ជនបរទេសជាង១ម៉ឺននាក់ត្រូវបានបណ្តេញចេញពាក់ព័ន្ធនឹងសកម្មភាពឆបោកតាមប្រព័ន្ធបច្ចេកវិទ្យាក្នុងរយៈពេលជាង១ឆ្នាំកន្លងមកនេះ ខណៈរដ្ឋាភិបាលបន្តប្តេជ្ញាចិត្តបង្ក្រាបបណ្តាញឧក្រិដ្ឋកម្មឆ្លងដែនគ្រប់ប្រភេទ ដោយ ”គ្មានការអត់ឱន” និងម៉ឺងម៉ាត់បំផុត។
យោងតាមសេចក្តីប្រកាសព័ត៌មានរបស់ទីស្តីការគណៈរដ្ឋមន្ត្រីនៅថ្ងៃសុក្រនេះ បានឱ្យដឹងថា គិតចាប់ពីដើមឆ្នាំ២០២៥ ដល់ថ្ងៃទី១៩ ខែមេសា ឆ្នាំ២០២៦ កម្ពុជាបានបណ្តេញជនបរទេសចំនួន ១៣ ០៣៩នាក់ ដែលពាក់ព័ន្ធនឹងសកម្មភាពឆបោកតាមប្រព័ន្ធបច្ចេកវិទ្យា មាន៣៣សញ្ជាតិ។ ស្របពេលជាមួយគ្នានេះ ជនបរទេសជាង ២៤១ ៨៨៨នាក់ ក៏បានស្ម័គ្រចិត្តចាកចេញពីកម្ពុជា គិតចាប់ពីពាក់កណ្តាល ខែមករា ដល់ថ្ងៃទី១៩ ខែមេសា ឆ្នាំ២០២៦។
សេចក្តីប្រកាសព័ត៌មានបន្តថា ចាប់តាំងពីខែកក្កដា ឆ្នាំ២០២៥ ដល់ពាក់កណ្តាលខែមេសា ឆ្នាំ២០២៦ ពោល គឺក្នុងរយៈពេលជាង ៩ខែចុងក្រោយ អាជ្ញាធរមានសមត្ថកិច្ចបានបង្ក្រាបអំពើឆបោកតាមប្រព័ន្ធបច្ចេកវិទ្យាចំនួនជាង ២៥០ ករណី ដោយក្នុងនោះកាស៊ីណូចំនួន៩១ទីតាំង និងបានកសាងសំណុំរឿងបញ្ជូនទៅតុលាការចំនួន១១២ករណី ពាក់ព័ន្ធនឹងជនសង្ស័យចំនួនប្រមាណ ១០៨៩នាក់។
សេចក្តីប្រកាសព័ត៌មានដដែលក៏បានបង្ហាញផងដែរអំពីការប្តេជ្ញាចិត្តរបស់រដ្ឋាភិបាលក្នុងការបង្ក្រាបឧក្រិដ្ឋកម្មឆបោកតាមអនឡាញឱ្យដល់ឫសគល់ដោយគ្មានការបង្អែបង្អង់ មិនអត់ឱននិងមិនលើកលែង។
សេចក្តីប្រកាសព័ត៌មានសរសេរថា៖ “គោលដៅយុទ្ធសាស្ត្ររបស់រាជរដ្ឋាភិបាល មិនត្រឹមតែបង្ក្រាបតាមករណីនីមួយៗប៉ុណ្ណោះទេ ប៉ុន្តែថែមទាំងបំផ្លាញបណ្តាញឧក្រិដ្ឋកម្មទាំងមូល ដកហូតសមត្ថភាពប្រតិបត្តិការ កាត់ផ្តាច់ប្រភពហិរញ្ញវត្ថុនិងបិទច្រកប្រតិបត្តិការទាំងអស់”។
សេចក្តីប្រកាសព័ត៌មានបានបញ្ជាក់ទៀតថា ដើម្បីឱ្យការងារប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យានេះ មានប្រសិទ្ធភាព រដ្ឋាភិបាលបានបង្កើតក្របខណ្ឌគតិយុត្តជាច្រើនដូចជាច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា បទបញ្ជាស្តីពីយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា អនុក្រឹត្យស្តីពីការគ្រប់គ្រងសន្តិសុខសវុត្ថិភាពតាមទីតាំងរស់នៅប្រមូលផ្តុំ និងប្រកាសអន្តរក្រសួងស្តីពីបែបបទ និងនីតិវិធីនៃការផាកពិន័យចំពោះម្ចាស់ ឬអ្នកគ្រប់គ្រងទីតាំងរស់នៅប្រមូលផ្តុំ។
កាលពីថ្ងៃទី២៣ ខែមេសា ឆ្នាំ២០២៦ ក្រសួងរតនាគារអាមេរិកបានប្រកាសដាក់ទណ្ឌកម្មលោក កុក អាន សមាជិកព្រឹទ្ធសភាកម្ពុជា និងអ្នកពាក់ព័ន្ធ២៨រូបផ្សេងទៀតពាក់ព័ន្ធនឹងទីតាំងឆបោកតាមអនឡាញ ដែលធ្វើឱ្យពលរដ្ឋអាមេរិកបាត់បង់ប្រាក់រាប់លានដុល្លារ៕