លោក ហ៊ុន សែន ប្រធានព្រឹទ្ធសភា ស្នើឱ្យចាត់វិធានការម៉ឺងម៉ាត់ទៅលើបុគ្គលទាំងឡាយណា ដែលជេរប្រមាថលើបណ្តាញសង្គម ដែលធ្វើប៉ះពាល់ដល់សីលធម៌សង្គមកម្ពុជា។
ថ្លែងក្នុងជំនួបជាមួយប្រតិភូក្រុមប្រឹក្សាជាតិកម្ពុជាដើម្បីស្ត្រីកាលពីព្រឹកថ្ងៃទី១៤ ខែសីហា ឆ្នាំ២០២៦ លោក ហ៊ុន សែន ប្រធានព្រឹទ្ធសភា មានប្រសាសន៍ថា ការជេរប្រមាថបែបនេះប៉ះពាល់ធ្ងន់ធ្ងរដល់តម្លៃសង្គម និងសេចក្តីថ្លៃថ្នូររបស់ជាតិ ដោយលោកបានស្នើឱ្យស្ថាប័នពាក់ព័ន្ធរួមគ្នាចាត់វិធានការម៉ឺងម៉ាត់ក្នុងនោះ ក្រសួងកិច្ចការនារី ត្រូវនាំមុខគេក្នុងការចាត់វិធានការដាក់បណ្តឹង ខណៈស្ថាប័នត្រូវជួយចាត់ចែងលើសំណុំរឿងនៃអ្នកទាំងឡាយ ដែលបានបំផ្លាញសេចក្តីថ្លៃថ្នូរនិងសីលធម៌តាមបណ្តាញសង្គម។
លោក ហ៊ុន សែន មានប្រសាសន៍ថា៖ “ឥឡូវ លើកទី១ ធ្វើកិច្ចសន្យា បើសិនមិនរៀងចាលចាត់ការតាមផ្លូវច្បាប់។ ខ្ញុំធ្លាប់និយាយ ខ្ញុំអាច ខ្ញុំហ៊ានកម្ចាត់មនុស្សខ្លះចោល ដើម្បីការពារមនុស្សរាប់លាននាក់ មិនមែនកម្ចាត់តាមរយៈការសម្លាប់ចោលទេ ប៉ុន្ដែយើងហ៊ានធ្វើជាមួយមនុស្សប៉ុន្មាននាក់ ដើម្បីការពារមនុស្សរាប់លាននាក់ នេះជាបញ្ហាសង្គមស្អប់ខ្ពើម។ នេះមិនមែនជាការបិទសិទ្ធិ ប៉ុន្ដែជាការការពារជាតិ សេចក្ដីថ្លៃថ្នូររបស់ជាតិ ការជេរបញ្ចោរមិនមែនខ្មែរ គឺជាទមិ្មឡ ”។
ប្រតិកម្មរបស់លោក ហ៊ុន សែន ធ្វើឡើង ក្រោយមានការចែករំលែកសំឡេងសន្ទនាគ្នានាពេលថ្មីៗនេះ រវាងអ្នកលក់ទូរសព្ទ និងអ្នកទិញដែលជាកងទ័ពជួរមុខនៅតាមបណ្តាញសង្គម ហើយអ្នកលក់ទូរសព្ទរូបនោះ បានប្រើពាក្យសម្តីមិនសមរម្យ និងជេរប្រមាថទៅលើអ្នកទិញ។
នៅថ្ងៃទី១៣ ខែសីហា ឆ្នាំ២០២៦ នគរបាលព្រហ្មទណ្ឌកម្រិតស្រាលរាជធានីភ្នំពេញសហការជាមួយកម្លាំងអធិការដ្ឋាននគរបាលខណ្ឌដង្កោបានចុះឃាត់ខ្លួនស្ត្រីម្នាក់ឈ្មោះ ចិន្តា សុវណ្ណារី ជាម្ចាស់ហាងទូរសព្ទ ជុំវិញការចោទប្រកាន់ថា “ធ្វើឱ្យខូចទឹកចិត្តកងទ័ព”។
ជុំវិញករណីនេះដែរ នៅថ្ងៃទី១៤ ខែសីហា ឆ្នាំ២០២៦ សាលាដំបូងរាជធានីភ្នំពេញបានសម្រេចឃុំខ្លួនបណ្តោះអាសន្នជនត្រូវចោទឈ្មោះ ចិន្តា សុវណ្ណារី អាយុ៣១ឆ្នាំ ដើម្បីបន្តការស៊ើបសួរតាមនីតិវិធីច្បាប់។ ជនត្រូវចោទរូបនេះ ដែលជាម្ចាស់ផេកហ្វេសប៊ុកឈ្មោះ Mr.8 Gaming ត្រូវបានចោទប្រកាន់ពីបទ ធ្វើឱ្យខូចទឹកចិត្តកងទ័ព និងប្រមាថចំពោះអ្នករាជការសាធារណៈ៕
អត្ថបទដោយ៖ ធី វណ្ណា