រាជរដ្ឋាភិបាលកម្ពុជា បានធ្វើការតវ៉ាយ៉ាងខ្លាំងជាថ្មី ចំពោះការបន្តរំលោភបំពានរបស់ភាគីថៃមកលើដែនអធិបតេយ្យភាព និងបូរណភាពទឹកដីរបស់កម្ពុជា បន្ទាប់ពីកងកម្លាំងថៃបន្តសាងសង់លេណដ្ឋានយោធាថី្ម និងការប្រកាសផែនការពង្រីកបណ្ដាញអគ្គិសនីជាតិរបស់ថៃ នៅតំបន់ចំនួន៣ ក្នុងខេត្តពោធិ៍សាត់ និងខេត្តឧត្តរមានជ័យ។
នេះបើសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជា ចេញផ្សាយនៅថ្ងៃទី១០ ខែសីហា ឆ្នាំ២០២៦។
ក្រសួងការបរទេសកម្ពុជា បានឱ្យដឹងថា កាលពីថ្ងៃទី៦ ខែសីហា ឆ្នាំ២០២៦ កងកម្លាំងប្រដាប់អាវុធថៃបានបន្តសាងសង់លេណដ្ឋានយោធាថ្មី ដោយរំលោភចូលក្នុងទឹកដីកម្ពុជានៅក្នុងតំបន់ច្រកទ្វារអន្ដរជាតិថ្មដា ឃុំថ្មដា ស្រុកវាលវែង ខេត្តពោធិ៍សាត់។ ជាងនេះទៅទៀត នៅថ្ងៃទី៧ ខែសីហា រាជរដ្ឋាភិបាលថៃ បានប្រកាសពីគម្រោងផែនការពង្រីកបណ្ដាញអគ្គិសនីជាតិថៃ ទៅកាន់តំបន់ប្រាសាទតាក្របី ស្ថិតក្នុងខេត្តឧត្តរមានជ័យ និងភ្នំ៣៣៣។
ក្រសួងបញ្ជាក់ថា តំបន់ខាងលើនេះ គឺស្ថិតនៅក្នុងដែនអធិបតេយ្យភាពរបស់កម្ពុជាទាំងស្រុង ដូចបានកំណត់ និងខណ្ឌសីមាក្នុងផែនទីមាត្រដ្ឋាន ១:២០០០.០០០ ផលិតដោយគណៈកម្មការកំណត់ព្រំដែនរវាងឥណ្ឌូចិននិងសៀម អនុលោមតាមអនុញ្ញាបារាំង-សៀម ឆ្នាំ១៩០៤ និងសន្ធិសញ្ញាឆ្នាំ១៩០៧។
ការណ៍នេះ ក្រសួងការបរទេសកម្ពុជា បានចាត់ទុកសកម្មភាពនេះថាជា «ការប៉ុនប៉ងពង្រឹងការកាន់កាប់ទឹកដីកម្ពុជាដោយខុសច្បាប់របស់ថៃ ដែលរំលោភលើកាតព្វកិច្ចរបស់ខ្លួន ក្រោមសន្ធិសញ្ញា និងកិច្ចព្រមព្រៀងទ្វេភាគីដែលមានស្រាប់ ស្ដីពីការកំណត់ព្រំដែនគោកជាមួយកម្ពុជា»។
ជាមួយគ្នានេះ កម្ពុជាថា សកម្មភាពរបស់កងកម្លាំងថៃ ក៏រំលោភបំពានផងដែរលើមាត្រា៥ នៃអនុស្សរណៈនៃការយោគយល់គ្នា ស្តីពីការវាស់វែងនិងខណ្ឌសីមាព្រំដែនគោក (MoUឆ្នាំ២០០០) និងបំពានលើចំណុចទី១ (វិធានការកាត់បន្ថយភាពតានតឹង) នៃសេចក្តីប្រកាសរួមនៃកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅ (GBC) ចុះថ្ងៃទី២៧ ខែធ្នូ ឆ្នាំ២០២៥។
រាជរដ្ឋាភិបាលកម្ពុជា បានបញ្ជាក់សារជាថ្មីថា៖ «កម្ពុជាមិនទទួលស្គាល់ជាដាច់ខាតនូវខ្សែបន្ទាត់ព្រំដែន ឬការទាមទារទឹកដីជាឯកតោភាគីរបស់ប្រទេសថៃនោះឡើយ ហើយសកម្មភាពដែលបានរៀបរាប់ខាងលើ នឹងមិនប៉ះពាល់ដល់សិទ្ធិស្របច្បាប់ ឬជំហររបស់ព្រះរាជាណាចក្រកម្ពុជា ពាក់ព័ន្ធនឹងព្រំដែនអន្ដរជាតិរបស់ខ្លួនឡើយ»។
ជាមួយគ្នានេះ កម្ពុជា នៅតែបន្តប្ដេជ្ញាចិត្តដោះស្រាយជម្លោះព្រំដែនជាមួយប្រទេសថៃ និងទាមទារឱ្យប្រទេសថៃបញ្ឈប់សកម្មភាពបែបនេះ ដើម្បីកាត់បន្ថយភាពតានតឹង និងជំរុញការជឿទុកចិត្តគ្នាទៅវិញទៅមក ហើយសម្របសម្រួលដោះស្រាយជម្លោះដោយសន្តិវិធី ដើម្បីស្តារឡើងវិញនូវសន្តិភាព ស្ថិរភាព និងទំនាក់ទំនងភាពជាអ្នកជិតខាងល្អ នៅតាមបណ្តោយព្រំដែនកម្ពុជា-ថៃ៕
អត្ថបទដោយ៖ ដោក សុវណ្ណវឌ្ឍនា