សម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) អំពាវនាវឱ្យប្រជាពលរដ្ឋខ្មែរងាកមកជួយគាំទ្រផលិតផលក្នុងស្រុក ដើម្បីលើកស្ទួយសេដ្ឋកិច្ចជាតិ និងបង្កើនឱកាសការងារកាន់តែច្រើន អំឡុងកម្មវិធីពិព័រណផលិតផលខ្មែរ ឆ្នាំ២០២៥។
អ្នកស្រី ធៀម រិទ្ធីតា ម្ចាស់សហគ្រាស ដាវីល ហ្វាម បានលើកឡើងថា ចាប់តាំងពីបង្កើតផលិតផលតាំងពីឆ្នាំ២០១៧មក នេះជាការចាប់ផ្តើមដំបូងទីហើយ ដែលអ្នកស្រីបានយកផលិតផលរបស់ខ្លួន ដែលរួមមានអាហារសម្ងួត និងគ្រឿងទេស ម្ហូបអាហារ មកចូលរួមតាំងពិព័រណ៍ក្នុងកម្មវិធីនេះ។
អ្នកស្រីនិយាយថា៖ “ផលិតផលរបស់ខ្ញុំហ្នឹង គឺបង្កើតឡើងតាំងពីឆ្នាំ២០១៧ តែខ្ញុំលក់តែក្នុងផេកទេ តែដល់ពេលអ៎ានេះជាលើកទីមួយហើយដែលខ្ញុំមកតាំងពិព័រណ៌នៅកោះពេជ្រនេះ {….} នេះដោយសារឃើញសន្ទុះប្រជាជនយើងហ្នឹងគាំទ្រផលិតផលខ្មែរច្រើន អញ្ចឹងដូចថាជម្រុញទឹកចិត្តខ្ញុំឱ្យមកតាំងពិព័រណ៌នេះ ដើម្បីឱ្យគេស្គាល់ច្រើនដូចគ្នា” ។
អ្នករៀបចំកម្មវិធី ឱ្យដឹងថាពិពណ៌ផលិតផលនេះធ្វើឡើងក្រោមប្រធានបទ “ពង្រឹង និងពង្រីក សមត្ថភាពផលិតក្នុងស្រុក ”។ គោលបំណងសំខាន់គឺដើម្បីពង្រឹង និងពង្រីកផលិតផលខ្មែរនៅក្នុងស្រុក ដោយតាំងបង្ហាញឱ្យមហាជនទូទៅបានឃើញផលិតផលរបស់ខ្មែរ។
លោក ឌុកទិត្យ រិទ្ធី ប្រធានទីផ្សារក្រុមហ៊ុន LSV INDUSTRY សម្តែងនូវអារម្មណ៍សប្បាយរីករាយ ដែលក្រសួងបានរៀបចំកម្មវិធីតាំងពិពណ៌នេះឡើង។លោកបន្តថា កម្មវិធីបានផ្តល់ឱកាសឱ្យសហគ្រាស បានដាក់តាំងផលិតផល លក់ និងផ្សព្វផ្សាយពីស្នាដៃដែលកម្ពុជាផលិតបាន។លោកមានក្តីរំពឹងថា ប្រជាជនខ្មែរ នឹងងាកមកគាំទ្រផលិតផលខ្មែរកាន់តែច្រើនជាងមុន។
លោកនិយាយថា៖ “ជាការសំណូមរបស់ខ្ញុំ ទី១ខ្ញុំសូមសំណូមពរដល់បងប្អូនប្រជាពលរដ្ឋយើងជាមុនសិនថា សូមចូលរួមគាំទ្រផលិតផលខ្មែរឱ្យបានគ្រប់គ្នា មិនថា តែប្រភេទអីទេ ឱ្យតែជារបស់ខ្មែរសូមចូលរួមគាំទ្រផលិតផលខ្មែរទាំងអស់គ្នា ហើយទី២ ក៏សូមសំណូមពរដល់ក្រសួងឱ្យលោកមានកម្មវិធីបែបនេះឱ្យបានច្រើន” ។
កម្មវិធីពិពណ៌ផលិតផលខ្មែរឆ្នាំ២០២៥នេះ ត្រូវគេរៀបចំឡើងរយៈពេល៣ថ្ងៃ ដោយគិតចាប់ពីថ្ងៃទី១១ និងបញ្ចប់ទៅវិញនៅថ្ងៃទី១៣ ខែកញ្ញា។ប្រធានរដ្ឋបាលនៃសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) កញ្ញា ផាន់ ស្រីណេត និយាយថា ក្នុងអំឡុងពេល ពលរដ្ឋកម្ពុជាអាចមកទស្សនាដោយសេរីភាព ចាប់ពីម៉ោង៨ព្រឹក រហូតដល់ម៉ោង៨យប់។បើទោះជាបែបណា មានសហគ្រាសជាង ៣០០បានដាក់តាំងបង្ហាញផលិតផលជាង៣០០ប្រភេទ រួមមាន សម្ភារៈប្រើប្រាស់ប្រចាំថ្ងៃ អាហារ ភេសជ្ជៈ សម្លៀកបំពាក់ វត្ថុអនុសាវរី និងផលិតផលជាច្រើនមុខទៀត។
មិនខុសគ្នាទេ លោក អ៊ុន ហៃ ដែលជាបុគ្គលិកទីផ្សារក្រុមហ៊ុន ហេងពីរប្លាស្ទិច ជាក្រុមហ៊ុនផលិតសម្ភារៈប្លាស្ទិក ឱ្យដឹងថាជាង១០ឆ្នាំមកហើយ ដែលក្រុមហ៊ុនរបស់លោកបានបើកដំណើរការ។ហើយក្នុងរយៈពេលនេះ ក្រុមរបស់ខ្លួនផលិតបានសម្ភារៈជាង៥០០មុខ។ប៉ុន្តែដោយសារការការផ្សព្វផ្សាយមិនសូវជាបានទូលំទូលាយ។ហេតុនេះ នាំឱ្យព័ត៌មានស្តីពីផលិតផល ក្រុមហ៊ុនរបស់ខ្លួន មិនទទួលបានការគាំទ្រច្រើន។
មិនមែនមានតែលោក អ៊ុន ហៃ ទេដែលយល់ឃើញថាពិពណ៌ផលិតផល ក្នុងស្រុកមួយនេះ មានប្រយោជន៍សម្រាប់សាធារណៈជន អ្នកស្រី កាន់ នីតា ជាបុគ្គលិកផ្នែកលក់របស់សហគ្រាស ជេអឹមអិលអេច ក៏យល់ស្របដែរថា កម្មវិធីនេះពិតជាបានផ្តល់ផលប្រយោជន៍ជាច្រើន ដល់ក្រុមហ៊ុន និងសហគ្រាស ដែលពួកគេអាចផ្សព្វផ្សាយពីផលិតផល និងបញ្ច្រៀបខ្លួនចូលទៅក្នុងទីផ្សារបាន នាពេលអនាគត។
ចំណែកឯ លោក អ៊ួន ព័ន្ធមុន្នីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ថ្លែងនៅក្នុងពិពណ៌នេះ កាលពីថ្ងៃទី១១ កញ្ញថា បច្ចុប្បន្នផលិតផលក្នុងស្រុកមានតម្រូវការកើនឡើង ខណៈពលរដ្ឋកម្ពុជាងាកមកគាំទ្រ និងទទួលស្គាល់ពីគុណភាព នៃផលិតផលក្នុងស្រុក។
លោកមានប្រសាសន៍ថា៖ “បច្ចុប្បន្នការផលិតទំនិញ ដើម្បីបម្រើតម្រូវការក្នុងស្រុក បានចាប់ផ្តើមមាននិន្នាការកើនឡើងគួរឱ្យកត់សម្គាល់ ខណៈដែលក្រុមហ៊ុនឬសហគ្រាសក្នុងស្រុក ក៏កាន់តែមានមូលដ្ឋានរឹងមាំជាងមុន ស្របពេលដែលប្រជាជនកម្ពុជា ក៏ចាប់ផ្តើមផ្តល់តម្លៃលើផលិតផលក្នុងស្រុក ខ្ពស់ជាងផលិតផលនាំចូលពីបរទេស ” ។
គេសង្កេតឃើញថា ការតាំងពិពណ៌ នៅឆ្នាំនេះ ហាក់មានការចូលរួមច្រើនជាងឆ្នាំមុនៗ ទាំងក្រុមហ៊ុន សហគ្រាស និងអ្នកចូលរួម។មានផលិតផលជាច្រើនមុខ ត្រូវគេដាក់តាំងតម្រៀបជាផ្នែកៗ និងមានសោភណ្ឌភាពគួរឱ្យទាក់ទាញ។ក្រៅពីផលិតផ្នែកសំណង់ និងបច្ចេកវិទ្យាហើយ វិស័យកសិកម្ម ក៏មានវត្តមាននៅក្នុងពិពណ៌នេះដូចគ្នាដែរ មានដូចជា ម្សៅចេក ម្សៅរមៀត ប្រេងល្ងខ្មៅ ម្សៅខ្ញី ម្សៅមើមយិនសឺន ម្សៅរំដេង និងខ្ញីខ្មៅជាដើម។
អត្ថបទដោយ ញ៉ឹប ពិសាល ទ្រី លាងគ្រី និង ភាព ម៉ារ៉ាឌី