រដ្ឋាភិបាល តាមរយៈក្រសួងសុខាភិបាល បានប្រកាសដាក់ឱ្យដំណើរការមជ្ឈមណ្ឌលប្រតិបត្តិការបន្ទាន់ (EOC) ដើម្បីឆ្លើយតបទៅនឹងការផ្ទុះឡើងនៃជំងឺគ្រុនឈាម និងទប់ស្កាត់ការរីករាលដាលបន្ថែម។
យោងតាមការផ្សព្វផ្សាយលើបណ្តាញសង្គមហ្វេសប៊ុករបស់ក្រសួងសុខាភិបាល នៅថ្ងៃទី១១ ខែកក្កដា ឆ្នាំ២០២៦ បានឱ្យដឹងថា កាលពីថ្ងៃសុក្រ នាយកដ្ឋានប្រយុទ្ធនឹងជំងឺឆ្លង បានរៀបចំកិច្ចប្រជុំដាក់ឱ្យដំណើរការមជ្ឈមណ្ឌលប្រតិបត្តិការបន្ទាន់ (EOC) សម្រាប់ការផ្ទុះជំងឺគ្រុនឈាម តាមប្រព័ន្ធនិមិត (Zoom)។
ប្រភពដដែល បន្តថា កិច្ចប្រជុំនោះ ធ្វើឡើងក្នុងគោលបំណងធានាឱ្យមានការឆ្លើយតបប្រកបដោយប្រសិទ្ធភាព និងទាន់ពេលវេលា ដើម្បីគ្រប់គ្រងការផ្ទុះជំងឺគ្រុនឈាម កាត់បន្ថយអត្រាឈឺ និងអត្រាស្លាប់ ព្រមទាំងទប់ស្កាត់ការរីករាលដាលបន្ថែម។ ក្រៅពីនោះ ក៏ពិនិត្យ និងវាយតម្លៃស្ថានភាពជំងឺគ្រុនឈាម និងកំណត់កម្រិតហានិភ័យ សម្រេចចិត្តលើការធ្វើឱ្យដំណើរការមជ្ឈមណ្ឌលប្រតិបត្តិការបន្ទាន់ (EOC) និងកំណត់កម្រិតនៃការឆ្លើយតប។
ក្នុងកិច្ចប្រជុំនោះ រដ្ឋលេខាធិការក្រសួងសុខាភិបាល លោកស្រី យក់ សម្បត្តិ ក៏បានណែនាំដល់មន្ត្រីពាក់ព័ន្ធ យកចិត្តទុកដាក់ក្នុងការទប់ស្កាត់ការផ្ទុះនៃជំងឺគ្រុនឈាមនេះ ដើម្បីកាត់បន្ថយអាត្រាឈឺ និងស្លាប់ឱ្យមានប្រសិទ្ធភាពខ្ពស់។
កាលពីថ្ងៃទី០៨ ខែកក្កដា ឆ្នាំ២០២៦ ក្រសួងសុខាភិបាល ក៏បានចេញសេចក្តីណែនាំក្រើនរំលឹកដល់ប្រជាពលរដ្ឋ បង្ការជំងឺគ្រុនឈាមក្នុងរដូវវស្សា ខណៈឥទ្ធិពលនៃបាតុភូតកើនកម្ដៅ (EI Niño) អាចធ្វើឲ្យមានការកើនឡើងចំនួនមូសខ្លា និងជំងឺគ្រុនឈាម។
ក្រសួងបានជំរុញឱ្យប្រជាពលរដ្ឋ និងអាជ្ញាធរគ្រប់ជាន់ថ្នាក់ទាំងអស់ ចូលរួមចលនាកាត់បន្ថយ តាមដាន និងទប់ស្កាត់ការកកើតសត្វមូស ដោយអនុវត្តនូវវិធានការមួយចំនួន។ វិធានការទាំងនោះ មានដូចជា សម្អាតបរិវេណជុំវិញផ្ទះ ការដ្ឋានសំណង់ និងតាមបណ្តាទីផ្សារដោយលុបបំបាត់វត្ថុដក់ទឹក, ស្លៀកពាក់ខោជើងវែងអាវដៃវែង, ប្រើថ្នាំការពារមូស ដែលថ្នាំនេះស្ត្រីមានផ្ទៃពោះអាចប្រើបានដោយមានសុវត្ថិភាព និងសម្រាន្តក្នុងមុងទាំងថ្ងៃ និងយប់ ដើម្បីការពារការខាំពីមូសជាដើម។
ក្រសួងបន្តថា ប្រសិនបើប្រជាពលរដ្ឋដែលមានរោគសញ្ញាគ្រុនក្តៅខ្លួនខ្លាំងភ្លាមៗ ចាប់ពី ៣៩ ទៅ ៤០ អង្សាសេ ត្រូវប្រញាប់ទៅពិនិត្យនិងព្យាបាលជាបន្ទាន់នៅមណ្ឌលសុខភាព ក្នុងរយៈពេល ៤៨ ម៉ោងយ៉ាងតិច។
បើតាមការសិក្សាស្រាវជ្រាវរបស់ក្រសួង សត្វមូសខ្លាចូលចិត្តរស់នៅកន្លែងទឹកដក់ ដូចជា សំបកកង់ឡាន/កង់ម៉ូតូទុកចោលពាសវាលពាសកាល ត្រឡោកដូង កែវ ចានជ័រ/ស្នោរ ក្រឡដែលបោះបង់ចោល ពាង អាង ធុងដាក់ទឹក ទឹកថូផ្កា ចាទ្រជើងតុ និងពែងជាដើម។ សត្វមូសខ្លាចូលរួមសំងំលាក់ខ្លួននៅក្នុងទីកន្លែងងងឹតៗ ឬមិនសូវមានពន្លឺថ្ងៃចូលដល់។
កាលពីពេលថ្មីៗនេះ ក្រសួងក៏បានរកឃើញករណីឆ្លងជំងឺគ្រុនឈាមជិត ៦០០ នាក់ នៅស្រុកកោះធំ ខេត្តកណ្តាល គិតចាប់ពីថ្ងៃទី១៦ ខែមិថុនា ដល់ថ្ងៃទី០៤ ខែកក្កដា ឆ្នាំ២០២៦ ក្នុងនោះមានអ្នកជំងឺធ្ងន់ ៦នាក់ ត្រូវបានបញ្ជូនទៅមន្ទីរពេទ្យគន្ធបុប្ផា និងគ្មានករណីស្លាប់នោះទេ៕
អត្ថបទដោយ៖ ស៊ន មេសា