ក្រុមហ៊ុនម៉ូរីសុនកាក់ អិមខេអេ ជាក្រុមហ៊ុនជម្រះបញ្ជី នៃធនាគារ ផេនដា ប្រាប់ឱ្យអតិថិជនទាំងអស់ប្រុងប្រយ័ត្នខ្ពស់ចំពោះការបោកប្រាស់ពាក់ព័ន្ធនឹងការទូទាត់សងប្រាក់បញ្ញើរបស់ធនាគារ ផេនដា បន្ទាប់ពីរកឃើញមានក្រុមជនទុច្ចរិតមួយចំនួនបានធានាអះអាងជួយឱ្យអតិថិជនទទួលបានប្រាក់បញ្ញើជាថ្នូរនឹងការបង់កម្រៃជើងសារពី៤៥ភាគរយដល់៥៥ភាគរយ។
តាមសេចក្តីជូនដំណឹងចុះថ្ងៃទី២២ ខែកក្កដា ឆ្នាំ២០២៦ ក្រុមហ៊ុនម៉ូរីសុនកាក់ អិមខេអេ បានរកឃើញថា ក្រុមជនទុច្ចរិតទាំងនោះថែមទាំងល្បួងឱ្យអតិថិជនចុះកិច្ចព្រមព្រៀង និងចេញមូលប្បទានបត្រ (Cheque) ជូនអតិថិជន ដើម្បីបង្កើនការជឿទុកចិត្ត។
សេចក្តីជូនដំណឹងដដែលបានចាត់ទុកសកម្មភាពខាងលើ គឺជាការបោកប្រាស់ និងជាទង្វើខុសច្បាប់ដោយបុគ្គល ឬក្រុមជនទាំងនោះ ពុំមានសិទ្ធិអំណាចឬសមត្ថកិច្ចផ្លូវច្បាប់ណាមួយក្នុងការចាត់ចែង ឬធានាការទូទាត់សងប្រាបក់បញ្ញើពីធនាគារ ដែលកំពុងស្ថិតក្នុងដំណើរការជម្រះបញ្ជីឡើយ ហើយរាល់ការទូទាត់សងប្រាក់បញ្ញើជូនអតិថិជនត្រូវអនុវត្តតាមនីតិវិធី ដែលបានកំណត់ ហើយក្រុមហ៊ុនជម្រះបញ្ជីទំនាក់ទំនងជាមួយម្ចាស់ប្រាក់បញ្ញើដោយផ្ទាល់ ដោយមិនមានការតម្រូវឱ្យបង់ថ្លៃកម្រៃជើងសារឬថ្លៃសេវាណាមួយជាដាច់ខាត។
ក្រុមហ៊ុនម៉ូរីសុនកាក់ អិមខេអេ បានក្រើនរំឭកផងដែរដល់ម្ចាស់ប្រាក់បញ្ញើទាំងអស់មិនត្រូវផ្តល់ព័ត៌មានទាក់ទងនឹងគណនី ព័ត៌មានផ្ទាល់ខ្លួន លេខសម្ងាត់ ឬចុះហត្ថលេខាលើកិច្ចសន្យា ឬឯកសារណាមួយជាមួយបុគ្គល ឬក្រុមជន ដែលអះអាងថា អាចជួយដកប្រាក់បញ្ញើ ព្រោះអាចធ្លាក់ក្នុងល្បិចកលដែលនាំឱ្យបាត់បង់ផលប្រយោជន៍ និងទ្រព្យសម្បត្តិផ្ទាល់ខ្លួន។
ស្របពេលជាមួយគ្នានោះដែរ ក្រុមហ៊ុនម៉ូរីសុនកាក់ អិមខេអេ ជាក្រុមហ៊ុនជម្រះបញ្ជីកំពុងសហការជាមួយអាជ្ញាធរមានសមត្ថកិច្ច ដើម្បីស្រាវជ្រាវនិងចាត់វិធានការតាមផ្លូវច្បាប់ចំពោះក្រុមជនទុច្ចរិតទាំងនោះ។
គួរបញ្ជាក់ផងដែរថា កាលពីថ្ងៃទី ២០ ខែកុម្ភៈ ឆ្នាំ២០២៦ ធនាគារជាតិក៏បានសម្រេចដកហូតអាជ្ញាបណ្ណធនាគារផេនដា និងដាក់ឱ្យស្ថិតក្រោមការជម្រះបញ្ជីដោយក្រុមហ៊ុនម៉ូរីសុនកាក់នេះដោយអះអាងថា ស្ថានភាពហិរញ្ញវត្ថុនៃធនាគារនេះបានធ្លាក់ចុះជាបន្ដបន្ទាប់ ដែលឈានទៅរកការមិនអាចឆ្លើយតបនឹងការបម្រើសេវាធនាគារបានទៀត៕
អត្ថបទដោយ៖ តែម ស្រីណុច