខ្លួន ស្របតាមអនុសញ្ញា សន្ធិសញ្ញា និងច្បាប់អន្តរជាតិឡើយ»។
អ្នកវិភាគនយោបាយលោក ឯម សុវណ្ណរ៉ា មានប្រសាសន៍ថា ដំណោះស្រាយសម្រាប់កម្ពុជានៅពេលនេះ គឺនាំយកតំបន់មានវិវាទជាមួយថៃ ទៅកាន់តុលាការយុត្តិធម៌អន្តរជាតិ (ICJ) ដែលកម្ពុជាមានឯកសារបង្អែក ជាសន្ធិសញ្ញាបារាំង-សៀមឆ្នាំ១៩០៤ និង១៩០៧ រួមទាំងកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១។
លោកនិយាយថា៖ «ខ្ញុំគិតថា មធ្យោបាយតែមួយទេ គឺការប្ដឹងទៅតុលាការអន្តរជាតិ ICJ គឺយើងអាចប្រើយន្តការអន្តរជាតិបាន ដោយសារកម្ពុជានិងថៃ មានកិច្ចព្រមព្រៀងអន្តរជាតិពីអតីតកាល គឺកិច្ចព្រមព្រៀងសន្ធិសញ្ញាឆ្នាំ១៩០៤ និង១៩០៧ ហើយនិងកិច្ចព្រមព្រៀងសន្តិភាពឆ្នាំ១៩៩១។ នេះជាយន្តការមួយដែលកម្ពុជាអាចប្រើច្បាប់អន្តរជាតិប្រើការយកមកដោះស្រាយ»។
លោកបានអះអាងថា បើទោះបីជាភាគីថៃ មិនព្រមដោះស្រាយ តាមរយៈតុលាការអន្តរជាតិក្ដី ក៏កម្ពុជានៅតែអាចដាក់ពាក្យបណ្ដឹងបានដែរ ដោយសារទាំងកម្ពុជា និងថៃ ជាសមាជិកនៃអង្គការសហប្រជាជាតិ។
ចំណែក អ្នកនាំពាក្យសាលាខេត្តបន្ទាយមានជ័យ លោក លី សុវណ្ណារិទ្ធ មានប្រសាសន៍ថា នៅថ្ងៃសុក្រនេះ ស្ថានភាពនៅភូមិព្រៃចាន់ និងភូមិជោគជ័យ មានសភាពស្ងប់ស្ងាត់ ប៉ុន្តែយោធាថៃ បានចាក់ដីពង្រាយនៅទីតាំងដែលពួកគេបានឈូសឆាយ កាលពីប៉ុន្មានថ្ងៃមុន។
លោកនិយាយថា៖ «ថ្ងៃនេះស្ងប់ស្ងាត់ តែថៃចាក់ដីនៅភូមិព្រៃចាន់ កន្លែងដែលឈូសឆាយថ្ងៃមុន»។
បើតាម លោក លី សុវណ្ណារិទ្ធ មានពលរដ្ឋ១២គ្រួសារ ដែលរងផលប៉ះពាល់ពីការទន្រ្ទានយកដីពីសំណាក់ភាគីថៃ ក្នុងភូមិទាំងពីរ ខណៈនៅភូមិព្រៃចាន់ ថៃបានចូលមកជម្រៅ ៤០០ម៉ែត្រ ពីទីតាំងឈរជើងចាស់។
កាលពីថ្ងៃទី១០ ខែតុលា កងកម្លាំងយោធាថៃ បានប្រើគ្រឿងចក្រឈូសឆាយដី បន្ទាប់មកធ្វើសកម្មភាពរាវមីន នៅទីតាំងដែលពួកគេបានព័ទ្ធរបងលួស ដែលស្ថិតនៅភូមិសាស្រ្តភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
ភ្លាមៗ រដ្ឋបាលខេត្តបន្ទាយមានជ័យ បានចេញសេចក្ដីប្រកាសមួយ ដោយថ្កោលទោសចំពោះសកម្មភាព ដ៏គឃ្លីន និងអមនុស្សធម៌របស់កងកម្លាំងចម្រុះយោធាថៃ ដែលជាការបំពានសិទ្ធិមនុស្សយ៉ាងធ្ងន់ធ្ងរ រំលោភលើ MOU ឆ្នាំ២០០០ កិច្ចព្រមព្រៀងបទឈប់បាញ់ ថ្ងៃទី២៨ ខែកក្កដា ឆ្នាំ២០២៥ និងលទ្ធផលនៃកិច្ចប្រជុំវិសាមញ្ញ GBC កាលពីថ្ងៃទី៧ ខែសីហា ឆ្នាំ២០២៥ ព្រមទាំងកំណត់ហេតុកិច្ចប្រជុំពិសេសលើកទី១ គណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី១០ ខែកញ្ញា ឆ្នាំ២០២៥ និងកិច្ចព្រមព្រៀងទាំងឡាយដែលភាគីទាំងពីរបានឯកភាពគ្នានាពេលកន្លងមក។
កាលពីថ្ងៃទី០៨ ខែតុលា តាមរយៈលិខិតមួយ អភិបាលខេត្តបន្ទាយមានជ័យ បានប្រាប់ទៅកាន់ អភិបាលខេត្តស្រះកែវថៃ ឱ្យបញ្ឈប់រាល់សកម្មភាពដែលពង្រីកទំហំវិវាទ និងបង្កើនភាពតានតឹងនៅព្រំដែន ដោយរងចាំការដោះស្រាយពីគណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ ជុំវិញការកំណត់ខ្សែបន្ទាត់ព្រំដែន នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
លិខិតនោះ បានគូសបញ្ជាក់ថា រដ្ឋបាលខេត្តបន្ទាយមានជ័យ និងខេត្តស្រះកែវ មិនមានសិទ្ធិក្នុងការកំណត់ព្រំដែន ក្នុងតំបន់មិនទាន់មានការខណ្ឌសីមាព្រំដែនរួចរាល់នោះទេ។
កងកម្លាំងកម្ពុជា-ថៃ បានប៉ះទង្គិចគ្នាអស់រយៈពេល៥ថ្ងៃ ចាប់ពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥ រហូតទាល់តែមានបទឈប់បាញ់ ក្រោមការសម្របសម្រួលពីម៉ាឡេស៊ី និងសហរដ្ឋអាមេរិក។
តែយ៉ាងណា ក្រោយពីចុះកិច្ចព្រមព្រៀងបទឈប់បាញ់ កងកម្លាំងរបស់ថៃ បានចាប់កងកម្លាំងកម្ពុជាចំនួន ២០នាក់ ដែលរហូតមកដល់ពេលនេះ នៅសល់១៨នាក់ទៀត ដែលថៃនៅមិនទាន់មានការដោះលែងនៅឡើយ ហើយទាហានថៃ ក៏នៅតែបន្តធ្វើសកម្មភាពចូលមករាយបន្លាលួស ដាក់សំបកកង់ឡាន និងគ្រឿងចក្រ នៅតាមបណ្តោយព្រំដែន ក្នុងភូមិព្រៃចាន់ និងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ និងព្រមានប្រើច្បាប់អាជ្ញាសឹករបស់ខ្លួន ក្នុងការបណ្តេញពលរដ្ឋខ្មែររស់នៅភូមិព្រៃចាន់ និងភូមិជោគជ័យ ពីលំនៅឋានផងដែរ៕