ព្រះមហាក្សត្រចេញព្រះរាជក្រឹត្យត្រាស់បង្គាប់បញ្ចប់គោរមងារ ឧកញ៉ា ពីឧកញ៉ា ឆេង ស្រីរ័ត្ន ជាអ្នកជំនួញផលិតផលគ្រឿងសម្អាងដ៏ល្បីម្នាក់ បន្ទាប់ពីតុលាការសម្រេចឃុំខ្លួនបណ្តោះអាសន្ន ដែលតាមចោទថា បានធ្វើឱ្យមានការរើសអើង និងប៉ះពាល់ដល់ទឹកចិត្តកងទ័ព។
ឧកញ៉ា ឆេង ស្រីរ័ត្ន ដែលគេស្គាល់ថា Love Riya ត្រូវបានបញ្ចប់គោរមងារ ឧកញ៉ា តាមព្រះរាជក្រឹត្យចុះថ្ងៃទី១៩ ខែសីហា ឆ្នាំ២០២៥ ដែលត្រូវបានផ្សព្វផ្សាយជាទូទៅនៅលើបណ្តាញព័ត៌មានថ្មីៗនេះ។ ការបញ្ចប់គោរមងារនេះ ធ្វើឡើងតាមសេចក្តីក្រាបបង្គំទូលថ្វាយរបស់លោកនាយករដ្ឋមន្ត្រី ហ៊ុន ម៉ាណែត។
កាលពីថ្ងៃទី១៤ ខែសីហា ឆ្នាំ២០២៥ កម្លាំងសមត្ថកិច្ច នៃស្នងការដ្ឋាននគរបាលខេត្តកណ្តាលបានឃាត់ខ្លួនឧកញ៉ា ឆេង ស្រីរ័ត្ន អាយុ៤០ឆ្នាំ និងបញ្ជូនទៅសាលាដំបូងខេត្តកណ្តាល ហើយនៅថ្ងៃទី១៥ ខែសីហា ចៅក្រមស៊ើបសួរបានសម្រេចឃុំខ្លួនបណ្តោះអាសន្នពីបទ “ញុះញង់ឱ្យមានការរើសអើង និងធ្វើឱ្យខូចទឹកចិត្តកងទ័ព” ដែលតាមចោទថា បានប្រើប្រាស់គណនីតិកតុកកាលពីថ្ងៃទី៦ ខែសីហា និងហ្វេសប៊ុកផ្លូវការរបស់ខ្លួនកាលពីថ្ងៃទី១៣ ខែសីហា បង្ហោះវីដេអូនិងឡាយផ្ទាល់អមដោយខ្លឹមសារ ដែលធ្វើឱ្យមានការរើសអើង ប៉ះពាល់ដល់ទឹកចិត្តកងទ័ព នេះបើតាមសេចក្តីប្រកាសព័ត៌មានរបស់សាលាដំបូងខេត្តកណ្តាល ចុះថ្ងៃទី១៥ ខែសីហា ឆ្នាំ២០២៥។
ជុំវិញករណីនេះដែរ កាលពីថ្ងៃទី២០ ខែសីហា លោក ឈឿន សុចិត្ត ស្នងការនគរបាលខេត្តកណ្តាល បានបង្ហោះសារនៅលើហ្វេសប៊ុករបស់លោកថា មានផលិតផល៤ប្រភេទក្នុងចំណោមផលិតផលផ្សេងៗទៀត ដែលឡាយលក់កន្លងមក ត្រូវបានយកពិសោធន៍និងធ្វើតេស្តរកឃើញសារធាតុហាមឃាត់លើសពីច្បាប់អនុញ្ញាត ធ្វើឱ្យប៉ះពាល់សុខភាពដល់អ្នកប្រើប្រាស់។
បើតាមលោកស្នងការបានឱ្យដឹងថា មានសារធាតុ ២ប្រភេទ ដែលរកឃើញនៅក្នុងផលិតផលរបស់ឧកញ៉ា ឆេង ស្រីរ័ត្ន គឺសារធាតុMercury (បារត) និងសារធាតុ cadmium ដែលអាចបង្កផលប៉ះពាល់សុខភាពធ្ងន់ធ្ងរដូចជា ខូចតម្រងនោម ប្រព័ន្ធប្រសាទ ប្រព័ន្ធដង្ហើម ពោះវៀន ស្ពោតឆ្អឹង ប្រតិកម្មឬរលាកស្បែក បង្កជាជំងឺមហារីកថ្លើម និងប៉ះពាល់ចំពោះស្ត្រីមានផ្ទៃពោះផងដែរ៕
អត្ថបទដោយ លន ម៉ាលី