ក្រសួងការបរទេសកម្ពុជា អះអាងថា កម្ពុជា និងថៃ បានឯកភាពគ្នាលើសំណើររបស់អ្នកផ្សះផ្សាឯករាជ្យ ដែលសុំពេលវេលាបន្ថែមទៀត ដើម្បីពិចារណាលើការតែងតាំងប្រធានគណៈកម្មការផ្សះផ្សា ដោយថា ការស្នើនេះ មិនមានផលប៉ះពាល់ទៅលើថេរវេលាកំណត់ ឬជំហាននីតិវិធីណាមួយ ក្រោមអនុសញ្ញាអង្គការសហប្រជាជាតិស្តីពីនីតិសមុទ្រនោះទេ។
សេចក្តីថ្លែងការណ៍របស់អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា ចុះថ្ងៃទី១៩ ខែកក្កដា ឆ្នាំ២០២៦ បានលើកឡើងថា អ្នកផ្សះផ្សាឯករាជ្យចំនួន ៤រូប បានស្នើសុំពេលវេលាបន្ថែមទៀត ដើម្បីពិចារណាឲ្យបានហ្មត់ចត់លើការតែងតាំងឥស្សរជនរូបណា ជាប្រធានគណៈកម្មការផ្សះផ្សា ដែលសំណើរនេះ ត្រូវបានភាគីកម្ពុជា និងថៃ ឯកភាពតាមមតិស្នើសុំនេះ។
ប្រភពដដែល បន្តថា ការស្នើសុំពេលវេលាបន្ថែមពីសំណាក់អ្នកផ្សះផ្សា មានលក្ខណៈសមរម្យ និងពុំមានផលប៉ះពាល់ដល់ពេលវេលាកំណត់ ឫនីតិវិធីក្រោមអនុសញ្ញាអង្គការសហប្រជាជាតិស្តីពី នីតិសមុទ្រឡើយ។
កាលពីថ្ងៃទី០៥ ខែឧសភា ឆ្នាំ២០២៦ គណៈរដ្ឋមន្ត្រីថៃ បានអនុម័តនូវសេចក្ដីសម្រេច ស្ដីពីការបញ្ចប់នូវអនុស្សរណៈនៃការយោគយល់ឆ្នាំ២០០១ (MOU2001) ពាក់ព័ន្ធការទាមទារត្រួតគ្នាក្នុងដែនសមុទ្ររួមគ្នារវាងកម្ពុជានិងថៃ។ អនុស្សរណៈនៃការយោគយល់ឆ្នាំ ២០០១នេះ គឺជាក្របខណ្ឌតែមួយគត់ រវាងប្រទេសទាំងពីរដើម្បីដោះស្រាយដោយសន្តិវិធី និងផ្អែកលើច្បាប់អន្តរជាតិ នូវបញ្ហាត្រួតគ្នាក្នុងដែនសមុទ្រ ក៏ដូចជាក្នុងការដោះស្រាយបញ្ហាព្រំដែនសមុទ្ររវាងប្រទេសទាំងពីរ។
ក្រោយពីថៃបានបញ្ចប់ជាឯកតោភាគីនូវអនុស្សរណៈយោគយល់គ្នាឆ្នាំ២០០១នេះ ភាគីកម្ពុជា បានបង្ហាញការសោកស្តាយ និងថា ខ្លួនមិនមានជម្រើសអ្វីប្រសើរជាងការផ្ដើមគំនិតជំរុញនូវយន្តការផ្សះផ្សាដោយបង្ខំ ក្រោមអនុសញ្ញាអង្គការសហប្រជាជាតិស្ដីពីច្បាប់សមុទ្រ ដែលបានសម្រេចនៅឆ្នាំ១៩៨២។
កាលពីថ្ងៃទី២ ខែមិថុនា ឆ្នាំ២០២៦ ប្រមុខរដ្ឋាភិបាលកម្ពុជា លោក ហ៊ុន ម៉ាណែត តាមរយៈសេចក្តីថ្លែងការណ៍ពិសេស បានប្រកាសពីការជូនដំណឹងរបស់ភាគីកម្ពុជា ទៅកាន់ភាគីថៃ និងអង្គការសហប្រជាជាតិ អំពីការចាប់ផ្តើមយន្តការផ្សះផ្សាដោយបង្ខំ ទាក់ទងនឹងបញ្ហាដែនសមុទ្រត្រួតស៊ីគ្នាជាមួយថៃ។ លោកបានបញ្ជាក់ថា កម្ពុជាសម្រេចជ្រើសរើសយន្តការផ្សះផ្សាដោយបង្ខំ នៅក្នុងគោលដៅការពារអធិតេយ្យជាតិ និងសិទ្ធិលើដែនសមុទ្ររបស់កម្ពុជា ដោយអនុលោមតាមច្បាប់អន្តរជាតិ៕
អត្ថបទដោយ៖ ធី វណ្ណា