អាជ្ញាធរខេត្តកំពង់ឆ្នាំងសម្រេចបង្កើតក្រុមការងារចំពោះកិច្ចមួយ ដើម្បីត្រួតពិនិត្យគម្រោងមូលនិធិឃុំសង្កាត់នៅក្នុងខេត្តកំពង់ឆ្នាំងទាំងមូលនិងភាពមិនប្រក្រតី នៃការអនុវត្តគម្រោងមូលនិធិឃុំចំនួន៦ បន្ទាប់ពីក្រសួងមហាផ្ទៃរកឃើញភាពមិនប្រក្រតី នៃដំណើរការរៀបចំនិងអនុវត្តមូលនិធិឃុំសង្កាត់ក្នុងខេត្តនេះ។
នៅថ្ងៃទី១៣ ខែសីហា ឆ្នាំ២០២៦នេះ លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានចេញលិខិតបង្គាប់ការចាត់តាំងក្រុមការងារចំពោះកិច្ច ដែលមានសមាសភាពចំនួន១៤រូប ហើយក្រុមការងារនេះ មានភារកិច្ចចុះពិនិត្យ និងស្រាជ្រាវអំពីការអនុវត្តគម្រោងមូលនិធិឃុំទឹកហូតនៃស្រុករលាប្អៀរ ឃុំមេលំនៃស្រុកបរិបូណ៌ ឃុំចោងម៉ោង នៃស្រុកទឹកផុស ឃុំសេដ្ឋី នៃស្រុកសាមគ្គីមានជ័យ ឃុំលង្វែក នៃស្រុកកំពង់ត្រ ឡាច និងគម្រោងមូលនិធិឃុំ សង្កាត់នៅទូទាំងខេត្តកំពង់ឆ្នាំង។
លិខិតបង្គាប់ការដដែលបញ្ជាក់ទៀតថា ក្រុមការងារចំពោះកិច្ចនេះនឹងត្រួតពិនិត្យការអនុវត្តតួនាទីនិងភារ កិច្ចរបស់មន្ត្រីរាជការ សមាជិកក្រុមប្រឹក្សាស្មៀនឃុំ សង្កាត់ឬអ្នកទទួលការងារអនុវត្តគម្រោងមូលនិធិឃុំ សង្កាត់ ប្រមូលព័ត៌មាននិងធ្វើរបាយការណ៍អំពីលទ្ធផលជូនក្រសួងមហាផ្ទៃ។
ជុំវិញភាពមិនប្រក្រតីនៃការអនុវត្តគម្រោងមូលនិធិឃុំ សង្កាត់នេះដែរ នៅថ្ងៃទី១២ ខែសីហា អភិបាលខេត្តកំពង់ឆ្នាំងបានចាត់វិធានការដាច់ដោយឡែកមួយទៀតដោយចេញដីកាបញ្ចប់មុខតំណែងមន្ត្រីសាលាខេត្តចំនួន២រូប គឺលោក ហង្ស ពិសី ពីនាយកទីចាត់ការផែនការ និងវិនិយោគសាលាខេត្ត និងលោក វ៉ាន់ ថេន ពីនាយកទីចាត់ការអន្តរវិស័យសាលាខេត្ត មកជាមន្ត្រីការិយាល័យគ្រប់គ្រងបុគ្គលិក នៃទីចាត់ការគ្រប់គ្រងធនធានមនុស្សសាលាខេត្តកំពង់ឆ្នាំងដូចគ្នា។
ចំណាត់ការខាងលើនេះ ធ្វើឡើងក្រោយពីលោកនាយករដ្ឋមន្ត្រី ហ៊ុន ម៉ាណែត បានបញ្ជាឱ្យអាជ្ញាធរខេត្តពិនិត្យមើលភាពមិនប្រក្រតី នៃការអនុវត្តគម្រោងមូលនិធិនេះ អំឡុងពេលលោកថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការនូវសមិទ្ធផលនានា នៅក្រុងស្ទឹងត្រែង ខេត្តស្ទឹងត្រែង កាលពីព្រឹកថ្ងៃពុធ និងបន្ទាប់ពីការរកឃើញរបស់ក្រសួងមហាផ្ទៃអំពីភាពមិនប្រក្រតីនៅក្នុងការអនុវត្តគម្រោងមូលនិធិរបស់រដ្ឋបាលឃុំចំនួន៥ នៃខេត្តកំពង់ឆ្នាំង ក្នុងនោះក៏មានរដ្ឋបាលឃុំទឹកហូត ស្រុករលាប្អៀរផងដែរ។
តាមរយៈសេចក្តីប្រកាសព័ត៌មានចុះថ្ងៃទី១២ ខែសីហា ក្រសួងមហាផ្ទៃក៏បានស្នើឱ្យរដ្ឋបាលខេត្តកំពង់ឆ្នាំងចាត់វិធានការជាបន្ទាន់លើមន្ត្រីពាក់ព័ន្ធក្នុងការរៀបចំ និងអនុវត្តគម្រោងមិនបានត្រឹមត្រូវ និងចាត់វិធានការវិន័យឬទណ្ឌកម្មម៉ឺងម៉ាត់បំផុតតាមច្បាប់ និងលិខិតបទដ្ឋានគតិយុត្តជាធរមាន។
គួររំឭកថា កាលពីពេលថ្មីៗនេះ មានការរិះគន់ពីសាធារណជនជាច្រើន បន្ទាប់ពីមានការផ្សព្វផ្សាយតាមបណ្តាញសង្គមពាក់ព័ន្ធនឹងភាពមិនប្រក្រតីនៃការរៀបចំនិងអនុវត្តគម្រោងមូលនិធិរបស់រដ្ឋបាលឃុំទឹកហូត ស្រុករលាប្អៀរ ខេត្តកំពុងឆ្នាំង ដែលក្នុងនោះ មានការចោទប្រកាន់ថា បង្គោលបំពាក់អំពូលសូឡា១ដើម មានតម្លៃរហូតដល់៨លានរៀល៕
អត្ថបទដោយ៖ គាម សោភណ្ឌ