មន្ត្រីជាន់ខ្ពស់ នៃអគ្គនាយកដ្ឋានពន្ធនាគារអះអាងថា ចំនួនអ្នកជាប់ឃុំនៅពន្ធនាគារក្នុងប្រទេសកម្ពុជាអាចកើនដល់ប្រមាណ ៨៥០០០នាក់ ត្រឹមចុងឆ្នាំ២០២៨ ស្របពេលដែលមានការព្រួយបារម្ភអំពីភាពចង្អៀតណែននាពេលបច្ចុប្បន្ន បង្កផលវិបាកដល់ការងារស្តារនីតិសម្បទារបស់ជនជាប់ឃុំ។
គិតត្រឹម ៦ខែដំបូង នៃឆ្នាំ២០២៦នេះ ចំនួនអ្នកជាប់ឃុំកើនឡើងជិត ៥០០០នាក់ បន្ទាប់ពីមានការរឹតបន្តឹងការអនុវត្តច្បាប់ និងវិធានការនានារបស់រដ្ឋាភិបាលពាក់ព័ន្ធការឆបោកស្កេមអនឡាញ គ្រឿងញៀន ក្មេងទំនើង និងបទល្មើសទូទៅ។ នេះបើតាមការថ្លែងរបស់លោក ឈន សាណាត អគ្គនាយក នៃអគ្គនាយកដ្ឋានពន្ធនាគារនៅក្នុងកិច្ចសម្ភាសន៍ជាមួយទូរទស្សន៍ក្រសួងមហាផ្ទៃកាលពីថ្ងៃទី៣ ខែកក្កដា។
លោក ឈន សាណាត មានប្រសាសន៍ថា កំណើននេះ ធ្វើឱ្យពន្ធនាគារជួបការលំបាកច្រើនក្នុងការស្តារនីតិសម្បទារបស់ជនជាប់ឃុំ ការរៀបចំការឃុំឃាំង និងមិនអាចអនុវត្តពេញលេញតាមគោលការណ៍ច្បាប់ ឬបទដ្ឋានកំណត់ ដូចជាការឃុំតាមប្រភេទបទល្មើស ចំណាត់ថ្នាក់សន្តិសុខ និងអ្នកមានជំងឺឆ្លងជាដើម។
លោកមានប្រសាសន៍ថា៖ “ការឃុំនៅក្នុងបន្ទប់តែមួយមានគ្នាច្រើន និងចង្អៀតណែនបង្កឱ្យមានសម្ពាធផ្នែកអារម្មណ៍ និងភាពតានតឹងផ្លូវចិត្ត។ ក្នុងចំណុចនេះ ជនជាប់ឃុំពេលខ្លះមានអារម្មណ៍ចង់ធ្វើអត្តឃាត មានអារម្មណ៍ចង់លួចរត់គេច មានអារម្មណ៍ចង់ធ្វើបាតុកម្ម ឬកុបកម្មក្នុងពន្ធនាគារ” ។
ក្រៅពីប្រឈមនឹងបញ្ហាចង្អៀតណែនក្នុងពន្ធនាគារ លោក ឈន សាណាត ក៏បានបង្ហាញក្តីបារម្ភអំពីសមាមាត្ររវាងចំនួនជនជាប់ឃុំ និងមន្ត្រីពន្ធនាគារផងដែរ ដោយលោកថា នៅមានគម្លាតឆ្ងាយពីគ្នា ស្របពេលបច្ចុប្បន្ន មន្ត្រីពន្ធនាគារម្នាក់ត្រូវគ្រប់គ្រងជនជាប់ឃុំពី២០ ទៅ២៥នាក់ ខណៈតាមបទដ្ឋានស្តង់ដារកម្រិតត្រឹម ៦ទៅ១០នាក់ក្នុងតំបន់អាស៊ាន ដោយបន្ថែមថា បច្ចុប្បន្ន ទំហំផ្ទៃក្រឡាសម្រាប់ជនជាប់ឃុំម្នាក់ គឺ ១.០ម៉ែត្រក្រឡា ប៉ុន្តែតាមបទដ្ឋានអប្បបរមារបស់អង្គការសហប្រជាជាតិ គឺ ៣.៤ម៉ែត្រការ៉េ ក្នុងនោះ ២ម៉ែត្រការ៉េសម្រាប់ដេក និង១,៥ ម៉ែត្រសម្រាប់សកម្មភាពផ្សេងៗ។
លោកបានបន្តទៀតថា ដើម្បីដោះស្រាយនឹងបញ្ហាចង្អៀតណែននៅពន្ធនាគារ អគ្គនាយកដ្ឋានពន្ធនាគារបានអនុវត្តវិធានការមួយចំនួនដូចជាការអនុវត្តទោសសហគមន៍ ការលើកលែងទោស ការបន្ធូរបន្ថយទោស និងការដោះលែងដោយមានលក្ខខណ្ឌ។ បន្ថែមពីនេះ ការផ្ទេរជនជាប់ឃុំពីពន្ធនាគារចង្អៀតណែនខ្លាំងទៅកាន់ពន្ធនាគារផ្សេងទៀត ដែលមានភាពចង្អៀតណែនមធ្យម ក៏ជាវិធីកាត់បន្ថយមួយកម្រិតទៀតផងដែរ។
លោក ឈន សាណាត បញ្ជាក់ថា បច្ចុប្បន្ន មន្ត្រីពន្ធនាគារសរុបមាន ៣៥៥៤នាក់ ក្នុងនោះស្ត្រី ៦១៧នាក់ ថ្នាក់ដឹកនាំ និងមន្ត្រីរដ្ឋបាលថ្នាក់កណ្តាលមានចំនួន ៤១៦នាក់ ស្មើនឹង១១ភាគរយ។ មន្ត្រីនៅតាមមណ្ឌលអប់រំកែប្រែ និងពន្ធនាគាររាជធានីខេត្តមាន ៣២៣៨នាក់ ស្មើ៨៩ភាគរយ។
ដោយឡែក បច្ចុប្បន្ន ចំនួនអ្នកជាប់ឃុំទូទាំងសរុបមាន ៦៧៦៧៧ពាន់នាក់ ក្នុងនោះ ស្ត្រីមាន ៤៥៣០នាក់ ជនត្រូវចោទមាន២២ភាគរយ ជនជាប់ចោទ១០ភាគរយ ពិរុទ្ធជន៣៧ភាគរយ និងទណ្ឌិត ៣១ភាគរយ។ អនីតជនមានចំនួន ៣០៤៧នាក់ ជនបរទេសមានចំនួន ៧៤៣៤នាក់ ដែលមាន ៥៧ជនជាតិ។ បទល្មើសគ្រឿងញៀនមានចំនួន៥១ភាគរយ បទល្មើសពាក់ព័ន្ធស្កេមអនឡាញមាន ២៥៥៤នាក់ និងក្មេងទំនើងមាន ៣០១០នាក់៕
ដោយ៖ គង់ សុខណា