គណៈកម្មការគ្រប់គ្រងល្បែងពាណិជ្ជកម្មកម្ពុជា (គ.ល.ក.) សម្រេចដកហូតអាជ្ញាបណ្ណកាស៊ីណូ សៀងហៃ រីហ្សត នៅស្រុកចន្ទ្រា ខេត្តស្វាយរៀង បន្ទាប់ពីរកឃើញសកម្មភាពពាក់ព័ន្ធករណីឆបោកតាមប្រព័ន្ធបច្ចេកវិទ្យា។
តាមសេចក្តីប្រកាសព័ត៌មានចុះថ្ងៃទី៣ ខែមេសា ឆ្នាំ២០២៦ របស់ គ.ល.ក. បានឱ្យដឹងថា កងកម្លាំងសមត្ថកិច្ចបានដកហូតឧបករណ៍សម្ភារៈពាក់ព័ន្ធ និងឃាត់ខ្លួនជនបរទេសសរុបចំនួន ១០៧នាក់ (ស្រី២៦នាក់) មាន ៤សញ្ជាតិ អំឡុងពេលចុះត្រួតពិនិត្យ និងឆែកឆេរទីតាំងក្រុមហ៊ុន សៀងហៃ រីហ្សត ខូអិលធីឌី ដែលមានកាស៊ីណូឈ្មោះ សៀងហៃ រីហ្សត ស្ថិតនៅឃុំសំរោង ស្រុកចន្ទ្រា ខេត្តស្វាយរៀង។
សេចក្តីប្រកាសព័ត៌មានដដែលបានបន្តថា យោងតាមច្បាប់ស្តីពីការគ្រប់គ្រងល្បែងពាណិជ្ជកម្ម ក្រុមហ៊ុន សៀងហៃ រីហ្សត ខូអិលធីឌី បានប្រព្រឹត្តល្មើសនឹងបទបញ្ញត្តិជាធរមាន ហើយ គ.ល.ក. សម្រេចដកហូតអាជ្ញាបណ្ណកាស៊ីណូ សៀងហៃ រីហ្សត តាមរយៈសេចក្ដីសម្រេច ចុះថ្ងៃទី៣ ខែមេសា គ.ស.២០២៦។
សេចក្ដីប្រកាសព័ត៌មាននេះ បានបន្ថែមទៀតថា គណៈកម្មការគ្រប់គ្រងល្បែងពាណិជ្ជកម្មកម្ពុជា (គ.ល.ក.) នឹងបន្តអនុវត្តយ៉ាងម៉ឺងម៉ាត់បំផុត តាមបទបញ្ជារាជរដ្ឋាភិបាល ដោយសហការជាមួយ លេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (ONLINE SCAMS) និងកងកម្លាំងមានសមត្ថកិច្ច ដើម្បីចុះត្រួតពិនិត្យ និងឆែកឆេរទីតាំងក្រុមហ៊ុនកាស៊ីណូផ្សេងទៀត ដែលសង្ស័យថា មានជាប់ពាក់ព័ន្ធនឹងអំពើឆបោកតាមប្រព័ន្ធបច្ចេកវិទ្យា៕