ក្រសួងសុខាភិបាលប្រកាសពីការថយចុះជំងឺគ្រុនចាញ់១០០ភាគរយ បន្ទាប់ពីមិនបានរកឃើញករណីជំងឺគ្រុនចាញ់ឆ្លងថ្មីក្នុងរយៈពេល៦ខែ ដើមឆ្នាំ២០២៦ និងពុំមានករណីស្លាប់ដោយសារជំងឺគ្រុនចាញ់ចាប់តាំងពីឆ្នាំ២០១៨ រហូតដល់បច្ចុប្បន្ននេះ។
តាមសេចក្តីប្រកាសព័ត៌មានចុះថ្ងៃ១៦ ខែកក្កដា ឆ្នាំ២០២៦ ក្រសួងសុខាភិបាលបានឱ្យដឹងថា កម្ពុជាបានសម្រេចបានសមិទ្ធផលជាប្រវត្តិសាស្ត្រក្នុងការលុបបំបាត់ការចម្លងជំងឺគ្រុនចាញ់ក្នុងស្រុក តាមរយៈការអនុវត្តផែនការយុទ្ធសាស្ត្រជាតិលុបបំបាត់ជំងឺគ្រុនចាញ់ ឆ្នាំ២០១១-២០២៥។
ក្រសួងសុខាភិបាលបន្តថា សមិទ្ធផលនេះ បានមកពីប្រសិទ្ធភាពនៃការអនុវត្តយុទ្ធសាស្ត្រក្នុងការរុករក ការព្យាយបាល ការបង្ការ ការតាមដាន និងធ្វើអន្តរាគមន៍លើករណីជំងឺគ្រុនចាញ់បានឆាប់ និងទាន់ពេលវេលា ដោយមានការចូលរួមពីភាគីពាក់ព័ន្ធផ្សេងៗ។
ក្រសួងសុខាភិបាលបន្ថែមទៀតថា សព្វថ្ងៃ កម្ពុជាកំពុងដំណើរយ៉ាងសកម្មក្នុងការតាមដាននិងរុករកករណីជំងឺគ្រុនចាញ់ តាមរយៈប្រព័ន្ធរបាយការណ៍រហ័សទាន់ពេលវេលា ២៤ម៉ោង នៅគ្រប់បណ្តាភូមិសាស្ត្រ ដើម្បីឈានទៅការឆ្លើយតបរហ័ស ២៤ម៉ោង និងការទប់ស្កាត់ការកើតឡើងវិញ នៃជំងឺគ្រុនចាញ់បានទាន់ពេលវេលា។ តាមរយៈប្រព័ន្ធនេះ ក្រសួងមិនបានរកឃើញជំងឺគ្រុនចាញ់ឆ្លងក្នុងស្រុកថ្មីនាឆ្នាំ២០២៦ លេចចេញតាមបណ្តាព្រំដែនប្រទេសកម្ពុជានោះទេ។
សេចក្តីប្រកាសព័ត៌មានដដែលក៏បានអំពាវនាវដល់សាធារណជនឱ្យចូលរួមបង្ការជំងឺគ្រុនចាញ់តាមរយៈការការពារខ្លួនកុំឱ្យមូសខាំ សម្រាន្តក្នុងមុងគ្រប់ពេល និងស្វែងរកសេវាពិគ្រោះយោបល់ ឬធ្វើតេស្ត និងព្យាបាលឱ្យបានទាន់ពេលវេលា ប្រសិនបើសង្ស័យថា បានឆ្លងជំងឺគ្រុនចាញ់៕
អត្ថបទដោយ៖ ធី វណ្ណា