អាជ្ញាធរកម្ពុជាដាក់លិខិតតវ៉ា បន្ទាប់ពីរដ្ឋបាលខេត្តស្រះកែវរបស់ថៃប្រកាសអនុវត្តច្បាប់ក្នុងស្រុកលើពលរដ្ឋកម្ពុជាដែលរស់នៅក្នុងភូមិជោគជ័យនិងភូមិព្រៃចាន់ ខេត្តបន្ទាយមានជ័យ ប្រសិនបើពួកគេមិនចាកចេញក្នុងរយៈពេល១៥ថ្ងៃ។
នៅក្នុងលិខិតផ្លូវការមួយគោរពជូនអភិបាលខេត្តស្រះកែវចុះថ្ងៃទី២៨ ខែកញ្ញា ឆ្នាំ២០២៥ រដ្ឋបាលខេត្តបន្ទាយមានជ័យអះអាងថា សកម្មភាពនៃការលើកបដារបស់រដ្ឋបាលខេត្តស្រះកែវរបស់ថៃ គឺជាការគំរាមកំហែងយ៉ាងធ្ងន់ធ្ងរមកលើសិទ្ធិរបស់ប្រជាពលរដ្ឋស្លូតត្រង់កម្ពុជា ដែលបានកំពុងរស់នៅអាស្រ័យផលក្នុងភូមិទាំងពីរតាំងពីយូរមកហើយមុនពេលមានអនុស្សរណៈនៃការយោគយល់គ្នាស្តីពីការវាស់វែង និងខណ្ឌសីមាព្រំដែនគោកកម្ពុជា-ថៃ (MOU 2000) ចូលជាធរមាន។
លិខិតដដែលនេះក៏បានបញ្ជាក់ផងដែរថា រដ្ឋបាលខេត្តស្រះកែវ “មិនមានសមត្ថកិច្ច” កំណត់ព្រំដែន និងអនុវត្តច្បាប់ក្នុងស្រុករបស់ថៃមកលើសហគមន៍កម្ពុជាដែលបាននិងកំពុងរស់នៅអាស្រ័យផលក្នុងតំបន់មិនទាន់មានការកំណត់ខណ្ឌសីមាព្រំដែនរួចរាល់នោះទេ។
លិខិតរបស់រដ្ឋបាលខេត្តបន្ទាយមានជ័យសរសេរថា “សកម្មភាពឯកតោភាគីដដែលៗខាងលើ គឺជាការបង្កហេតុដែលនាំឱ្យមានភាពតានតឹងកើនឡើងនៅតំបន់ដែលកំពុងមានជម្លោះ និងជាការបំពានលើកិច្ចព្រមព្រៀងបទឈប់បាញ់ ថ្ងៃទី២៨ ខែកក្កដា ឆ្នាំ២០២៥ ” ។
យោងតាមសេចក្តីរាយការណ៍របស់បណ្តាញព័ត៌មានថៃ កាលពីថ្ងៃទី២៨ ខែកញ្ញា បានឱ្យដឹងថា អាជ្ញាធរខេត្តស្រះកែវរបស់ថៃបានលើកបដាចំនួន៦ផ្ទាំង ដោយព្រមានទុកពេលឱ្យអ្នកភូមិកម្ពុជារយៈពេល១៥ថ្ងៃ ដើម្បីចាកចេញពីតំបន់មានជម្លោះខាងលើ ខណៈភាពតានតឹងកើនឡើងនៅតាមព្រំដែនកម្ពុជា-ថៃ។
អភិបាលរងខេត្តបន្ទាយមានជ័យលោក លី សុវណ្ណារិទ្ធបានប្រាប់ Press Start Cambodia នៅថ្ងៃទី២៩ខែកញ្ញាថាភាគីថៃបានតម្លើងផ្លាកបីផ្ទាំងនៅភូមិជោគជ័យនិងពីរផ្ទាំងនៅភូមិព្រៃចាន់ដោយព្រមានប្រជាពលរដ្ឋខ្មែរឱ្យចាកចេញមុនថ្ងៃទី១០ខែតុលាឆ្នាំ២០២៥បើពុំដូច្នេះទេថៃនឹងចាត់វិធានការច្បាប់របស់ថៃលើពលរដ្ឋខ្មែរទាំងនោះ។
លោកមានប្រសាសន៍ថា៖ «អត់ដឹងថា ការឆ្លើយតបរបស់គេយ៉ាងម៉េចផង ព្រោះយើងដាក់ទៅហើយ មិនដឹងគេឆ្លើយតបយ៉ាងម៉េច។ គេអនុវត្តតាមខ្លឹមសារលិខិតយើង ឬក៏គេមិនអនុវត្ត […] រឿងសង្ឃឹមមិនសង្ឃឹមអាហ្នឹងរឿងរបស់គេ ប៉ុន្តែលិខិតរបស់យើងៗត្រូវតែដាក់ ដើម្បីឱ្យដឹងអ្វីជាការព្រួយបារម្ភរបស់យើង»។ លោកបានបន្ថែមថា អាជ្ញាធរកម្ពុជាគ្មានផែនការជម្លៀសពលរដ្ឋខ្មែរចេញពីភូមិរបស់ពួកគាត់ទេ។
ប្រជាពលរដ្ឋរស់នៅភូមិខាងលើបានអះអាងថា ភាគីថៃកំពុងតែបង្កើនសកម្មភាពនាពេលថ្មីៗនេះ ដោយបន្តឈូសឆាយ ចាក់គ្រួសធ្វើផ្លូវ និងលើកបដាកំណត់ឱសានវាទឱ្យពលរដ្ឋខ្មែរចាកចេញដោយពួកគាត់ចាត់ទុកសកម្មភាពរបស់អាជ្ញាធរថៃ គឺជាការគំរាមកំហែងនិងរំលោភលើសិទ្ធិរបស់ពួកគាត់។
លោក ថុង គឹមលាង អាយុ ៥៥ឆ្នាំ ជាពលរដ្ឋរស់នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលមានផ្ទះជាប់នៅម្ខាងនៃបន្លាលួសដែលថៃបានព័ទ្ធយកនោះបាននិយាយថា គ្រួសាររបស់លោកបានរស់នៅភូមិព្រៃចាន់តាំងពីឆ្នាំ១៩៩៤ មកម៉្លេះ។
កសិករ ដែលមានកូន៣នាក់រូបនេះ និយាយថា៖ «អារឿងព្រួយបារម្ភ គឺព្រួយហើយ គ្រាន់តែថា បើយើងព្រួយបារម្ភ យើងភ័យយើងរត់ គឺរឹតតែបានឱកាសគេធ្វើតាមអំពើចិត្ត។ យើងព្រួយបារម្ភ តែយើងត្រៀមការទប់ស្កាត់ដូចគ្នា។ យើងអត់អាចទៅណាឱ្យគេធ្វើតាមអំពើចិត្តគេបានទេ»។
លោកយល់ថា ការព័ទ្ធយកដីពីសំណាក់ទាហានថៃ ការដាក់បន្លាលួស ការរាយកង់ឡាននិងការប្រើរូបភាពគំរាមកំហែងនានាមកដល់ប្រជាពលរដ្ឋខ្មែរ គឺជាការរំលោភសិទ្ធិមនុស្សនិងបូរណភាពទឹកដី។
អ្នកស្រី ហ៊ុល ម៉ាលីស អាយុ៥២ ឆ្នាំ ជាអ្នកភូមិព្រៃចាន់ម្នាក់ទៀតបាននិយាយថា អ្នកស្រីកាន់កាប់ដីទំហំប្រហែល៣ហិកតា ដែលមានផ្ទះនិងចម្ការ ហើយបច្ចុប្បន្នត្រូវទាហានថៃដាក់បន្លាលួសព័ន្ទយក។ អ្នកស្រីបន្តថា មិនអាចចេញចូលបានឡើយ ដោយត្រូវស្នាក់នៅក្នុងតង់នៅក្បែរបន្លាលួសនោះ។
ដោយត្អូញត្អែរអំពីការខកខានមិនបានប្រកបការងារនិងបារម្ភអំពីការគ្មានសមត្ថភាពរកប្រាក់សងបំណុលធនាគារ៤ម៉ឺនដុល្លារ អ្នកស្រី ម៉ាលីស ដែលមានកូនក្នុងបន្ទុកចំនួន៤នាក់ បាននិយាយថា៖ « អារឿងព្រួយបារម្មណ៍ចេះតែព្រួយនឹងឯង។ សំខាន់ខ្លាចបាត់បង់ផ្ទះខ្ញុំនឹងឯង” ។
បើតាមលិខិតរបស់រដ្ឋបាលខេត្តបន្ទាយមានជ័យដដែលនេះ ឱ្យដឹងថា សកម្មភាពរបស់អាជ្ញាធរខេត្តស្រះកែវ គឺជាការបំពានលើកិច្ចព្រមព្រៀងបទឈប់បាញ់ថ្ងៃទី២៨ ខែកក្កដា និងផ្ទុយពីលទ្ធផលនៃកិច្ចប្រជុំគណៈកម្មាធិការព្រំដែនថ្នាក់យោធភូមិភាគ(RBC) និងគណៈកម្មាធិការព្រំដែនទូទៅ (GBC) កាលពីថ្ងៃទី៧ ខែសីហា និងថ្ងៃទី១០ ខែកញ្ញា ឆ្នាំ២០២៥ ដែលភាគីទាំងសងខាងបានឯកភាពទប់ស្កាត់រាល់សកម្មភាពដែលធ្វើឱ្យខូចដល់ការជឿទុកចិត្តគ្នាទៅវិញទៅមក បង្កឱ្យមានការយល់ច្រឡំ និងភាពតានតឹងនៅតាមព្រំដែន។
ជុំវិញបញ្ហានេះ លោកបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជាបានសម្តែងការគាំទ្រដែលរដ្ឋបាលខេត្តបន្ទាយមានជ័យផ្ញើលិខិតតវ៉ាទៅកាន់រដ្ឋបាលខេត្តស្រះកែវនៃប្រទេសថៃ ព្រោះនេះអាចជាឯកសារភស្តុតាងតវ៉ានាពេលខាងមុខ។
លោកមានប្រសាសន៍ថា៖ «យើងត្រូវតែតវ៉ា ពីព្រោះបើយើងមិនតវ៉ា ប្រាកដណាស់ វាជាឯកសារជាភស្តុតាងមួយសម្រាប់ការងារអន្តរជាតិផ្សេងទៀតទៅមុខទៀត។ ឧទាហរណ៍ថា ករណីប្ដឹងផ្ដល់ទៅដល់តុលាការយុត្តិធម៌អន្តរាជាតិ ហើយប្រសិនបើកម្ពុជាគេចូលរំលោភឈ្លានពានមិនតវ៉ា អាជ្ញាធរមិនតវ៉ាមានន័យថា ទទួលស្គាល់ការរំលោភរបស់គេហ្នឹងហើយ»។
កម្លាំងចម្រុះនៃប្រទេសថៃចំនួនប្រហែល៣០០នាក់ ប្រដាប់ដោយអាវុធ ឧបករណ៍ទប់ស្កាត់បាតុកម្ម ជំពាមកៅស៊ូ បានចូលទៅកាន់ភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីនៅថ្ងៃទី១៧ ខែកញ្ញា ឆ្នាំ២០២៥ ដើម្បីរាយបន្លាលួសព័ទ្ធយកដី និងបានបាញ់គ្រាប់កាំភ្លើងជ័រ ឧស្ម័នបង្ហូរទឹកភ្នែក បង្កឱ្យពលរដ្ឋខ្មែរ រងរបួសធ្ងន់ស្រាលសរុបចំនួន២៨នាក់។
កិច្ចប្រជុំរវាងអភិបាលខេត្តបន្ទាយមានជ័យនិងអភិបាលខេត្តស្រះកែវដែលគ្រោងធ្វើថ្ងៃទី២៥ ខែកញ្ញា ឆ្នាំ២០២៥ ដើម្បីពិភាក្សារឿងភូមិព្រៃចាន់ និងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ នៃកម្ពុជា ត្រូវបានលុបចោល ដោយភាគីថៃ។ ដោយឡែកកិច្ចប្រជុំគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) ដែលគ្រោងធ្វើនៅថ្ងៃទី២៧ ខែកញ្ញា ឆ្នាំ២០២៥ រវាងយោធភូមិភាគទី៥កម្ពុជា និងកងទ័ពភូមិភាគទី១ថៃ ក៏ត្រូវបានលើកពេលទៅខែតុលា ឆ្នាំ២០២៥ ដែរ ព្រោះភាគីថៃត្រូវផ្លាស់ប្តូរថ្នាក់ដឹកនាំកងទ័ពភូមិភាគទី១ របស់ខ្លួន។
តាមរយៈសេចក្តីប្រកាសព័ត៌មានរបស់ក្រសួងការពារជាតិ ចេញផ្សាយលើទំព័រហ្វេសប៊ុកក្រសួងកាលពីថ្ងៃទី២៧ ខែកញ្ញា ឆ្នាំ២០២៥ បានឱ្យដឹងថា យោធាថៃបានបាញ់ប្រហារលើទីតាំងកងកម្លាំងកម្ពុជា នៅតំបន់អានសេះ ស្ថិតក្នុងភូមិអានសេះ ឃុំជាំក្សាន្ត ស្រុកជាំក្សាន្ត ខេត្តព្រះវិហារ ចំនួន ២លើក។ ក្រសួងការពារជាតិកម្ពុជាអះអាងថា ភាគីកម្ពុជាមិនបានតបតករណីនេះឡើយ គឺបានប្រកាន់នូវគោលការណ៍អត់ធ្មត់កម្រិតខ្ពស់ និងអនុវត្តនូវកិច្ចព្រមព្រៀងបទឈប់បាញ់រវាងកម្ពុជានិងថៃ ដែលចូលជាធរមាននៅថ្ងៃទី២៨ ខែកក្កដា ឆ្នាំ២០២៥ ឱ្យបានពេញលេញ និងខ្ជាប់ខ្ជួន៕