យុវជនជនជាតិដើមភាគតិចមួយក្រុមបានប្រែក្លាយទិវានារីអន្តរជាតិ ជាឱកាសផ្សព្វផ្សាយវប្បធម៌ជនជាតិដើម តាមរយៈការស្លៀកពាក់បែបប្រពៃណីចម្រុះជនជាតិដើមបង្ហាញសាធាណជននៅតំបន់កម្សាន្តមុខព្រះបរមរាជវាំង។
កាលពីថ្ងៃទី៨ មីនា ២០២៦ មានយុវជនជនជាតិមួយក្រុមមានគ្នាជិត៣០នាក់ មកពីបណ្តាខេត្តផ្សេងៗគ្នាបានប្រមូលផ្តុំនៅតំបន់កម្សាន្តមាត់ទន្លេមុខព្រះបរមរាជវាំង ដើម្បីអបអរទិវានារីអន្តរជាតិលើកទី១១៥ ដោយពួកគេបានជ្រើសរើសយកសម្លៀកបំពាក់បែបប្រពៃណីជនជាតិដើមចម្រុះមកស្លៀកពាក់ អមជាមួយនឹងការសម្តែងរបាំជនជាតិដើម និងការថតរូបជាក្រុម។
លោក វន ចន្ថា អាយុ ២៩ឆ្នាំ ជនជាតិដើមភាគតិចកួយមកពីខេត្តព្រះវិហារ ដែលជាដឹកនាំក្រុមយុវជនជនជាតិដើមបានប្រាប់ press start Cambodia ថា នេះមិនមែនជាលើកទី១ ទេ ដែលលោកបានប្រមូលយុវជនយុវនារីជនជាតិដើម អបអរសាទរទិវាអន្តរជាតិនារី ០៨ មីនា ដោយនៅឆ្នាំនេះ គឺជាលើកទី៣ ហើយ ដែលលោកបានដឹកនាំក្រុមយុវជនជនជាតិដើមជនជាតិដើម ២៨នាក់ ក្នុងនោះមានយុវតី១៨នាក់ បានចូលរួមប្រារព្ធទិវាសិទ្ធិនារី ដោយបានជ្រើសរើសយកសម្លៀកបំពាក់ប្រពៃណីចម្រុះជនជាតិដើមភាគតិចមកបង្ហាញសាធារណជន។
លោក វន ចន្ថា និយាយថា៖ “យើងយកទីតាំងមុខព្រះបរមរាជវាំង ព្រោះទីនេះមានចម្រុះជាតិសាសន៍មានខ្មែរ បរទេស ជនជាតិដើម ហើយដើម្បីចង់បង្ហាញអោយមនុស្សទូទៅបានឃើញពីប្រពៃណីរបស់ជនជាតិដើមយើង”។
លោក វន ចន្ថា បន្ដទៀតថា ការប្រារព្ធទិវានារីអន្តរជាតិឆ្នាំនេះ មានការចូលរួមចម្រុះយុវជនជនជាតិដើមដូចជា កួយ ពូនង ចារ៉ាយ គ្រឹង ទំពួន ព្រៅ និងបងប្អូនជនជាតិដើមផ្សេងៗទៀត ដែលពួកគាត់មកពីបណ្តាខេត្តមួយចំនួនដូចជាព្រះវិហារ កំពង់ធំ មណ្ឌលគិរី រតនៈគិរី ក្រចេះ ស្ទឹងត្រែង កំពង់ស្ពឺ ឧត្តរមានជ័យនិងខេត្តផ្សេងទៀត។
លោកនិយាយថា៖ “វាជាការផ្សព្វផ្សាយ អំពីភាពចម្រុះ នៃវប្បធម៌គួរឱ្យទាក់ទាញដែលមានសក្តានុពលរបស់ប្រទេសកម្ពុជា។ មិនតែប៉ុណ្ណោះ វាក៏បង្ហាញអំពីការគោរព និងផ្តល់តម្លៃឱ្យគ្នាទៅវិញទៅមក ដោយមិនមានការរើសអើងឡើយ”។
លោក វន ចន្ថា បន្ថែមថា កម្មវិធីនេះ គឺមានការថតរូប វីដេអូ ផ្សព្វផ្សាយអំពីអត្តសញ្ញាណ វប្បធម៌ សិល្បៈ នៅលើបណ្ដាញទំនាក់ទំនងសង្គម ដែលការធ្វើយុទ្ធនាការបែបនេះ ទទួលបានការចាប់អារម្មណ៍ពីបណ្តាយុវជន ប្រជាពលរដ្ឋ និងអ្នកទស្សនាជាច្រើនផងដែរ។
កញ្ញា សុង ដាវី អាយុ២១ឆ្នាំ ជនជាតិដើមភាគតិចគ្រឹង បាននិយាយថា កញ្ញាមកចូលរួមកម្មវិធីថ្ងៃ៨ មីនានេះ គឺ ដើម្បីអបអរទិវានារីអន្តរជាតិផង និងផ្សព្វផ្សាយពីវប្បធម៍ នៃការស្លៀកពាក់របស់ជនជាតិដើម ដើម្បីអោយគេបានយល់ បានស្គាល់ពីជនជាតិដើមផង។
កញ្ញា សុង ដាវី និយាយថា៖ “ការស្លៀកពាក់នេះ បានបង្ហាញអោយគេស្គាល់កាន់តែច្រើន។ ទោះបីសហគន៍មិនបានចូលរួមក៏ដោយ ក៏ពួកយើងអាចបង្ហាញពីប្រពៃណីរបស់យើងបានដែរ”។
ចំណែកយុវជន សេវ វឿន អាយុ ២០ឆ្នាំជនជាតិដើមភាគតិចចារ៉ាយមកពីខេត្តរតនគីរីបាននិយាយថា គោលបំណងរបស់លោកចូលរួមថ្ងៃ៨មីនានេះ គឺចង់បង្ហាញពីវប្បធម៍ប្រពៃណីរបស់ជនជាតិដើមភាគតិច អោយបានទៅដល់២៥ខេត្តក្រុងទូទាំងប្រទេស ដើម្បីលុបបំបាត់ការរើសអើងមកលើជនជាតិដើម។
លោក សេវ វឿន និយាយថា ៖“ពួកយើងស្លៀកពាក់នេះ ព្រោះចង់អោយគេបំបាត់ការរើសអើងលើជនជាតិដើមភាគតិច”។
លោកបន្តថា ជនជាតិដើមភាគតិចមានសិទ្ធរស់រាននិងស្នាក់នៅតាមទីក្រុងឬជនបទ ដើម្បីប្រកបមុខរបរ និងបង្ហាញពីវប្បធម៍ប្រពៃណីរបស់ខ្លួន៕