ក្រសួងពាណិជ្ជកម្មអំពាវនាវឱ្យអ្នកប្រើប្រាស់មានការប្រុងប្រយ័ត្ននិងជ្រើសរើសផលិតផលណា ដែលមានការចុះបញ្ជីស្របច្បាប់និងប្រកបដោយសុវត្ថិភាព បន្ទាប់ពីរកឃើញសារធាតុដែលអាចបង្កគ្រោះថ្នាក់នៅក្នុងផលិតផលបំប៉នសុខភាពនិងគ្រឿងសម្អាងរបស់ក្រុមហ៊ុន Love Riya Co. LTD។
កាលពីថ្ងៃទី៤ ខែកញ្ញា ឆ្នាំ២០២៥ ក្រសួងសុខាភិបាលបានប្រកាសថា ខ្លួនបានរកឃើញសារធាតុសកម្មឱសថសម័យ និងសារធាតុគីមីប្រើប្រាស់លើសកម្រិតស្តង់ដានៅក្នុងផលិតផលចំនួន៥មុខ ដែលមិនបានចុះបញ្ជីរបស់អតីតឧកញ៉ា ឆេង ស្រីរ័ត្ន ដែលគេស្គាល់ថា ឡាវ រីយ៉ា និងជាម្ចាស់ក្រុមហ៊ុន Love Riya Co. LTD។ ការរកឃើញនេះ កើតមាន ខណៈពេលតុលាការខេត្តកណ្តាលបានអះអាងថា សំណុំរឿងរបស់លោកស្រី ឡាវ រីយ៉ា ស្ថិតក្នុងដំណាក់កាលស៊ើបសួរនៅឡើយ។
លោកស្រី យក់ សម្បត្តិ អ្នកនាំពាក្យក្រសួងសុខាភិបាល បដិសេធមិនផ្ដល់បទសម្ភាសន៍ ដោយអះអាងថា លោកស្រីជាប់ប្រជុំ។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានប្រាប់ Press Start ថ្មីៗនេះថា បន្ទាប់ពីក្រសួងសុខាភិបាលជូនដំណឹង ខាងក្រសួងពាណិជ្ជកម្មបានយកសំណាកទាំងនោះមកពិសោធន៍បន្ថែមរកឃើញថា ផលិតផលទាំងនេះមានជាតិបារ៉តនិងសារធាតុកាត់ម្យូមលើសកម្រិតហើយសារធាតុទាំងពីរនេះ គឺអាចមានការប៉ះពាល់ដល់សុខភាពស្បែកនិងអាចប៉ះពាល់សុខភាពក្នុងរយៈពេលយូរ។ លោកថា ក្រសួងបានផ្ដល់របាយការណ៍មន្ទីពិសោធន៍នេះ ទៅឱ្យព្រះរាជអាជ្ញា ដើម្បីជាឯកសារសំអាងក្នុងការប្រើប្រាស់តាមនីតិវិធីតុលាការ។
លោក សុវិជាតិ មានប្រសាសន៍ថា៖ «យើងឃើញថា ផលិតផលរបស់លោកស្រី ឡាវ រីយ៉ា មិនមានបិទនូវព័ត៌មានទៅតាមតម្រូវការនៃកិច្ចការច្បាប់កិច្ចការពារអ្នកប្រើប្រាស់ទេ ពីព្រោះកិច្ចការពារអ្នកប្រើប្រាស់ គឺសម្រាប់ផ្ដល់ព័ត៌មានដល់អ្នកប្រើប្រាស់ឱ្យបានដឹងដែលមានសរសេររៀបរាប់ពីសារធាតុ និងព័ត៌មានជាបទដ្ឋានមួយចំនួនទាក់ទងទៅនឹងសុពលភាព ការចុះបញ្ជី និងអាសយដ្ឋានផលិត។ល។»។
លោកកត់សម្គាល់ផងដែរថា ផលិតផលរបស់លោកស្រី ឡាវ រីយ៉ា រួមមាន លេលាប ឈុតត្រាំទឹកដោះគោ ថ្នាំដុសធ្មេញ Foam និង Shower Gel ដែលមិនបានបិទព័ត៌មានឱ្យស្របទៅតាមបទដ្ឋានណែនាំនៃច្បាប់កិច្ចការពារអ្នកប្រើប្រាស់។
លោកបន្តថា អ្នកដែលរកស៊ីអនឡាញ ភាគច្រើនគាត់បានប្រើប្រាស់បណ្ដាញសង្គមសម្រាប់ធ្វើអាជីវកម្មរបស់គាត់ ហើយជារួម ពួកគាត់រកស៊ីក្នុងទម្រង់អាជីវកម្មខ្នាតតូច ដោយលោកច្រានចោលការចោទប្រកាន់ដែលថា មានការយឺតយ៉ាងនៅក្នុងការចាត់វិធានការលើផលិតផលទាំងនេះ ហើយក្រសួងសុខាភិបាលបានត្រួតពិនិត្យជាហូរហែលើផលិតផលទាំងនោះ មិនមែនទើបតែមានបញ្ហានោះទេ។
លោក ប៉ែន សុជាតិ អំពាវនាវឱ្យអ្នកប្រើប្រាស់ទាំងអស់កុំប្រើប្រាស់ផលិតផលណា ដែលមិនបានចុះបញ្ជីកាពីក្រសួងសុខាភិបាល មិនផ្ដល់ព័ត៌មានគ្រប់គ្រាន់ពីសារធាតុដែលមានចែកនៅលើស្រោមសំបកវិចខ្ចប់ ដើម្បីចៀសវាងហានិភ័យដល់សុខភាព និងសុវត្ថិភាពនៅក្នុងការប្រើប្រាស់របស់ខ្លួន។
លោក សូ សារិន ប្រធានលេខាធិការដ្ឋានសាលាដំបូងខេត្តកណ្ដាល លើកឡើងថា នៅពេលនេះ តុលាការនៅមិនទាន់បិទការស៊ើបសួរនៅឡើយទេ ហើយកំពុងបន្តនីតិវិធីស៊ើបសួរ។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជា (CID) និយាយថា សេចក្ដីប្រកាសរបស់ក្រសួងសុខាភិបាល រកឃើញសារធាតុគីមីនៅក្នុងផលិតគ្រឿងសម្អាងរបស់លោកស្រី ឡាវ រីយ៉ា គឺពិតជាល្អ ប៉ុន្តែអ្វីដែលលោកមិនយល់ស្រប គឺការពិសោធន៍នេះមានភាពយឺតយ៉ាវ ខណៈដែលផលិតផលរបស់បុគ្គលម្នាក់នេះ បានចរាចរនៅលើទីផ្សាជាច្រើនឆ្នាំមកហើយ។
លោកបន្តរថា៖ « ក្រសួងសុខាភិបាល និងអាជ្ញាធរដែលពាក់ព័ន្ធត្រូវតែពង្រឹងនូវប្រសិទ្ធភាព និងគុណភាពនៃការងាររបស់ខ្លួន ក្នុងការត្រួតពិនិត្យ និងទប់ស្កាត់ការចរាចរណ៍ទំនិញដែលមានសារធាតុគីមីបង្ករគ្រោះថ្នាក់ដល់ប្រជាពលរដ្ឋយើង»។
យោងតាមសេចក្ដីជូនដំណឹងដដែលរបស់ក្រសួងសុខាភិបាលបានឱ្យដឹងថា នៅក្នុង ចំណោមផលិតផល៥មុខរបស់ ឡាវ រីយ៉ា ដែលបានរកឃើញសារធាតុគីមីរួមមាន ផលិតផលបំប៉នសុខភាពចំនួន ២មុខ និង ផលិតផលគ្រឿងសម្អាងចំនួន ៣មុខ ដែលគ្មានលេខបញ្ជីការ ឬលេខប្រវេទន៍ ពីក្រសួងសុខាភិបាល។
ក្រសួងសុខាភិបាលបន្តថា ក្នុងនោះ ផលិតផលបំប៉នសុខភាពដូចជា ថ្នាំលេបបាត់ជាំ មានលួចដាក់សារធាតុសកម្មឱសថ Tranexamic Acid ដែលគេប្រើប្រាស់សម្រាប់ការឃាត់ឈាមក្រោមការត្រួតពិនិត្យរបស់វេជ្ជបណ្ឌិត ឬគ្រូពេទ្យ។
គ្រឿងសម្អាង Loveriya Double White Body Lotion និង Loveriya ម្សៅលាបមុខព្យាបាលមុន មានផ្ទុកសារធាតុគីមី Salicylic Acid និងបារ៉ត (Mercury) លើសកម្រិតស្ដង់ដាក្នុងមគ្គុទេសគ្រឿងសម្អាងអាស៊ាន។ សារធាតុ Salicylic Acid នេះ ផ្ដល់ផលប៉ះពាល់ទៅដល់សុខភាពដូចជា ស្បែកស្ងួត រលាកស្បែក និងប្រតិកម្មអាល់ឡែស៊ីស្បែក និងបារ៉ត(Mercury) ផ្ដល់ផលប៉ះពាល់ដូចជា ខ្សោយតម្រងនោម មហារីកស្បែក និងប៉ះពាល់ប្រព័ន្ធប្រសាទ។
ការរកឃើញនេះ កើតមាន ខណៈពេលលោកស្រី ឆេង ស្រីរ័ត្ន ហៅ ឡាវ រីយ៉ា កំពុងត្រូវបានឃុំខ្លួនបណ្តោះអាសន្ននៅពន្ធនាគារខេត្តកណ្តាល។
កាលពីថ្ងៃទី១៤ ខែសីហា ឆ្នាំ២០២៥ កម្លាំងសមត្ថកិច្ច នៃស្នងការដ្ឋាននគរបាលខេត្តកណ្តាលបានឃាត់ខ្លួនឧកញ៉ា ឆេង ស្រីរ័ត្ន អាយុ៤០ឆ្នាំ និងបញ្ជូនទៅសាលាដំបូងខេត្តកណ្តាល ហើយនៅថ្ងៃទី១៥ ខែសីហា ចៅក្រមស៊ើបសួរបានសម្រេចឃុំខ្លួនបណ្តោះអាសន្នពីបទ “ញុះញង់ឱ្យមានការរើសអើង និងធ្វើឱ្យខូចទឹកចិត្តកងទ័ព” ដែលតាមចោទថា បានប្រើប្រាស់គណនីតិកតុកកាលពីថ្ងៃទី៦ ខែសីហា និងហ្វេសប៊ុកផ្លូវការរបស់ខ្លួនកាលពីថ្ងៃទី១៣ ខែសីហា បង្ហោះវីដេអូនិងឡាយផ្ទាល់អមដោយខ្លឹមសារ ដែលធ្វើឱ្យមានការរើសអើង ប៉ះពាល់ដល់ទឹកចិត្តកងទ័ព នេះបើតាមសេចក្តីប្រកាសព័ត៌មានរបស់សាលាដំបូងខេត្តកណ្តាល ចុះថ្ងៃទី១៥ ខែសីហា ឆ្នាំ២០២៥។ ឧកញ៉ា ឆេង ស្រីរ័ត្ន ហៅ ឡាវ រីយ៉ា ត្រូវបានបញ្ចប់គោរមងារ ឧកញ៉ា តាមព្រះរាជក្រឹត្យចុះថ្ងៃទី១៩ ខែសីហា ឆ្នាំ២០២៥៕