រដ្ឋមន្ត្រីការបរទេសកម្ពុជា ស្នើដល់សហការីអាស៊ាន ជួយគាំទ្រការអំពាវនាវឱ្យជនភៀសសឹកជាង ២ម៉ឺននាក់ ដែលកំពុងស្នាក់នៅជម្រកបណ្តោះអាសន្ន បានត្រឡប់ទៅផ្ទះសម្បែងវិញ ដោយសុវត្ថិភាព និងគ្មានការរារាំង។
ការស្នើនេះ បានធ្វើឡើងនៅក្នុងជំនួបរវាងរដ្ឋមន្ត្រីការបរទេសអាស៊ាន ជាមួយតំណាងគណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស និងកិច្ចប្រជុំគណៈកម្មការតំបន់អាស៊ីអាគ្នេយ៍គ្មានអាវុធនុយក្លេអ៊ែរ កាលពីថ្ងៃទី២០ ខែកក្កដា ឆ្នាំ២០២៦ នៅទីក្រុងម៉ានីល សាធារណរដ្ឋហ្វីលីពីន។
យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជា ចុះថ្ងៃទី២១ ខែកក្កដា បានឱ្យដឹងថា ក្នុងកិច្ចប្រជុំនោះ រដ្ឋមន្ត្រីការបរទេសកម្ពុជា លោក ប្រាក់ សុខន បានលើកឡើងថា ស្ថានភាពមនុស្សធម៌ និងសិទ្ធិមនុស្សដែលជនស៊ីវិលកម្ពុជាកំពុងប្រឈម ដោយសារបានក្លាយជាជនរងគ្រោះនៃជម្លោះព្រំដែនរវាងកម្ពុជា និងថៃ។
លោកបន្តថា ជនស៊ីវិលច្រើនជាង ២ម៉ឺននាក់ កំពុងបន្តរស់នៅក្នុងជម្រកបណ្តោះអាសន្ន ដោយមានកុមារជាច្រើននាក់មិនអាចចូលរៀនបាន ខណៈជនចាស់ជរា និងជនងាយរងគ្រោះផ្សេងទៀត ខ្វះលទ្ធភាពទទួលបានការថែទាំចាំបាច់គ្រប់គ្រាន់ បើទោះបីជារាជរដ្ឋាភិបាល បានខិតខំប្រឹងប្រែង ដើម្បីបន្ធូរបន្ថយការលំបាករបស់ពួកគេយ៉ាងណាក៏ដោយ។
ករណីនេះ លោក ប្រាក់ សុខុន បានអំពាវនាវដល់សហការីអាស៊ាន ជួយគាំទ្រការអំពាវនាវឱ្យជនភៀសសឹកទាំងនោះ បានប្រឡប់ទៅកាន់ផ្ទះសម្បែង និងរស់នៅដូចធម្មតាវិញ ដោយគ្មានការរារាំង ប្រកបដោយសុវត្ថិភាព និងភាពថ្លៃថ្នូរ។
បើតាមសេចក្តីប្រកាសព័ត៌មានរបស់ក្រសួងមហាផ្ទៃ គិតមកដល់ថ្ងៃទី២០ ខែកក្កដា ឆ្នាំ២០២៦ មានពលរដ្ឋភៀសសឹកចំនួន ២ ០២៨១នាក់ ក្នុងនោះមានកុមារ ៦ ០៦៦នាក់ នៅពុំទាន់អាចវិលទៅលំនៅឋានវិញនៅឡើយ បន្ទាប់ពីភូមិករ និងផ្ទះសម្បែងរបស់ពួកគេ ត្រូវបានយោធាថៃចូលកាន់កាប់ និងបំផ្លិចបំផ្លាញដោយខុសច្បាប់ ក្រោយបទឈប់បាញ់ចូលជាធរមានកាលពីថ្ងៃទី២៥ ខែធ្នូ ឆ្នាំ២០២៥៕
អត្ថបទដោយ៖ ស៊ន មេសា