ក្រសួងបរិស្ថាន បានរកឃើញសត្វព្រៃកម្រ និងជិតផុតពូជចំនួន ១៤ប្រភេទ ព្រមទាំងប្រភេទថនិកសត្វ បក្សី និងល្មូនទទួលរងគ្រោះថ្នាក់តិចតួចមួយចំនួនទៀត នៅតំបន់ឧទ្យានជាតិភ្នំក្រវាញ ក្នុងភូមិសាស្ត្រខេត្តកំពង់ស្ពឺ និងខេត្តកោះកុង។
នេះបើតាមលទ្ធផលនៃការសិក្សារបស់គម្រោងនិរន្តរភាពតំបន់ទេសភាព និងទេសចរណ៍ធម្មជាតិរបស់ក្រសួងបរិស្ថានរយៈពេល ៣ខែ គិតចាប់ខែមេសា ដល់ខែមិថុនា ឆ្នាំ២០២៦ ហើយបានបង្ហោះផ្សាយនៅលើទំព័រហ្វេសប៊ុករបស់ក្រសួងបរិស្ថាន នៅថ្ងៃទី០៦ ខែកក្កដានេះ។
ក្រសួងបានឱ្យដឹងថា តាមរយៈលទ្ធផលសិក្សានេះ មន្ត្រីជំនាញបានរកឃើញប្រភេទសត្វព្រៃកម្រ ជិតផុតពូជ និងប្រភេទទទួលរងគ្រោះថ្នាក់និងជិតរងទទួលគ្រោះថ្នាក់បានចំនួន ១៤ប្រភេទ ក្នុងនោះមានដូចជា ដំរីអាស៊ី កែះ ប្រើសស្បូវ ខ្លាឃ្មុំតូច ខ្លាឃ្មុំធំ ខ្លាភ្ញីថ្ម ខ្ទីង ខ្ទីន ឆ្កែព្រៃ កំពីងដូង ស្វាក្ដាម ភេខ្លួនរលោង និងពង្រូល រួមទាំង ប្រភេទថនិកសត្វ បក្សី និងល្មូនមួយចំនួនទៀត កំពុងមានវត្តមាននៅក្នុងឧទ្យានជាតិជួរភ្នំក្រវាញ ក្នុងភូមិសាស្ត្រខេត្តកំពង់ស្ពឺ និងខេត្តកោះកុង។
ក្រសួងក៏បានផ្តោតសំខាន់ទៅលើវត្តមានសត្វ ភេខ្លួនរលោង ដែលជាប្រភេទសត្វក្រម ត្រូវបានចុះក្នុងបញ្ជីក្រហម IUCN (VU) និងជាប្រភេទងាយទទួលរងគ្រោះនៅលើពិភពលោក។ ភេប្រភេទនេះ ក៏កំពុងរងគ្រោះដោយសារការទាក់ចាប់ ដើម្បីធ្វើពាណិជ្ជកម្ម បរបាញ់ និងការបាត់បង់ទីជម្រក៕
អត្ថបទដោយ៖ គីម សុខលាភ