សំឡេងខ្លាំងៗជាបន្តបន្ទាប់ថា “យើងត្រូវការយុត្តិធម៌” ត្រូវបានបន្លឺឡើងចេញពីក្រុមអ្នកគាំទ្រដូចជាមន្ត្រីសង្គមស៊ីវិល សហជីព សកម្មជន និងពលរដ្ឋ ដែលបានប្រមូលផ្តុំគ្នានៅព្រឹកថ្ងៃសុក្រនេះ ដើម្បីរំលឹកខួប១០ឆ្នាំ នៃអំពើឃាតកម្មលើលោកបណ្ឌិត កែម ឡី នៅស្ថានីយប្រេងឥន្ធនៈកាលតិចបូកគោ នៅរាជធានីភ្នំពេញ ទីដែលលោកត្រូវបានខ្មាន់កាំភ្លើងបាញ់សម្លាប់។
ចាប់ពីម៉ោង ៧:០០នាទីព្រឹក អ្នកចូលរួមប្រមាណ១០០នាក់ បានប្រមូលផ្តុំគ្នាដូចឆ្នាំកន្លងទៅដែរ ដោយអ្នកខ្លះបានយកកម្រងផ្កា ផ្កាឈូក ខ្លះកាន់រូបថត ពាក់អាវសនិងមានឈ្នួតក្បាលបង្ហាញពីការកាន់ទុក្ខ ហើយអ្នកខ្លះកាន់ទៀតកាន់បដាដែលសរសេរថា “កែម ឡី” “យុត្តិធម៌” “ជូតទឹកភ្នែករបស់អ្នករួចបន្តដំណើរទៅមុខ” និង“និយាយការពិត កុំនិយាយការពារ” ជាដើម។ ក្នុងឱកាសនោះដែរ ក៏មានការដើរទក្សិនបីជុំ ដោយមានកាន់រូបថត ផ្កាឈូក និងកែវកាហ្វេមួយកែវដែលសរសេរអក្សរពណ៌ក្រហមលើកែវនោះថា “កែម ឡី” ។ បន្ទាប់មកមានពិធីសូត្រមន្តឧទ្ទិសកុសលតាមបែបសាសានាខ្លីមួយ ដោយពុំមានវត្តមានរបស់ព្រះសង្ឃនោះទេ។
លោកបណ្ឌិត កែម ឡី ជាអ្នកវិភាគនយោបាយដ៏មានប្រជាប្រិយភាពមួយរូប ត្រូវបានខ្មាន់កាំភ្លើងបាញ់សម្លាប់នៅថ្ងៃទី១០ ខែកក្កដា ឆ្នាំ២០១៦ ខណៈពេលពេលដែលលោកកំពុងពិសាកាហ្វេនៅស្តាម៉ាតស្ថានីយប្រេងឥន្ធនៈកាលតិចស្តុបបូកគោ រាជធានីភ្នំពេញ។ ឃាតករឈ្មោះ អឿត អាង ហៅ ជួប សម្លាប់ ត្រូវបានចាប់ខ្លួនភ្លាមៗនៅថ្ងៃកើតហេតុ ហើយនៅ ខែមីនា ឆ្នាំ២០១៧ សាលាដំបូងរាជធានីភ្នំពេញ បានផ្តន្ទាទោសឈ្មោះ អឿត អាង ពីបទ “ឃាតកម្មគិតទុកជាមុន និងការកាន់កាប់អាវុធខុសច្បាប់” និងកាត់ទោសឱ្យជាប់ពន្ធនាគារអស់មួយជីវិត។ ទោះបីជាយ៉ាងណា សាច់ញាតិ សង្គមស៊ីវិល និងមតិសាធារណជនជាច្រើនបានសម្តែងការសង្ស័យ ហើយជឿថា មានមេខ្លោងនៅពីក្រោយខ្នង នៃអំពើឃាតកម្មដ៏សាហាវនេះ ដោយពួកគេបន្តអំពាវឱ្យអាជ្ញាធរផ្តល់យុត្តិធម៌ពេញលេញ និងនាំយកអ្នកពាក់ព័ន្ធមកផ្តន្ទាទោសតាមច្បាប់។
លោក វន់ ពៅ ប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធបានថ្លែងនៅក្នុងឱកាសនោះថា ការស្លាប់របស់លោកបណ្ឌិត កែម ឡី គឺជាការបាត់បង់ធនធានមនុស្សដ៏សំខាន់ម្នាក់ ដែលលោក និងពលរដ្ឋខ្មែរផ្សេងទៀតមិនអាចបំភ្លេចបាន និងបានអំពាវនាវដល់រដ្ឋាភិបាលឱ្យផ្តល់យុត្តិធម៌ដល់សកម្មជនទាំងអស់។
លោក វន់ ពៅ មានប្រសាសន៍ថា៖ “ការបាត់បង់សម្មជន ការបាត់បង់ធនធានមនុស្ស ដែលគិតគូរពីសង្គម យើងមិនអាចស្ងប់អារម្មណ៍បានទេ ”។
លោក រ៉ុង ឈុន ជាទីប្រឹក្សាគណបក្សកម្លាំងជាតិ បានលើកឡើងថា ១០ឆ្នាំហើយ ដែលលោកបណ្ឌិត កែម ឡី និងក្រុមគ្រួសាររបស់គាត់មិនទាន់ទទួលបានយុត្តិធម៌ ហើយបើទោះបីជាតុលាការបានផ្តន្ទាទោសឈ្មោះ ជួប សម្លាប់ ប៉ុន្តែសម្រាប់ប្រជាពលរដ្ឋ និងអន្តរជាតិមើលឃើញថា ជួប សម្លាប់ មិនមែនជាឃាតករពិតនោះទេ។
លោកមានប្រសាសាន៍ថា៖ “ពលរដ្ឋនៅតែទាមទារចង់ឱ្យអាជ្ញាធរមានសមត្ថកិច្ចបើកការស៊ើបអង្កេតឡើងវិញលើសំណុំរឿងឃាតម្មលើលោកបណ្ឌិត កែម ឡី ”។
លោក នី សុខា ប្រធានសមាគមន៍ការពារសិទ្ធិមនុស្សអាដហុក បានផ្តាំផ្ញើអោយយុវជន និងប្រជាពលរដ្ឋខ្មែរចងចាំស្នាដៃ កេរ្តិ៍ឈ្មោះ និងចូលរួមគាំទ្រស្មារតីរបស់លោកបណ្ឌិត កែម ឡី ហើយថា បើទោះបីជាលោកបានបាត់បង់ជីវិតទៅហើយក៏ដោយ ក៏ទស្សនៈរបស់លោកនៅរស់រវើកនៅក្នុងសង្គមខ្មែរ។
លោកមានប្រសាសន៍ថា ” សូមប្រជាជនខ្មែរទាំងក្នុង និងក្រៅប្រទេសយកថ្ងៃទី១០ កក្កដានេះ ជាថ្ងៃទិវារំលឹកដឹងគុណដល់បណ្ឌិត កែម ឡី ដែលលោកខិតខំលះបង់ ដើម្បីជាតិ និងមនសិកាជាតិ ដើម្បីកម្ពុជាទាំងមូល ” ។
អ្នកស្រី អេង សុខា អាយុ៣៨ឆ្នាំ ជាអ្នកគាំទ្រដែលបានចូលរួមនៅក្នុងពិធីរំលឹកខួបនេះដែរបាននិយាយថា អ្នកស្រីតែងតែចូលរួមជារៀងរាល់ឆ្នាំ ហើយអ្វីដែលអ្នកស្រីចងចាំនិងកោតសរសើរ គឺថា លោកបណ្ឌិត កែម ឡី ហ៊ាននិយាយការពិត ដែលអ្នកផ្សេងមិនហ៊ាននិយាយ ហើយទាំងនេះ ជាអ្វីដែលអ្នកស្រីស្នើឱ្យយុវជនជំនាន់ក្រោយយកគំរូតាមលោកបណ្ឌិត។ ស្រដៀងគ្នានេះដែរ អ្នកស្រីក៏បានអំពាវនាវឱ្យផ្តល់យុត្តិធម៌ពេញលេញសម្រាប់លោកផងដែរ។
អ្នកស្រីបាននិយាយថា៖ ” លោកបណ្ឌិតទទួលបានយុត្តិធម៌ពីប្រជាពលរដ្ឋ តែលោកពុំទាន់បានទទួលយុត្តិធម៌ពីតុលាការនោះទេ “។
ជារៀងរាល់ឆ្នាំ រៀងរាល់ព្រឹកថ្ងៃទី១០ ខែកក្កដា អង្គការសង្គមស៊ីវិលតែងមកជួបជុំគ្នានៅស្ថានីយប្រេងឥន្ធនៈកាល់តិចបូកគោ ដែលជាទីតាំងដែលឃាតករបានបាញ់សម្លាប់លោកបណ្ឌិតកាលពីឆ្នាំ២០១៦៕
អត្ថបទដោយ៖ គាម សោភណ្ឌ