វិទ្យាស្ថានជាតិសុខភាពសាធារណៈរកឃើញស្ត្រីអាយុ៦៦ឆ្នាំម្នាក់នៅខេត្តស្វាយរៀង វិជ្ជមានវីរុសផ្តាសាយបក្សីប្រភេទហាស់៥ អ៊ិន១ (H5N1) កាលពីថ្ងៃទី២១ ខែមេសា ក្រោយពីស្ត្រីរូបនេះបានយកមាន់ឈឺងាប់ មកធ្វើម្ហូប។
តាមសេចក្តីប្រកាសព័ត៌មានរបស់ក្រសួងសុខាភិបាលចុះថ្ងៃទី២២ ខែមេសា ឆ្នាំ២០២៦ បានឲ្យដឹងថា ចាប់ពីថ្ងៃទី២ ដល់ថ្ងៃទី១៣ ខែមេសា នៅក្នុងភូមិកើតហេតុ និងផ្ទះរបស់អ្នកជំងឺមានមាន់ឈឺនិងងាប់ ហើយស្ត្រីរូបនេះបានយកមាន់ឈឺងាប់មកធ្វើម្ហូបសម្រាប់បរិភោគ។ បច្ចុប្បន្ន អ្នកជំងឺត្រូវបានព្យាបាលនិងដាក់ឱ្យសម្រាកដាច់ដោយឡែកនៅមន្ទីរពេទ្យ។
សេចក្តីប្រកាសព័ត៌មានដដែលបន្តថា ក្រសួងសុខាភិបាលកំពុងសហការជាមួយនឹងស្ថាប័នពាក់ព័ន្ធស្រាវជ្រាវរកប្រភពចម្លងជំងឺផ្តាសាយបក្សីនេះទាំងលើសត្វ និងមនុស្ស ដើម្បីទប់ស្កាត់ករណីឆ្លងបន្តក្នុងសហគមន៍ ។ លើសពីនេះក្រសួងក៏បានចែកជូនឱសថតាមីហ្លូ(Tamiflu) ដល់អ្នកប៉ះពាល់ជិតស្និទ្ធ និងធ្វើយុទ្ធនាការអប់រំសុខភាពប្រជាពលរដ្ឋដែលនៅតំបន់នោះផងដែរ។
ក្រសួងសុខាភិបាលបានក្រើនរំលឹកប្រជាពលរដ្ឋទាំងអស់ឲ្យយកចិត្តទុកដាក់ប្រុងប្រយ័ត្នលើជំងឺផ្តាសាយបក្សី ដោយគូសបញ្ជាក់ថា ជំងឺផ្តាសាយបក្សី H5N1នៅតែបន្តគំរាមកំហែងដល់សុខភាពប្រជាពលរដ្ឋ និងកុំឱ្យទៅទីដែលមានមនុស្សច្រើន ប្រសិនបើមានអាការក្តៅខ្លួន ក្អក ហូរសំបោរ ឬ ពិបាកដកដង្ហើម និងមានប្រវត្តិធ្លាប់បានប៉ះពាល់ជាមួយមាន់ទាឈឺ ឬងាប់ក្នុងអំឡុង១៤ថ្ងៃមុនថ្ងៃចាប់ផ្តើមមានរោគសញ្ញា។ នេះបើយោងតាមសេចក្តីប្រកាសដដែល។
ក្រសួងសុខាភិបាលក៏បានណែនាំឱ្យស្វែងរកការពិគ្រោះយោបល់ និងការពិនិត្យព្យាបាលនៅមន្ទីរពេទ្យ ដែលនៅជិតជាបន្ទាន់ ចៀសវាងការពន្យារពេលធ្វើឱ្យប្រឈមនឹងហានិភ័យខ្ពស់ នៃការស្លាប់ជាយថាហេតុ។
កាលពីថ្ងៃទី២៩ ខែមីនា ឆ្នាំ២០២៦ វិទ្យាស្ថានជាតិសុខភាពសាធារណៈបានរកឃើញកុមារាអាយុ៣ឆ្នាំម្នាក់ វិជ្ជមានវីរុសផ្តាសាយបក្សី H5N1 រស់នៅភូមិទំនប់ថ្មី ឃុំបេង ស្រុកបន្ទាយអំពិល ខេត្តឧត្តរមានជ័យ៕