អ្នកឧកញ៉ា វេជ្ជបណ្ឌិត គួច ម៉េងលី គឺជាស្ថាបនិកប្រធានក្រុមប្រឹក្សាសុខាភិបាល និងអគ្គនាយកប្រត្តិបត្តិនៃក្រុមហ៊ុន ម៉េងលី ជេ.គួច អេឌ្យូខេសិន (Mengly J. Quach Education) ដែលរួមមាន វិទ្យាស្ថាន អេអាយ អាយ (AII) និងសាលារៀន អន្តរទ្វីប អាមេរិកាំង (AIS) ។ លោក កើតនៅថ្ងៃទី២៥ ខែមីនា ឆ្នាំ ១៩៦៩ ខេត្តបាត់ដំបង ដែលមានឈ្មោះពីកំណើតថា ចាន់ឌី ។ភរិយារបស់លោក គឺលោកជំទាវ អ៊ឹង លីហុង ហើយបច្ចុប្បន្ននេះ លោកមានកូនស្រីចំនួនពីរនាក់ ។
មុននឹងខ្សែជីវិតលោកទទួលបានជោគជ័យក្លាយជាឧកញ៉ាដ៏ល្បីល្បាញ និងមានទ្រព្យសម្បត្តិដូចសព្វថ្ងៃនេះ គឺកើតចេញពីការតស៊ូ ពីគំនរសំរាម ក្មេងដើរសុំអាហារគេហូប ដើររើសសម្ភារៈគេបោះចោលយកទៅប្រើប្រាស់ ដើរកាប់ជន្លេនលក់ និងជាកម្មកររោងចក្រជាដើម ។
នៅពេលលោកមានវ័យប្រមាណជា៥ឆ្នាំ លោកជាកុមារមួយរូបបានឆ្លង ក្នុងរបបកម្ពុជាប្រជាធិបតេយ្យ (ខ្មែរក្រហម) ហើយក្នុងឆ្នាំ ១៩៧៩ លោកនិងក្រុមគ្រួសារបានភៀសខ្លួនទៅកាន់ជំរំណងចាន់ ក្នុងប្រទេសថៃ។លោកមានវាសនាអាចរស់រាន មានជីវិតពីជំរុំភៀសខ្លួនណងចាន់ ហើយបានធ្វើមាតុភូមិនិវត្តន៍ជាមួយគ្រួសាររបស់លោក ត្រឡប់មកកាន់ខេត្តបាត់ដំបងវិញ និងប្រកបមុខរបរលក់ដូរ និងធ្វើស្រែធម្មតា ។ ប៉ុន្តែក្នុងគ្រានេះលោកមិនបានបោះបង់មហិច្ឆតារបស់ខ្លួនដើម្បីទៅប្រទេសទី៣នោះទេ ទើបក្នុងកំឡុងឆ្នាំ ១៩៨១ ដល់ ១៩៨២ លោកបានត្រូវភៀសខ្លួនម្ដងទៀត ប៉ុន្តែត្រូវចាញ់បោកមេខ្យល់។បើទោះជាបែបណា នៅនាទីចុងក្រោយ រូបលោកអាចបន្តជំនះឧបសគ្គ រហូតបានឆ្លងផុតរនាំងជីវិត ទៅរស់នៅក្នុងជំរំជាថ្មី ប៉ុន្តែមិនមែនជាជំរំ ដែល ម៉េងលី ធ្លាប់រស់នៅកាលពីវ័យកុមារភាពនោះទេ។តាមពិតទៅទ្រំនំដែលក្រុមគ្រួសាររបស់លោកផ្ញើជីវិតរសាត់អណ្តែតម្តងទៀតនោះ គឺជាជំរំខាវអ៊ីដាងវិញម្តង។
ទីនេះហើយដែលអាចចាត់ទុកថា គឺដើមចមចុងក្រោយ ដែលជួយផ្លាស់ប្តូរវាសនារបស់លោក។ក្រោយរស់នៅក្នុងជំរំនេះបានប្រមាណជាង១ឆ្នាំ គេក៏បានរៀបចំរូបលោក និងគ្រួសារទៅកាន់ប្រទេសទី២ ក្រោមគោលនយោបាយជនភៀសសឹកដោយសង្រ្គាម។ការផ្ទេរបន្តលើកនេះ គឺគេបានបញ្ជូនរូបលោក និងក្រុមគ្រួសារទៅសំចតនៅក្នុងជំរំរង់ចាំ គឺនៅប្រទេសហ្វីលីពីន។ ស្នាក់នៅក្នុងជំរំហ្វីលីពីន ប្រមាណចន្លោះពី៧ ទៅ៩ខែ ទើបត្រូវគេបន្តឱ្យចាកចេញទៅប្រទេសទី៣ និងបានទៅដល់សហរដ្ឋអាមេរិកក្នុងអំឡុងខែមេសា ឆ្នាំ១៩៨៤ ។
បើទោះបីជាបានទៅដល់ទឹកដីនៃក្ដីស្រមៃរបស់លោកក៏ពិតមែន ប៉ុន្តែជីវិតហាក់បីដូចជាមិនទាន់មានពន្លឺនៅឡើយទេ ដោយសាររនាំងនៃភាសា យុវជន គួច ម៉េងលី នៅតែជួបបញ្ហាមិនខុសពីពលរដ្ឋកម្ពុជាដទៃទៀតប៉ុន្មាននោះឡើយ។មួយវិញទៀត ក្នុងស្ថានភាពដ៏លំបាកនេះ គ្រួសាររបស់លោកត្រូវធ្វើការឱ្យគេដើម្បីបានកម្រៃសម្រាប់ដោះស្រាយជីវភាពប្រចាំថ្ងៃ នៅលើទឹកដីថ្មីនេះ។
ក្រោយពីតស៊ូ អត់ធ្មត់ និងពុះពារនូវរាល់ឧបសគ្គទាំងនេះ លោកបានបញ្ចប់ថ្នាក់វិទ្យាល័យនៅ Belmont, Los Angeles, California ក្រោយមកលោកក៏បានបញ្ចប់ការសិក្សាដោយជោគជ័យនៅសាកលវិទ្យាល័យ California, Berkeley សហរដ្ឋអាមេរិក ផ្នែក Pre-Med Studies នៅឆ្នាំ១៩៩១ ។ បន្ទាប់ពីទទួលសញ្ញាបត្រនេះហើយ លោកមិនបានបញ្ឈប់ការសិក្សាត្រឹមនេះឡើយ គឺបន្តសិក្សាផ្នែកវេជ្ជសាស្ត្របន្តទៀត ហើយលោក លោកបានបញ្ចប់ការសិក្សាពីសាកលវិទ្យាល័យ Spartan Health Scinces នៃរដ្ឋ New Mexico សហរដ្ឋអាមេរិក នៅឆ្នាំ១៩៩៨ ដោយទទួលបានសញ្ញាបត្រវេជ្ជបណ្ឌិតផ្នែកវេជ្ជសាស្ត្រទូទៅ ។ លោកបានបន្តអាជីព ដោយបានចូលធ្វើជាសាស្ត្រាចារ្យ ផ្នែកវិទ្យាសាស្ត្រ បង្រៀននៅដេប៉ាតឺម៉ង់វិទ្យាសាស្ត្ររូបរាងកាយ និងជីវិត នៃមហាវិទ្យាល័យ Cleveland Chiropractic នៅក្រុង Los Angeles រដ្ឋ California អស់មួយរយៈពេល មុននឹងលោកត្រឡប់មកកាន់ប្រទេសកម្ពុជានៅឆ្នាំ២០០២ ។
នៅឆ្នាំ២០០៧ លោកទទួលបានសញ្ញាបត្រអនុបណ្ឌិតបន្ថែមទៀត ផ្នែកសុខភាពសាធារណៈ ពីសាកលវិទ្យាល័យ Massachusetts Amherst ទីក្រុង Amherst នៃរដ្ឋ Massachusetts សហរដ្ឋអាមេរិក។បន្ទាប់ពីឃ្លាតឆ្ងាយពីស្រុកកំណើត អស់ពេលជាច្រើនឆ្នាំ លោកវេជ្ជបណ្ឌិត គួច ម៉េងលី បានមកជាន់ដីខ្មែរជាលើកដំបូងក្នុងឆ្នាំ២០០២ ក្នុងនាមជាពេទ្យស្ម័គ្រចិត្ត ក្រោមអង្គការពេទ្យស្ម័គ្រចិត្តរបស់អាមេរិក។មុននឹងសម្រេចបោះទុនជាច្រើនម៉ឺនដុល្លារ ចូលទៅក្នុងវិស័យអប់រំ អំឡុងឆ្នាំ២០០៥ គឺផ្តើមចេញពីការងារជាគ្រូពេទ្យបង្រៀនស្ម័គ្រចិត្ត។ផ្តើមចេញពីកិច្ចការទាំងនេះ ដែលនាំឲ្យលោក គួច ម៉េងលី មានអ្វីៗគ្រប់យ៉ាង ដូចសព្វថ្ងៃនេះ។
អាជីវកម្មសាលារៀននេះ បានផុសនៅក្នុងផ្នត់គំនិតរបស់លោកដោយចិត្តស្រលាញ់ចូលចិត្តផ្ទាល់ និងមួយផ្នែកដោយផ្នែកលើបទពិសោធន៍គ្រូបង្រៀនជាច្រើនឆ្នាំនៅអាមេរិក និងក្នុងប្រទេសកំណើតផ្ទាល់ផងដែរ។
លោកបន្តថា៖ «សាលានេះបើកឡើងដោយសារចំណង់ចំណូលចិត្ត បទពិសោធន៍ និងជំនាញទើបអាចបើកបាន» ។
បន្ទាប់ពីការបើកសាលាបង្រៀន AII និងAISលោកមិនដែលបោះបង់ជំនាញវិជ្ជាជីវៈ ជាវេជ្ជបណ្ឌិតឡើយ។ ដោយលោកបានភ្ជាប់គំនិតសាលា១គ្លីនិក១ នៅជាមួយសាលាផ្ទាល់តែម្តង ដែលបច្ចុប្បន្ននេះមានគ្លីនិក១៤ កន្លែង នៅគ្រប់សាខាសាលាទាំង១៤ទីតាំង។ គ្លីនិកទាំង១៤ទីតាំងនោះ គឺបើកព្យាបាលដោយឥតគិតថ្លៃ ដោយមិនបានបង្កើតឡើងដើម្បីរកប្រាក់ចំណេញនោះឡើយដែលមានរូបលោកជាអ្នកដឹកនាំ និងជាអ្នកព្យាបាលផ្ទាល់រួមជាមួយបុគ្គលិកពេទ្យជាច្រើនអ្នកទៀត។
មកដល់បច្ចុប្បន្ន អាជីវកម្មសាលារបស់លោកបានចុះក្នុងផ្សារភាគហ៊ុននៅកម្ពុជាបានជោគជ័យ ដោយលោកកាន់កាប់ភាគហ៊ុនសរុបរហូតដល់ទៅហុកសិបភាគរយ ដែលមួយឆ្នាំៗអាចរកចំណូលបានរហូតដល់ជិតសែសិបបួនលានដុល្លារ និងទទួលប្រាក់ចំណេញសុទ្ធរហូតដល់៨លានដុល្លារ ហើយជាសាលាមួយដែលមានការទទួលស្គាល់គុណភាពពីសាធារណជនក្នុងចំណោមសាលាល្បីៗក្នុងប្រទេសថែមទៀតផង។
ស្របពេលលោកវេជ្ជបណ្ឌិត គួច ម៉េងលី ទទួលបានជោគជ័យ លោកក៏បានបង្កើតជាអាហារូបករណ៍រាប់រយកន្លែងរៀងរាល់ឆ្នាំសម្រាប់កូនៗដែលជាអ្នកបម្រើការឲ្យសាលារបស់លោក។ក្រៅពីនេះនៅមាន អាហារូបករណ៍លោក ហ៊ុន សែន អាហារូបករណ៍លោក សុខអាន និងមូលនិធិផ្ទាល់ខ្លួនជួយអ្នកខ្វះខាត ដែលអាចសរុបជាទឹកប្រាក់ប្រហែលខ្ទង់សិបម៉ឺនដុល្លាររួចទៅហើយ។ទស្សនវិស័យរបស់លោកលើវិស័យអប់រំ គឺបានគិតវែងឆ្ងាយក្នុងការចូលរួមជាផ្នែកមួយ ក្នុងការបណ្តុះបណ្តាលយុវជនកម្ពុជាដើម្បីអភិវឌ្ឍន៍ប្រទេស។
បើតាមលោក វេជ្ជណ្ឌិត គួច ម៉េងលី ការឆ្លងកាត់របបខ្មែរក្រហម សំឡេងទួញសោកអត់បាយហូប រហូតដល់ពេលគេជម្លៀសទៅជំរំនៅថៃ គេបង្អត់ និងកាត់បន្ថយអាហារ រហូតដល់ពេលថៃដេញជម្លៀសមកខ្មែរវិញ នៅភ្នំដងរែក ដែលជាទីតាំងដែលវេទនាហួសថ្លែង រហូតលោកបានសរសេជាសៀវភៅមួយមានចំណងជើងថា «ទីដែលមិន អាចបំភ្លេចបាន » ដែលរៀបរាប់ពីភាពលំបាកវេទនា ហើយជាទីដែលលោកធ្លាប់ហូរទឹកភ្នែកដក់ជាប់ក្បែរសាកសព ជាអ្វីដែលលោកមិនអាចបំភ្លេចបាន។
ភាពខ្វះខាត ការគ្មានបាយហូប វេទនាគ្មានលុយ និងគេមើលងាយ ជាកម្លាំងចិត្តដែលជំរុញលោក ឲ្យសម្រេចគោលដៅដែលឈានទៅរកភាពជោគជ័យមកដល់បច្ចុប្បន្ន ។ រាល់ពេលមានការលំបាក លោកតែងតែគិតការលំបាកពីមុន បូករួមនឹងគោលដៅអ្វីដែលលោកចង់បាន ទើបលោកអាចបន្តការងារ និងផ្តោតដើម្បីងើបឡើងវិញ៕
អត្ថបទ៖ គង់ សុខណា ធួន ស្រីពៅ តែម ស្រីណុច ស៊ន មេសា គាម សោភ័ណ