លោកនាយករដ្ឋមន្ត្រី ហ៊ុន ម៉ាណែត ណែនាំឱ្យក្រសួង និងស្ថាប័នពាក់ព័ន្ធសហការគ្នាត្រៀមនូវមធ្យោបាយចាំបាច់ ដើម្បីឆ្លើយតបទៅនឹងបាតុភូតធម្មជាតិអែលនីញ៉ូ ដែលបង្កឱ្យមានស៊ីតុណ្ហភាពក្តៅខ្លាំង និងគ្រោះរាំងស្ងួត។
យោងតាមសេចក្តីប្រកាសព័ត៌មានស្តីពីលទ្ធផលកិច្ចប្រជុំពេញអង្គគណៈរដ្ឋមន្ត្រីកាលពីថ្ងៃទី២៤ ខែកក្កដា ឆ្នាំ២០២៦ បានឱ្យដឹងថា លោកនាយករដ្ឋមន្ត្រី ហ៊ុន ម៉ាណែត បានណែនាំឱ្យក្រសួងធនធានទឹកសហការជាមួយគណៈកម្មាធិការជាតិគ្រប់គ្រងគ្រោះមហន្តរាយ ក្រសួង ស្ថាប័ននិងរដ្ឋបាលរាជធានី ខេត្តបន្តតាមដានការវិវត្តន៍ និងផ្សព្វផ្សាយជាប្រចាំឱ្យពលរដ្ឋបានដឹងអំពីផលវិបាក នៃបម្រែបម្រួលអាកាសធាតុនិងត្រៀមមធ្យោបាយចាំបាច់ ដើម្បីអន្តរាគមន៍ និងសង្គ្រោះប្រជាពលរដ្ឋក្នុងករណីចាំបាច់។
លោកនាយករដ្ឋមន្ត្រីក៏បានណែនាំឱ្យក្រសួងកសិកម្ម រុក្ខាប្រមាញ់ និងនេសាទសហការជាមួយក្រសួងសេដ្ឋកិច្ច និងហិរញ្ញវត្ថុ ត្រៀមបំរុងស្បៀងសម្ភារៈនានាជួយដល់ប្រជាកសិករដែលរងផលប៉ះពាល់ឱ្យបានទាន់ពេលវេលា ខណៈក្រសួងសុខាភិបាលត្រូវបន្តផ្សព្វផ្សាយអំពីវិធានការការពារខ្លួនពីផលប៉ះពាល់។ ដោយឡែក ក្រសួងរ៉ែនិងថាមពល ត្រូវត្រៀមថាមពលអគ្គិសនី ដើម្បីផ្គត់ផ្គង់ជូនប្រជាពលរដ្ឋ។
សេចក្តីប្រកាសព័ត៌មានក៏បានឱ្យដឹងផងដែរថា ក្រសួងធនធានទឹកបានដាក់ចេញនូវវិធានការនិងការត្រៀមលក្ខណៈមួយចំនូន ដើម្បីឆ្លើយតបទៅនឹងបាតុភូតអែលនីញ៉ូនេះ ដូចជាការជួសជុល ស្តារនិងថែទាំប្រព័ន្ធធារាសាស្ត្រ និងស្ថានីយជលសាស្ត្រនិងឧតុនិយម ការគ្រប់គ្រងនិងអភិរក្សប្រភពទឹក ត្រៀមលក្ខណៈអន្តរាគមន៍បន្ទាន់ ផ្សព្វផ្សាយការយល់ដឹង សហប្រតិបត្តិការជាមួយក្រសួងនិងស្ថាប័នពាក់ព័ន្ធ។
សេចក្តីប្រកាសព័ត៌មានដដែលបន្ថែមទៀតថា គិតត្រឹម២០២៥ កម្ពុជាមានប្រព័ន្ធធារាសាស្ត្រសរុបចំនួន ២៣៥៤ ប្រព័ន្ធ ដែលមានលទ្ធភាពស្រោចស្រពបានប្រមាណចំនួន ២ ០០៦ ៧២២ហិកតា ក្នុងនោះស្រូវវស្សា ១ ៤០៤ ៧៩១ហិកតា និងស្រូវប្រាំង ៦០១ ៩៣១ហិកតា និងដំណាំរួមផ្សំចំនួន ១២ ២៤២ ហិកតា។ ដោយឡែក គិតត្រឹមឆមាសទី១ ឆ្នាំ២០២៦ កម្ពុជាមានអាងស្តុកទឹកចំនួន ១ ៦៥៩អាង ដែលមានសមត្ថភាពស្តុកទឹកអតិបរមាប្រមាណ ៤០០០លានម៉ែត្រគូប៕
អត្ថបទដោយ៖ តែម ស្រីណុច