ក្រសួងការងារ និងបណ្ដុះបណ្ដាលវិជ្ជាជីវៈកម្ពុជា បានអនុញ្ញាតឱ្យក្រុមហ៊ុនមួយ សាកល្បងជ្រើសរើស បណ្ដុះបណ្ដាល បញ្ជូន និងគ្រប់គ្រងជនទេសន្តរប្រវេសន៍ការងារខ្មែរ (ពលករខ្មែរ) ទៅធ្វើការក្នុងវិស័យសំណង់នៅសាធារណរដ្ឋសង្គមនិយមវៀតណាម ដោយទទួលបានប្រាក់ឈ្នួលចន្លោះពី ៦០០ដុល្លារ ទៅជាង ១៣០០ដុល្លារតាមជំនាញ។
យោងតាមសេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ ចេញផ្សាយនៅថ្ងៃទី១៤ ខែកក្កដា ឆ្នាំ២០២៦ បានឱ្យដឹងថា ក្រសួងបានអនុញ្ញាតឱ្យក្រុមហ៊ុន ផេស៊ីហ្វិក អ៊ឹមផ្លាយម៉ិន អេជេន ឯ.ក ដែលជាភ្នាក់ងារជ្រើសរើសឯកជន ធ្វើការសាកល្បងក្នុងការជ្រើសរើស បណ្ដុះបណ្ដាល បញ្ជូន និងគ្រប់គ្រងពលករខ្មែរ ទៅធ្វើការក្នុងវិស័យសំណង់នៅប្រទេសវៀតណាម នៅក្រុមហ៊ុនសំណង់ SONG DA 5 JOINT STOCK COMPANY។
សេចក្តីជូនដំណឹងដដែលបន្តថា លក្ខខណ្ឌជ្រើសរើស ផ្តោតលើបុរសអាយុពី ២៣ឆ្នាំ ដល់ ៣៩ ឆ្នាំ ដែលមានបទពិសោធន៍ការងារផ្នែកសំណង់ ខណៈអ្នកមានចំណេះដឹងភាសាវៀតណាមនឹងទទួលបានអាទិភាព។
ចំណែក ប្រាក់ខែ ក្រសួងថា អាស្រ័យលើប្រភេទការងារ ដោយពលករទូទៅប្រើប្រាស់កម្លាំង ទទួលបានចន្លោះពី ១៦ លានដុង ដល់ ២០ លានដុង (ប្រមាណ ៦០០ ដុល្លារ ដល់ ៧៦០ ដុល្លារ) ខណៈពលករជាងផ្សារ ពលករជំនាញបេតុង និងពលករបញ្ជាគ្រឿងចក្រ ទទួលបានពី ២៥ លានដុង ដល់ ៣០ លានដុង (ប្រមាណ ៩៥០ ដុល្លារ ដល់ ១ ១៤០ ដុល្លារ)។ ចំណែក វិស្វករសំណង់ស៊ីវិល ទទួលបានពី ២៨ លានដុង ដល់ ៣៥ លានដុង (ប្រមាណ ១ ០៦០ ដុល្លារ ដល់ ១ ៣៣០ ដុល្លារ)។
បន្ថែមពីលើប្រាក់ខែ ក្រុមហ៊ុននឹងរ៉ាប់រងថ្លៃធ្វើដំណើរទៅ-មករវាងកម្ពុជា និងវៀតណាម ផ្តល់កន្លែងស្នាក់នៅ ទឹក ភ្លើង ដោយឥតគិតថ្លៃ និងឧបត្ថម្ភថ្លៃអាហារ ៥០%។
បើតាមក្រសួងការងារ ការទទួលពាក្យចុះឈ្មោះ ចាប់ផ្តើមពីថ្ងៃជូនដំណឹងនេះតទៅ នៅក្រុមហ៊ុន ផេស៊ីហ្វិក អីមផ្លយម៉ិន អេជេន ឯ.ក ស្ថិតនៅផ្លូវវេងស្រេង សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ តាមរយៈលេខទូសព្ទ ០១៦/០៧៧/០៦៦ ៧៧០ ៨៧០៕
អត្ថបទដោយ៖ គង់ ច័ន្ទពេជ្ររ៉ា